Read Angami Naga Nuolhoutsüphrü 28 Bible Online

Nuolhoutsüphrü 28 - Angami Naga bible

Nuolhoutsüphrü 28

¹Jihova sie Mosa ki:

²Israelko ki die khashü di uko ki: A ruosuo, a ca la mi pie thepie ruosuokechüko, puore kethengu ruosuoko, no puotei touki chüshü morosuo.

³Siro no uko ki pushülie, Nieko mi pie the di Jihova rüsuo morokesuo sü haha: Teisonhie chü mekecü kethe ruosuo la, tekuonuo cie puoketa puochü kemesa kenienie setuo.

⁴No khise tekuonuo puo mu thevatie[52] kekreiu pie rüsuochü morosuo;

⁵süsie rei lhacülhale ruosuo la thou kevitho efa puo ker za puo pie thekelie tier hin dia za puo pie kereikecü pie chütuo.

⁶Hako puo rekethengu ruosuo mi nu thepie Jihova rüsuoketuo la Sinai kijüthou geinu pukeshü chüseiketuo kethe ruosuou we.

⁷Tsiu tekuonuo puo la hin dia za puo pie kekrie ruosuo chütuo; no kekrie ruosuo la kemesa chüu nu khubedzü kekuo la pie Jihova mhodzünu shütuo.

⁸Siro thevatie[53] no tekuonuo kekreiu pie ruosuo chü morosuo; khise lhacülhale mu kekrie ruosuo kechü mhie, no mi nu thepie puorekethengu ruosuo chüpie Jihova rüsuo morosuo.

⁹Sabat nhie tekuo chü cie puoketa kemesa kenie mu süu lhacülhale ruosuo la thou kevitho tier pie reikecü efa ker za kenie pie ruosuo chü morosuo.

¹⁰Teisonhie kethe ruosuo mu kekrie ruosuo kechü tsügei rei sabat metsei kethe ruosuo hau chü morosuo.

¹¹Siro nie khrülhou metsei thudonuo kenie mu tekuo chü puo, tekuonuo puochü cie puoketa kemesa thenie se kethe ruosuo chüpie Jihova rüsuo morosuo,

¹²süusü rei thudonuo puopuo la thou kevitho efa puo ker za se pie lhacülhale ruosuo chütuo, mu lhacülhale ruosuo la tier pie reikecü thou kevitho ker za kenie, se tekuochü puo la setuo,

¹³mu tier pie reikecü thou kememhie ker za puo pie tekuonuo puopuo la idi puore kethengu kethe ruosuochü di mi nu thepie Jihova rüsuo morosuo.

¹⁴Siro süko kekrie ruosuo khakeshü thudo puo la khubedzü hin puotie, tekuochü la hin se za puo tekuonuo puo la hin dia za puo morosuo, hauha teicie nu thekhrü metsei kethe ruosuou zo.

¹⁵Siro kethe ruosuo mu süu kekrie ruosuo chüpie Jihova tsü meyakezha sierei mvüdo puo se kephouma ruosuo chüpie Jihova tsü morosuo.

¹⁶Thekhrü kerieu zha keredia nhie Jihova ciekevonyi babatuo.

¹⁷Mu khrülhouzha kerepengou nhie thenyiute, mu zha thenie khreiüshükemo niekhrüda cütuo.

¹⁸Zha therie nhie kemesa kehou puo kehoutuo, mu nie hanhie mhapuorei chü suo,

¹⁹derei sünhie nie thudonuo kenie mu tekuo chü puo, mu cie puoketa tekuonuo puochü thenie se mi nu thepie kethe ruosuo chüpie Jihova rüsuo morosuo, hako mesa phre morosuo.

²⁰Tsiu hako lhacülhale ruosuo la tier pie reikecü thou kevitho setuo, thudo puo la efa ker za se, mu tekuochü puo la ker za kenie pie ruosuochü morosuo.

²¹Tekuonuo thenieko puo la ker za puo pie ruosuo morosuo;

²²siro n kejo vaketuo la mvüdo puo pie kephouma la ruosuochü morosuo.

²³Teisonhie chümeyakezha kethe ruosuou süusü khise kethe ruosuou sierei nieko ruosuo hakoha chü morosuo.

²⁴Hakemhie nie zha thenie la teisonhie puore kethengu ruosuo mi nu thepie ruosuokechü cau chüpie Jihova rüsuo morosuo teisonhie kethe ruosuo mu süu kekrie ruosuo sierei hauha chü morosuo

²⁵Siro zha thenie nhie nie kemesa kehoupuo kehoutuo; nie sünhie mhatho puorei chülie lho.

²⁶Siro deobado nyiko zha thenie nhie nie mhatho si kerieu pie lhacülhale ruosuo chüpie Jihova rüsuokecü nhie rei nieko kemesa kehou puo kehou morosuo; mu nie sünhie rei mhatho puorei chüsuo.

²⁷Derei thudonuo kenie tekuo chü puo, tekuonuo puochü cie puoketa thenie pie puore kethengu ruosuo la kethe ruosuo chüpie Jihova rüsuo morosuo.

²⁸Mu süko lhacülhale ruosuo la thou kevitho tier pie reikecü, thudonuo puo la efa ker za se, tekuo chüu la ker za kenie,

²⁹tekuonuo thenieko puo la ker za puo tuo;

³⁰mvüdo puo nie rhaketuo la se ruosuo chü morosuo.

³¹Teisonhie kethe ruosuou la mu süu lhacülhale ruosuou sierei nie süko mu kekrie ruosuo sa khashü morosuo. Hako pete khunuo kemesa se morosuo.