Read Angami Naga Nuolhoutsüphrü 23 Bible Online

Nuolhoutsüphrü 23 - Angami Naga bible

Nuolhoutsüphrü 23

¹Süsie Balam-e Balak ki, “Hakinu a la ruosuoba thenie chüshü di thudo thenie mu tekuo chü thenie keseshücie” ishü.

²Sitse Balak Balaam pukeshü kemhie chüshü sidi Balaam-e ruosuoba puo gei thudo puo mu tekuo chü puopuo idi pie rüsuochü.

³Süsie Balaam-e Balak ki, “No n kethe ruosuo khieki tha zolie, mu a votuo; Jihova vor a ze kese rei si mo; mu mha kehoupuo shierei puo tha a kiekeshüu a n ki pushütuo,” sidi puoe thechü kerükrie puo gei khota.

⁴Sitse Ukepenuopfüe Balaam ze kese, sitse Balaam sie puo ki, “A ruosuoba thenie chülie di ruosuoba puo gei thudo puo mu tekuo chü puopuo idi pie rüsuo” sishü.

⁵Sitse Jihova die puo pupie Balaam pese di, sie, “No la Balak ki vo di hakemhie pushü morosuo” sita.

⁶Sidi Balaam tuo la vor tse, harie, Balak-e Moabmia kezhako pete ze di puo kethe ruosuo khieki tha zo.

⁷Sitse Balaam-e puo dielieu pu di sie, “Balak-e Aram nunu a ze vor, Moabmia kediue niathutsa kijüthouko gei a ze vor: ‘Vorlie, a la Jakob rüpfhürüsewacie; mu vor di Israel pesüpemvüwacie!’ si.

⁸Ukepenuopfü rüsewa kemo-u a kiki di rüselie ta? Jihova pesüpemvüwa kemomia, a kikidi pesüpemvülie ta?

⁹Kekreilamonyü tsiekrie mezü geinu ae puo nguwe, mu kijüthouko geinu ae puo mehoshüwe; Harie ukoe u rübeikecü themia kro puo, seyieko nu uko sa mo.

¹⁰Jakob yie nyophe supuonie phrülie vi ta? Morei supuonie nyophe-kimhou[42] tuoi chüketa Israel phrülie vi ta? A bu miathomia puo se kemhie siatacie, mu a kela bu rei puo mhietacie!” sita.

¹¹Sitse Balak-e Balaam ki, “No a gei kedipuo chüshü ga? N bu a ngumvümia rüsetuoü di n ze vor, ru harie, no mhapuorei chüshü mo derei japie uko tsüwate” sita.

¹²Sitse puo sie, “Jihova khapie a tie nu keshüu a süu pu menuoshü morosuo mo me?” sita.

¹³Sitse Balak sie puo ki, “No uko ngulie kevi thechü kekrei puo nu a ze di vorlie, mu uko huoyo ngutuo, uko pete u ngulie lho, sidi a la uko rüsecie” sita.

¹⁴Sidi puoe puo ze Zofim lieu nu Pisga mezü gei vota, mu ruosuoba thenie chülie, di ruosuoba puo gei thudo puo mu tekuo chü puopuo idi pie rüsuochü.

¹⁵Sitse Balaam sie Balak ki, “N kethe ruosuobau khieki tha zoliecie, a vo lutsanu Jihova ze kesetuo mu” ita.

¹⁶Süsie Jihovae Balaam ze kese, mu mha pupie puo pese di, “Balak ki la volie, di no hakemhie pushücie” ishü.

¹⁷Süsie puo Balak ki la vor, mu harie, puoe Moabmia kezhako ze di puo kethe ruosuo khieki tha zo. Sitse Balak sie, “Jihova kedipuo pushü ga?” isi.

¹⁸Sitse Balaam puo dielieu pu di, “Balak, sie di rünyüliecie; Zipor nuou, a pfhe rünyüliecie:

¹⁹Ukepenuopfüe themia di tijüya mo, morei themianuo di puo nou rüdiya mo. Puoe phrashü di süu chü motatuo me? Morei puoe phrashü di chü tseishü motatuo me?

²⁰Harie, a bu jashünu di diekhakeshü nguliete; mu puoe jashüte, süla a süu rhüwalie kenjü.

²¹Puoe Jakob gei theruokesuo puorei ngulie mo; morei Israel gei kemezhieketuo puorei ngulie mo. Jihova uko Kepenuopfüe uko zetuo, uko donu kielieketa kedimia puo tuoi di.

²²Uko ze Ijipt nunu kepar Kepenuopfüe; uko la nha thudo kia mhie zo.

²³Themoumia die Jakob petsoukecü tuo mo, Israel petsoukecü thuophi tuo mo: Jakob mu Israel dze pu di, ‘Ukepenuopfüe uko la chükeshüko mehoshücie!’

²⁴Harie, themia doupuo Losha krüpfü mhiei sierzhie, mu losha chü mhiei puoe sieliete: Puoe puo chüte cülie kemochie zhü lhote, mu puo chüte zie krielie kemochie zhü lhote” sita.

²⁵Sitse Balak-e Balaam ki, “Uko rüse rei hie morei japie uko rei tsü hie” sita.

²⁶Derei Balaam lasie, “Jihova a ki kepu pete a chü morosuo ücü a n ki pu mo me?” si.

²⁷Süsie Balak-e Balaam ki, “Vorlie, a n ze la thechü kekrei puo nu la votuo, sünunu a la n bu uko rüseketuo Kepenuopfü medolie rei si momu” ita.

²⁸Sidi Balak-e Balaam ze kijü kesia[43] petsou keba Peor mezü gei kho.

²⁹Sitse Balaam-e Balak ki, “Haki nu a la ruosuoba thenie chülie, mu a la thudo thenie mu tekuochü thenie keseshücie” isi.

³⁰Sitse Balak-e Balaam kepu kemhie chüshü, sidi ruosuoba puo gei thudo puo mu tekuo chü puopuo idi ruosuo chüshü.