Read Angami Naga Nuolhoutsüphrü 18 Bible Online

Nuolhoutsüphrü 18 - Angami Naga bible

Nuolhoutsüphrü 18

¹Jihovae Aron ki: Kemesachüu nu kekrükelieko; no, n nuonuoko mu n pfutsanuomia nyie chülie, siro zievo nyükecü nyieko zowe no mu n nuonuoko tsü gei zotuo.

²Tsiu n siezedzürieko, Levi yiemia n puo seyieko bu n ze puochü di n lie chüketuo la uko ze n penuo vorliecie; derei no mu n nuoko ze n sa di dietseidiekho bou pfhekiu[34] nu ba morosuo.

³Sidi uko bu n mhatho mu rüsuopfhekiu nu mhatho pete chütuo; derei no mu uko bu siata molieketuo la uko bu kemesa chüu mu ruosuobau penuo volie lho.

⁴Siro uko bu n ze di kehou pfhekiu nu mhatho pete chütuo, mu kekreimia puo rei nieko penuo vorlie lho.

⁵Siro Israelmiako gei noupfhü bu vor sa molieketuo la, nieko kemesachüu mu ruosuobau mhathoko chüliecie.

⁶Ae Israelmiako donu nu nie siezedzürie Leviko zeliete; kehoupfhekiu nu mhatho chüketuo la nieko la methuo khapie Jihova ketsü puo zo.

⁷Siro no mu n nuonuoko n sa di ruosuobau la mu pfhe lhapie keba bau nu la nieko bu zievo mhathoko menuo di chütuo. Zievokechü phruoshü nie tsüwate; mu kekreimia hako penuo kevormia dukhriwatuo.

⁸Süsie Jihova Aron ki: Ae n ki ruosuo khakeshü pete, Israelmiako chükemesalieketa vie pete pie n pelewate, süko pie n bu n vie chüketuo la, mu n nuonuoko bu kechachie seketuo la se n tsüwate.

⁹Mi pie thewa kemo mha kemesatho hako n vietuo, uko ruosuo pete, süsü uko lhacülhale ruosuo pete, uko kephouma ruosuo pete, uko thezho kevarhuo ruosuo pete, uko khapie a ketsüko n la mu n nuonuoko la mesatho zo.

¹⁰Thechü kemesatho nunu no süu cütuo; thepfumia pete bu süu cütuo, süue nie la mesa zo.

¹¹Hako rei n vietuo, Israelmiako methuo khakeshü piesie kegepie ruosuo kechü pete, ae pie kechachie la no mu n nuonuoko thenu rei thepfu rei tsüwate. N seyiemia mesa keba khe hako cülie vi.

¹²Ukoe tier kevithoko, khubezu kevithoko, mu puosi rüchülie keriethoko pie Jihova ketsüko pete ae pie n tsüwate.

¹³Uko kijünu keba puosi melie keriethoko se vor Jihova ketsüko n vietuo; n kinumia mesakeba khe süu cülie vi.

¹⁴Israel nu mhachü kemesashüwaketa pete n vie zotuo.

¹⁵Themia rei khunuo shierei puochü chükepfü pete nuorieu pie Jihova ketsü khe n vie zotuo, siürei themia nuorieu we no rha morosuo zotuo, mu mesa kemo khunuo rei no rha morosuo.

¹⁶Kemesachü shekel nu le di shekel pengou süue gera mepfü (khunuo nuonuo khrü puo phichüketako) rha morosuokecüko no rhalie morosuo.

¹⁷Derei mithu nuorieu, morei tekuo nuorieu, morei temvü nuorieu no rha morei vi, süko mesa zo, no süko zie kegepie ruosuobau gei shütuo mu Jihova ki puore kethengu ruosuo puo la puo shuoko mi pie thepie ruosuo chütuo.

¹⁸Piesie kegepie ruosuo kechü khouzüu rei mu puodo puo zatsatie rei n vie zotuo.

¹⁹Mha kemesa vie, Israelmiako piesie kelopie Jihova rüsuokecü pete ae pie no mu n nuonuoko thepfu mu thenuko n sa di nieko bu kechachie nie vie chütuoü nieko tsüwate: haha n la mu n seyieko la Jihova mhodzü kechachie la dietseidiekhokelie metsie zo.

²⁰Süsie Jihovae Aron ki, N bu uko kijü nu n rüvie puorei chülie lho, morei uko donu n ya puorei jü; Israelmiako donu a üse n ya mu n rüvie zo.

²¹Levi yiemiakoe kehou pfhekiu nu mhathoko uko lietho chükecü la Israel nu ker za puo khashüyakezhau uko bu pie uko vie chütuoü ae pie uko tsüwate.

²²Siro tsie yawinu Israelmiako bu phouma di siata moketuo la uko bu kehoupfhekiu penuo vo hie.

²³Derei Leviko bu we kehou pfhekiu nu mhathoko chütuo, mu uko bu uko kekrükewako toupfütuo; süue nie nuosenuoyie pete donu kechachie zho puo chütuo; mu Israelmiako donu uko rüvie chüselie lho.

²⁴Kekreilamonyü Israelmiako ker za puou pie Jihova ki ruosuokechüu uko bu se uko rüvie chütuoü di ae süu se uko tsüwaketa la; süla Israelko donu uko rüvie pejütuoükecü ae puwate.

²⁵Süsie Jihovae Mosa ki:

²⁶Noe Leviko ki pushülie: Nieko Israelko ki ker za puo nie bu nie vie chütuoü di ae pie nie ketsüu liekecü ki, niekoe süu nunu Jihova ki ker za puou pie ruosuo chü la morosuo.

²⁷Nieko ruosuo chükeshü hau üse telha mu gekelie thou mu khubedzü se ruosuokechü mhie di letuo.

²⁸Sükemhie di nieko Israelmiako kinu ker za puo ngukelieko üse ruosuo chüpie Jihova ki shü morosuo; mu sünu nu ruosuo chüpie Jihova ketsüu pie Aron zievo-u tsütuo.

²⁹Nie mha methuo chapie ruosuo chüpie Jihova ketsü pete, süko nunu kevithoko, sünunu chükemesalieketako pie Jihova rüsuotuo.

³⁰Süla no uko ki pushülie: Nieko süko nunu kevithoko se ruosuo chükewa sie, Leviko la süko shie nunu vükelie telha mu khubedzü kege nunu gekelie khubedzü kemhie latatuo.

³¹Nieko mu nie kinumiako thechü kehoura nu süu cülie vi, sükoe nie kehou pfhekiu mu mhatho zhakhra zokecü la.

³²Siro nieko kevithoko se rüsuo chükewa la nie bu kephouma pieu pfü molieketuo mu nie sia molieketuo la Israelmia kemesa vieko chü perhuwa hiecie.