Read Angami Naga Nuolhoutsüphrü 22 Bible Online

Nuolhoutsüphrü 22 - Angami Naga bible

Nuolhoutsüphrü 22

¹Süsie Israel tuoshü, di vor Jordan lutsa khie Moab razha Jeriko nu uko razhüchü chülie.

²Mu Zipor nuou Balak-e Israelko Amormia gei chükeshü pete ngu.

³Mu Moab-e themiako prei se bata, uko kra secü la; mu Moab-e Israelmiako prei bata.

⁴Sidi Moab-e Midianmia pehüko ki, “Thudoe lie nu nha liecülieyakezha tuoi themia kro hau ukhieumhou keba pete liecülietuo,” sishü. Mu süteiki Zipor nuou Balak-e Moabmia kedi chüba.

⁵Süla puoe dieliemia ketse pie Amaw[41] kijü nu Eufrat rükhie keba Pethor nu shü di Beor nuou Balaam kie di sie, “Harie themia kro puo Ijipt kijü nunu par, mu ukoe kijü nhyünhe tuote mu ukoe vor a rütsie nu bate.

⁶Süla tsie vor di a la themia hako rüsewacie, ukoe a ki kuothor zocü la; sitse ae uko penyüwa di a kijü nunu uko whuo petawalie vituo nhie; kekreilamonyü a sicü noe japie tsükeshümia theja ngulieya mu rüsekewamia rüsepfütaya” si

⁷Süla Moab nu pehüko mu Medianmia pehükoe themoumia zha chüketuoko sa se di tuoshü, sidi ukoe Balaam ki vor, di Balak dieko pie puo ki pushü.

⁸Sitse puoe uko ki, “Tsiezhü haki baliecie, sitse Jihova a ki pukeshü mhie, die se vor nieki pushütuo” isi. Süla Moabmia kedinuoko Balaam ze bata.

⁹Mu Ukepenuopfü Balaam ki vor di sie, “Themia n zekeba hako suomia ga?” si.

¹⁰Sitse Balaam Ukepenuopfü ki, “Moabmia kediu Zipor nuou Balak-e uko ketse a ki shü di hakemhie puya:

¹¹‘Harie themia hakoe Ijipt nunu par, mu uko kijü nhyünhe tuote; no tsie vor di a la uko rüseshücie; sitse a uko ze terhüchü di uko whuo petawa rei si mo.’ ”

¹²Sitse Ukepenuopfü Balaam ki, “No uko ze volie lho, no themiako rüse rei suo, uko thejakepfü kro puo zocü la” si.

¹³Süla Balaam-e khiserüna sie di Balak kedinuoko ki, “Nie thuo nie kijü nu la voliecie; Jihovae a bu nieko ze vo mvüketa la” sishü.

¹⁴Süla Moab kedinuoko sielie di tuo Balak ki la vo di sie, “Balaam hieko ze vor mvüte” sishü.

¹⁵Süsie rei Balak-e kedinuo krakuo mu therhu pfükuokecü kropuo ketse lashü.

¹⁶Mu uko Balaam ki vor di sie, “Zipor nuou Balak-e hakemhie puya: ‘Mhapuorei bu no a ki kevor kediwa hiecie;

¹⁷a n chüpezhapie therhupfü sekecü chüshütuo, mu no a ki kepuu kehoupuorei a chüshüketuo la; vor di a la themia hako rüsewacie.’ ”

¹⁸Derei Balaam-e Balak kituoko die kela di sie, “Balak-e puo thuo suna rakachü puo ki ketshu pie a tsütuoü zo shierei a Jihova a Kepenuopfü dieu keyielie kenjü zo, puo die touu chü zo molie kenjü.

¹⁹Jihova a ki kedipuo pu sashütie shiü a bu silieketuo la nieko tsiezhü haki bata nu a nie ki chaya” si.

²⁰Mu süzhü Ukepenuopfü Balaam ki vor di puo ki, “Themiako n kietuoü vortacü sie, sie di uko ze volie, derei a n ki kepu dieko rübei no chülie morosuo” sita.

²¹Süsieduü Balaam-e sie di puo gada gei bakhra khashülie di Moabmia kedinuoko ze di tuoshü.

²²Derei puo tuoketa la Ukepenuopfü neimo chüwa; süla Ukepenuopfü dieliemia puo puo ngumvü di puo cha khapfü thata, süki puoe gada gei ba mu puo thekemia kenie puo zetuo.

²³Mu Jihova dielieue puo zhiecha zupie di chanu thakecü gadaue ngu di tuo rüdei cha khie pra di lie nu vota. Sitse Balaam-e gadau vüshü di puo shü kereipie cha nu lashü.

²⁴Süsierei Jihova dielieue khubelie nu cha khie lutsa hatsa khapfü di cha kemere nu thata mu sozha puo bu lutsahatsa khapfü thata.

²⁵Süla gadaue Jihova dielieu ngu di sozha vaphapfü tatatuoü kesie ki sozha geinu Balaam phi gewa, sitse puoe puo vü lashü.

²⁶Süsie Jihova dielieu tuo rie vo di, cha mereteikecü puo nu thata, sünu rürei thezatsa morei thevitsa rei valie kenjü.

²⁷Gadau Jihova dielieu ngu tse, puoe Balaam khro ke zhüta; sitse Balaam puo nou rüpe di puo the pie gadau vüshü

²⁸Sitse Jihovae gadau tie khrüshü di puo bu Balaam ki, “A n gei kedipuo chükecü la no va se a vüta ga?” sita.

²⁹Sitse Balaam-e gadau ki, “No a kreketa la zo; a dzie nu zhiecha puo se tuocü sie, tsie chakhrie a n dukhriwatuomuü” sita.

³⁰Lasie gadaue Balaam ki, “Ae n gada, noe n rheichie, vor thie ha ketso a gei ba vorkecüu mo me? Ae kinhie puo n gei haikecü chü ga?” sita. Sitse puoe “Mo” si.

³¹Süsie Jihovae Balaam mhi khrüshü di puo bu Jihova dielieu puo zhiecha zupie ketha ngulie, sitse puoe nuketsu zerepfü zhüta.

³²Sitse Jihova dielieue puo ki, “No kiüdi va se n gadau vü ga? Harie, ae n ngumvümia chü di vorzhie, kekreilamonyü noe a therü tuotakecü la.

³³Siro gadau a ngu di va se a mhodzünu nu rürei tatate: puo a kinu rüreita motuoü ro, tsieha a puo kelalie di n dukhriwa meciete” sita.

³⁴Balaam-e sie Jihova dielieu ki, “A phoumawate, no chakhapfü thakecü a si mocü la. Süla tsie, n mhi ki kekrütaü liro, a la votatuo” sita.

³⁵Sitse Jihova dielieu Balaam ki, “Themiako ze volie, derei a n ki kepu dieko rübei no pulie morosuo,” si, süla Balaam-e Balak kedinuoko ze vota.

³⁶Süsie Balaam vorkezhü Balak silie tse, puo ze kesetuoü di Arnon rie thelatho nu keba Moab nadiu nu vo.

³⁷Sitse Balak-e Balaam ki, “A mia ketse pie n ki vor mu no kiüdi a ki vor mo ga? A n chü pie therhupfükelie chülie kenjü üte me?” si.

³⁸Sitse Balaam rei Balak ki, “Harie, a tsie n ki vor ba: derei a tsie n ki mha kehoupuorei pulie kevi kekuo ba üme? Ukepenuopfü khapie a tie nu keshü dieu a pu morosuo” sita.

³⁹Süsie Balaam-e Balak ze vota mu unie Kiriat-Huzoth nu vorlie.

⁴⁰Mu Balak-e thudo mu tekuo dukhri pie ruosuo chü di puo chü ketsepie Balaam mu puo zeketuo kedinuoko tsüshü.

⁴¹Süsieduü Balak-e Balaam ze Baal thechü kerükrieko gei kho, sidi puoe sügeinu Israelmia kro puo ngu.