Read Angami Naga Nuolhoutsüphrü 20 Bible Online

Nuolhoutsüphrü 20 - Angami Naga bible

Nuolhoutsüphrü 20

¹Süsie Israelko, themia kro-u pete, khrü kerieu nu Zin rayha nu vorlie, sidi themiako Kadesh nu balie. Mu Miriam-e sünunu siata di puo khruwa.

²Siro thechü sünu themia kro-u la dzü jü, süla uko Mosa mu Aron unie gei kenyatuoü vor kengulieta.

³Sidi themiako Mosa gei kenya di sie “Jihova mhodzü kinu hie siezedzürieko siaketa teiki hie bu rei siaketa we vikuotuo muü!

⁴Hie mu hie khurinuoko bu rayha ha nunu siataketuo la no kiüdi Jihova kehou kro-u zepar ga?

⁵Tsie nnie kiüdi Ijipt nunu hie ze thechü kesuo hanu vor ga? Hau telha, chiede, khube, turaü nhasi kelhou kijü mo mu dzü kejü kijüte?” sita.

⁶Sitse Mosa mu Aron unie kehou mhodzünu nu tuo kehou pfhekiu kicie nu vo di zerepfü thata, sitse Jihova zayieu pie unie pengushü.

⁷Sidi Jihovae Mosa ki,

⁸Ketheu selie, mu n dzürieu Aron nnie themia kro-u kie kengulie, sidi uko mhingu kinu tsiekrieu bu dzü khashünu pushülie, sitse no tsiekrieu geinu dzü separ uko tsüshülietuo, sidi themia kro-u mu uko khurinuoko bu krieketuo la.

⁹Sitse Mosae Jihova puo ki diekhakeshü mhie di puo mhodzünu nu ketheu chü selie.

¹⁰Süsie Mosa mu Aron unie-e themia kro-u kie kengupie tsiekrieu mhodzünu shülie, di uko ki, “Nieko mia dieze kemvüko, rünyüshücie; nie la hie nie bu tsiekrieu nunu dzü se parshütuo me?” sita.

¹¹Sidi Mosae puo dzie chasie di puo the pie tsiekrieu vüshü kenie; sitse dzü kru phi par di themia kro-u mu uko khurinuoko bu krielie.

¹²Sitse Jihovae Mosa mu Aron unie ki, “Nnie a pele mote mu Israelmiako mhingu nunu a chükemesalie mote, süla nnie bu kehou hau ze ae kijü pie uko tsükeshüu nu lelie kenjüte” sita.

¹³Dzü hau, za Meriba[36] kekreilamonyü Israelmiako Jihova ze kemeüta mu uko donu nu puoe mesaücü pekiekeshü la.

¹⁴Mosae Kadesh nunu dieliemia ketsepie Edom kediu kishü di, “N siezeu Israel hakemhie puya: Noe hie mezhieko pete siba:

¹⁵Hie pfutsanuoko Ijipt nu tsu; mu hie Ijipt nu lhoutuo cha phite, mu Ijiptmiakoe hie pfutsanuoko mu hie gei rei vi mote.

¹⁶Mu hie-e Jihova ki hie mezhie rükhruoshü tse puoe hie pfhe rünyülie di teigeidieliemia puo ketseshü di Ijipt nunu hie ze parshü; mu hie tsie vor n kijü tierie nu keba Kadesh nu ba.

¹⁷Hieko bu n kijü pfüthe vocie. Hiekoe lie morei khubelie nu rei volie lho, morei dzükhou nu dzü rei krielie lho, hieko kediu Chadi nu kevo zotuo; hieko n kijürie cielie kemochie rürei thezatsa morei thevitsa valie lho” si.

¹⁸Derei Edom sie, “Nieko a kijü pfüthe volie kenjü, hie bu zhiecha separ di n petsouta molieketuo la” si.

¹⁹Sitse Israelmiako la sie, “Hieko Chadi nu rübei kevo zotuo; mu mhanuü a mu a khurinuo n dzü krie ro, a süu ma sushütuo, süu mhatho mo zo, hie bu hie phi pie tuokevo khashücie” si.

²⁰Derei puo sie, “Nieko volie kenjü” sita. Sidi Edom-e themia kekra zepar mu kuo phi di uko petsou sieta.

²¹Hakemhie Edom-e Israelko bu puo kijü pfüthe vo mvüta, süla Israel-e rürei puo therhieta.

²²Siro Israelmia kro-u pete Kadesh nunu tuoshü di vor Hor kijüthou-u tsolie.

²³Sitse Jihovae Edom kijü rie kepenuo ki keba Hor kijüthou geinu Mosa mu Aron unie ki,

²⁴“Aron bu puo themiako ki votatuo. Ae kijü khapie Israelmiako tsükeshüu nu puo bu lelie lhocü la, kekreilamonyü n nie Meriba dzüu nunu a die zemvüte.

²⁵Aron mu puo nuou Eliazar unie ze Hor kijüthou gei khorlie.

²⁶Mu Aron pfheneiko rhuopie puo nuou Eliazar bu selie; mu Aron bu sünunu puo themiako ki votatuo, sidi sünunu siatatuo” sita.

²⁷Mosae Jihova diekhakeshü kemhie chülie, sidi themia kro-u mhingu nunu uko keze kijüthou gei kho.

²⁸Sitse Mosae Aron pfheneiko rhuolie di pie puo nuou Eliazar bu selie; mu Aron-e kijüthou mezü geinu siata. Süsie Mosa mu Eliazar unie-e kijüthou geinu la kerta.

²⁹Siro themia kro-u pete Aron siaketa ngulie tse, Israel kinu pete Aron la zha ser thekrü chü.