Read Angami Naga Nuolhoutsüphrü 27 Bible Online

Nuolhoutsüphrü 27 - Angami Naga bible

Nuolhoutsüphrü 27

¹Süsie Zelofehad nuo thenuko vor: Zelofehad-e Hefer nuou, süue Manasseh nuou, süue Josef nuou, puoe Manasseh yiemia puo, puo nuo thenuko za hakoha: Mahla, Noah, Hogla, Milka mu Tirza.

²Ukoe vor Mosa mu Eliazar zievo-u, mu krütako mu kehou kro-u pete mhodzünu, kehou pfhekiu kicie mhodzünu thalie di sie,

³“Hieko puou rayha nunu siate, mu puoe Kora kro-u, Jihova ngumvü kesie kro-u nu tuo mo,

⁴derei puo thuo puo kephouma la siate: mu puoe puo nuo thepfumia jü. Puo nuo thepfumia kejü laü di kidi puo kinumia donu nu puo za pejütuo ga? Hie puonuo siezedzürieko donu nu kijü hie ya penyicie” sita.

⁵Sitse Mosa uko nyieu se vor Jihova mhodzünu shü.

⁶Sitse Jihova Mosa ki:

⁷Zelofehad nuopfüko mezhü zo; uko puo siezedzürieko donu nu kijü uko ya chü bei morosuo; sidi uko puou kayie pie uko tsü morosuo.

⁸Siro no Israelmiako ki: Mhanuü miapuoe siata mu puo nuo thepfumia jü ro niekoe puo kayie keyie pie puo nuopfü tsüwacie.

⁹Tsiu puo nuopfü rei jü ro, nie puo kayie pie puo siezedzürieko tsüwalie.

¹⁰Mu puo siezedzüriemia rei jü ro, puo kayie pie puo puo siezedzüriemia tsüwacie.

¹¹Siro puo puo rei puo siezedzüriemia jü ro puo kayie pie puosepuoyie puo kinumia puo kepenuotho tsüwacie, sidi puo bu süu pevieliecie. Siro Jihova Mosa ki diekhakeshü mhie, hau pie Israelko donu thezho puo chütuo.

¹²Süsie Jihova Mosa ki, “Abarim kijüthou hau gei kho di ae kijü pie Israelmiako tsükeshüu mehoshücie.

¹³Sidi no süu ngukeshü sie, n dzürieu Aron kemhie no rei n themiako ki volie morosuo.

¹⁴Kekreilamonyü Zin rayha nunu themia kro-u a perhiekecü ki, no rei dzü khieki uko mhingu kinu a chükemesakeshü dieu ze mvüte.” (Hau Zin rayha Kadesh nu Meriba dzüko.)

¹⁵Sitse Mosa Jihova ki,

¹⁶“Jihova, thephou peteko Ukepenuopfü bu mia puo kedapie themiako kro-u mhoshülie,

¹⁷süu bu uko mhodzü pra mu le, Jihovae uko bu tekuo puo kepfhe kejü tuoita molieketuo la” sishü.

¹⁸Sitse Jihovae Mosa ki, “Nun nuou Joshua ruopfü puo zeketuou zelie di n dzie pie puo tsü gei shüliecie.

¹⁹Puo bu Eliazar zievo-u mu themia kro-u mhodzünu thalie, di uko mhingu kinu mhatho-u pie puo peseshülie.

²⁰Siro Israelmia kro-u pete bu puo die zelieketuo la n kekuo khapie puo gei shüliecie.

²¹Sidi puo bu Eliazar zievo-u mhodzünu thalie, di Eliazar bu puo la Urim ketsokecü zho-u se Jihova ki ketsocie; puo mu Israelko pete puo sa di süusü themia kro-u pete puo die nunu pra mu letuo,” sita.

²²Siro Mosae Jihova diekhakeshü kemhie chülie, sidi Joshua ze vo Eliazar zievo-u mu themia kro-u mhodzünu thalie.

²³Sidi Jihova Mosa ki pukeshü mhie, puo dzie yhapie puo tsü geishülie di puo bu chüketuou pie puo peleshü.