Read Angami Naga Nuolhoutsüphrü 19 Bible Online

Nuolhoutsüphrü 19 - Angami Naga bible

Nuolhoutsüphrü 19

¹Süsie Jihovae Mosa mu Aron unie ki:

²Jihova diekhakeshü thezho sü hauha zo: Israelko ki pushü di uko bu thuünuo kemerie mesa tseikecü mu mhakipuorei vocie pfü chiekemoyo puo se nnie ki vorliecie.

³Sitse nnie süu pie Eliazar zievo-u tsüshülie, sidi süyo ze razhüchü khie pa di mia puo bu puo mhodzünu nu süyo dukhrituo.

⁴Sidi Eliazar zievo-ue puo dziekinuo pie puo zie huoyo bielie di vo kehou pfhekiu mhodzütsa nu va thenie kegeshü morosuo.

⁵Siro puo mhingu kinu thuünuo zhü, puochü mu puozie puobuo sa di theshü morosuo.

⁶Mu zievo-u bu sedar seipfü, mu hisop nhapfü mu pfhe kemerie salie di kelhou pie thuünuoyo thekeba metsuo nu shüshü morosuo.

⁷Süsie zievo-u puo pfhenei menyiwa mu dzürüluwa morosuo; sidi zievo-u bu razhüchü nu letuo mu puo bu thevatie ketso mesa mo bataütuo.

⁸Siro thuünuo[35] thekecüu rei puo pfhenei menyiwa mu dzü rüluwa morosuo, sidi thevatie ketso mesa mo bataütuo.

⁹Siro kemesamia puo bu thuünuoyo migeko pfhü kengulie di se vo razhüchü khie thechü kemesa puo nu piezhüwatuo; sidi süko pie Israelko chükemesaketuo dzüu la khapie batuo; süu kephouma valieketuo ruosuo puo zo.

¹⁰Siro thuünuoyo migeko pfhü kengukecüu bu rei puo pfhenei menyiwa morosuo, sidi thevatie ketso mesa mo batuo. Hauha Israelko mu solhimia u donu lhouketuoko la kechachie zho puo chütuo.

¹¹Kehoupuorei kesia mo kebieu bu zha thenie mesa mo batatuo.

¹²Puo bu zha se nhie mu zha thenie nhie dzü pie puo chü kemesawa morosuo, sitse puoe mesatatuo; derei puoe zha se nhie mu zha thenie nhie puo chü kemesalie moro, puoü mesataülie kenjü.

¹³Kehoupuorei themia kesia mo bie di puo thuo puo chü kemesalie moro, Jihova rüsuopfhekiu perhuwate; süla Israel donu nu puo dathewatuo; kekreilamonyü u chü kemesakecü dzüu kegepie puo geishü mocü la puoe mesalie mo; puo kerhuko tsie rei puo gei ba zotuo.

¹⁴Mia puoe pfheki puo nunu siata ro thezho hakemhie tuo: Pfhekiu nu kevor pete mu pfhekiu nu keba pete zha thenie mesa motatuo.

¹⁵Siro mhabou puo kege pie ge mo di pengopiekeba kheko mesa motatuo.

¹⁶Kehoupuorei phouyo nu zhiecha se dukhripie kezhü kesia mo, morei kesia ru, morei mekhru bie ro, süu bu zha thenie mesa mo batuo.

¹⁷Siro mesa moketau la uko bu kephouma la kethe ruosuo mige huoyo selie di pie mhabou puo nu shülie, mu dzü pie süu sa reishülie,

¹⁸sidi kemesamia puo bu hisop nhapfü selie di dzüu nu selie, sidi kegepie pfhekiu, mhabouko pete, themia sünu kebako mu kesia ru, morei zhiecha pie dukhrikewau, morei kesia mo, morei mekhru kebieu vashü morosuo.

¹⁹Mu themia kemesau bu zha se nhie mu zha thenie nhie süu kegepie mesa mokebau vashü di zha thenie nhie puo chü kemesawatuo, sidi puo bu puo pfhenei menyiwa mu dzü rüluwa di thevatie puoe mesatatuo.

²⁰Derei mia huoe mesa mota di uthuo u chü kemesalie moro, kehou donu nu sümia kelhiwatuo, ukoe Jihova kemesachüu perhukewa la; chü kemesakecü dzüu kegepie uko va mocü la, uko mesalie mo.

²¹Siro hauha kechachie uko la thezho puo chütuo. U chü kemesakecü dzüu kegepie mia vakecüu bu puo pfhenei menyiwa morosuo; mu u chü kemesakecü dzüu kebieu rei thevatie ketso mesa mo batuo.

²²Siro mesakemo-u mha kehoupuorei biekewau mesa motatuo, mu mha süu kebieu rei thevatie ketso mesa motatuo.