Read Angami Naga Nuolhoutsüphrü 26 Bible Online

Nuolhoutsüphrü 26 - Angami Naga bible

Nuolhoutsüphrü 26

¹Siro thepeu sie Jihovae Mosa mu Aron zievo nuou Eliazar unie ki,

²“Israelmia kro-u pete phrülie, terhü nu pralie kevi khe, u kelhouzha cie mepfü mu sü mhoko u pfutsanuo puopuo idi” sishü.

³Süla Jordan rü khie Moab kijü razha nu Jeriko nunu Mosa mu Eliazar zievo-u unie uko ki,

⁴“U kelhouzha cie mepfü mu sü mhoko phrüliecie” idi diekha pie Mosa mu Israelmia Ijipt nunu ta keparko ki pushü.

⁵Reuben, Israel nuo phichüu; Reubennuomiako; Hanok geinu Hanoknuomiako; Palu geinu Palunuomia

⁶Hezron geinu Hezronnuomia, Karmi geinu Karminuomia;

⁷Hako Reubennuomiako; mu uko phrükelie mia nyie hiediaese krie thenie di ser.

⁸Siro Palu nuosenuoyieko geinu Eliab vor.

⁹Mu Eliab nuonuoko: Nemuel, Dathan mu Abiram. Dathan mu Abiram hanieha, Kora kro-u Jihova petsou di Mosa mu Aron unie mhodzünu panyakecü ki, kehou kro-u nu kedakelie nie zo,

¹⁰mu kijüu mekuoshü di uko mu Kora sa mezulie di kro süu siata; süu va mia krie kenie di hiepengou siata; sidi uko pie thakie puo chüshü.

¹¹Derei Kora nuonuoko we siata mo.

¹²Simeon nuonuoko, mu uko kinumiako: Nemuel geinu Nemuelnuomia, Jamin geinu Jaminnuomiako, Jakin geinu Jakinnuomiako;

¹³Zera geinu Zeranuomiako, Shaul geinu Shaulnuomiako.

¹⁴Simeonnuomiako mia nyie mepfüekenie di krie kenie.

¹⁵Gad nuonuoko mu uko kinumiako hako: Zefon geinu Zefonnuomia, Hagi geinu Hagi nuonuoko; Shuni geinu Shuninuomiako.

¹⁶Ozni geinu Ozninuomia; Eri geinu Erinuomia;

¹⁷Arod geinu Arodnuomia; Areli geinu Arelinuomia.

¹⁸Gad nuomia hako: Gadnuomiako phrükelie mia nyie hiedia di krie pengou.

¹⁹Juda nuonuoko: Er mu Onan, Er mu Onan unie Kanan kijü nunu siata.

²⁰Siro Juda nuo kinumia hakoha: Shela geinu Shelanuomiako, Perez geinu Perez nuomiako, Zera geinu Zeranuomiako,

²¹Perez nuonuoe hako: Hezron geinu Hezronnuomiako, Hamul geinu Hamulnuomiako.

²²Juda nuomiako phrükelie nyie hiethenie sorou di krie pengou

²³Isakar nuonuoko hakoha: Tola geinu Tolanuomiako, Puva geinu Puvanuomiako,

²⁴Jashub geinu Jashubnuomiako, Shimron geinu Shimronnuomiako.

²⁵Isakar nuonuoko phrükelie mia nyie hiesorouedia di krie se.

²⁶Zebulun nuonuoko: Sered geinu Serednuonuoko, Elon geinu Elonnuomiako, Jahlil geinu Jahlilnuomiako

²⁷Zebulun nuonuoko phrükelie mia nyie hiesorou di krie pengou.

²⁸Josef nuonuoko: Manasseh mu Efraim;

²⁹Manasseh nuonuoko: Makir geinu Makirnuomiako, mu Makir nuou za Gilid; Gilid geinu Gilidnuomiako

³⁰Gilid nuonuo hako: Iezer geinu Iezernuomiako, Helek geinu Helek nuomiako

³¹mu Asriel geinu Asrielnuomiako; mu Shekem geinu Shekemnuomiako;

³²mu Shemida geinu Shemidanuomiako; Hefer geinu Hefernuomiako

³³Siro Zelofehad puo nuonuo thenumia sie thepfumia jü; mu Zelofehad nuonuo thenuko za hako: Mahla, Noah, Hogla, Milka, mu Tirza.

³⁴Hako Manasseh nuomiako mu uko phrükelie mia nyie hiepengouekenie di krie thenie.

³⁵Efraim nuomiakoe hako: Shuthela geinu Shuthelanuomiako, Beker geinu Beker nuomiako, Tahan geinu Tahannuomiako.

³⁶Siro hako Shuthela nuomiako: Eran geinu Erannuomiako

³⁷Efraimnuomiako phrükelie mia nyie serekenie di krie pengou. Hako Josef nuonuoko mu u kinumiako.

³⁸Benjamin nuonuoko: Bela geinu Belanuonuoko, Ashbel geinu Ashbel nuonuoko, Ahiram geinu Ahiramnuonuoko.

³⁹Shefufam geinu Shufufam nuonuoko, Hufam geinu Hufam nuomiako.

⁴⁰Siro Bela nuonuoko Ard mu Naman; Ard geinu Ardnuomiako, Naman geinu Namannuomiako.

⁴¹Hako Benjamin nuonuoko, mu uko phrükelie mia nyie hiediaepengou di krie sorou.

⁴²Hako Dan nuomiako: Shuham geinu Shuham nuomiako. Hako Dan nuonuoko.

⁴³Shuhamnuomia pete phrükelie mia nyie hiesorouedia di krie dia.

⁴⁴Asher nuonuoko: Imna geinu Imnanuomiako, Ishvi geinu Ishvinuomiako, Beria geinu Beriahnuomiako,

⁴⁵Beria nuonuoko: Heber geinu Hebernuomiako, Malkhiel geinu Malkhielnuomiako,

⁴⁶mu Asher nuopfü zae Sara.

⁴⁷Hako Asher nuomiako pete phrükelie mia nyie hiepengouese di krie dia.

⁴⁸Naftali nuonuoko: Jahzil geinu Jahzilnuomiako. Guni geinu Guninuomiako;

⁴⁹Jezer geinu Jezernuomiako, Shilem geinu Shilemnuomiako.

⁵⁰Hako Naftali[51] nuomiako mu uko phrükelie mia nyie hiediaepengou di krie dia.

⁵¹Israelko phrükelie mia nyie krie sorou nyie puo krie thenie di ser.

⁵²Jihovae Mosa ki,

⁵³Theza phrükelie medzi di uko kayie chüketuo la kijü kezapie uko tsütuo.

⁵⁴Seyie kekrau bu kayie kralie, mu ketsamia bu kayieu tsa di pie tsü morosuo: seyie kehoupuorei phrükelieu medzi di kayieu rei pie tsü morosuo.

⁵⁵Derei dape di kijüu we keza morosuo; pfutsanuoko medzi di uko bu kayieu lietuo:

⁵⁶Themia kra shierei tsa shierei dape nu parkelie mhie di kayieu kezatuo.

⁵⁷Levinuomiako phrükelie hako: Gershon geinu Gershonnuomiako, Kohat geinu Kohatnuomiako; Merari geinu Merarinuomiako.

⁵⁸Hako Levi kinumiako: Libninuomiako, Hebronnuomiako, Mahlinuomiako, Mushnuomiako, Korahitnuomiako mu Kohat-e Amram puou.

⁵⁹Amram kimiapfüe Jokebed Levi nuopfü. Ijipt nunu puo nuo pie Levi ketsüpfü mu Amram penuoshü; siro hapfü Aron mu Mosa mu unie üpfü Miriam penuoshü Amram tsü.

⁶⁰Siro Aron nuonuoko Nadab, Abihu, Eliazar mu Ithamar.

⁶¹Derei Nadab mu Abihu unie mi mesa kemo pie Jihova mhodzünu nu ruosuo kechü la siata.

⁶²Siro uko thepfumia u kelhouzha khrü puo nunu sümhoko phrükelie mia nyie mepfüese. Kekreilamonyü kayie puorei pie uko phruo mo, mu Israelko donu uko sa phrü moketa la.

⁶³Mosa mu Eliazar zievo-u Jordan rükhie Moab razha Jeriko kepetsou nunu Israelmia hakoha phrülie.

⁶⁴Derei Mosa mu Aron zievo-u Sinai rayha nunu Israelko phrükecü ki u phrükelieko miapuorei hako donu tuo mota.

⁶⁵Kekreilamonyü Jihova uko ki, “Uko rayha nunu siatatuo” icü la. Süla Jefune nuou Kaleb mu Nun nuou Joshua unie rübei sie uko miapuorei tuo mota.