Read Angami Naga Nuolhoutsüphrü 29 Bible Online

Nuolhoutsüphrü 29 - Angami Naga bible

Nuolhoutsüphrü 29

¹Siro khrü thenieu zha puo nhie, nieko kemesa kehou puo kehou morosuo, sünhie nie mhatho puorei chü suo, sünhie nie la ketsüko khouketuo teisozha,

²mu thudonuo puo, tekuochü puo mu tekuonuo cie puoketa kemesa thenie se puore kethengu kethe ruosuo chüpie Jihova kishü morosuo;

³mu süko lhacülhale ruosuo la, thou kevitho tier pie reikecü, thudonuou la efa ker za se, tekuo chüu la ker za kenie;

⁴tsiu tekuonuo thenieko puo la ker za puo;

⁵siro nie phou chükemesaketuo la mvüdo puo pie kephouma ruosuo chü morosuo.

⁶Hako khrülhou ki kethe ruosuo, mu khapie ba meyakezha kethe ruosuoko, mu süko la lhacülhale ruosuo mu kekrie ruosuoko zokemo thezho rhüpie kebako medzi di khapie baketuo puore kethengu puo chü pie Jihova tsü ketuo mi ruosuokote.

⁷Siro khrü thenieu zha ker nhie rei nieko kemesa kehou puo kehou morosuo; sünhie nie mevotuo, nie mhatho puorei chü suo.

⁸Derei nie thudonuo puo, tekuochü puo, mu tekuonuo cie puoketa thenie se puorekethengu kethe ruosuo chüpie Jihova ki shütuo, süko bu mesa morosuo.

⁹Mu süko lhacülhale ruosuo la thou kevitho tier pie reikecü setuo, thudonuou la efa ker za se, tekuochüu la ker za kenie,

¹⁰tekuonuo thenieko puopuo la ker za puopuotuo,

¹¹süsie rei kephouma ruosuo la mvüdo puotuo, thephou chükemesa di kejovaketuo la kephouma ruosuo, mu teisonhie kethe ruosuou mu süu thou ruosuo, mu süko kekrie ruosuoko zokemo, hamho thukeshüko rei chü morosuo.

¹²Siro khrü thenieu zha kerepengou nhie rei nieko kemesa kehou puo kehoutuo; nie sünhie nie mhatho puorei chü suo, sidi nie zha thenie thenyi nyi pie Jihova tsütuo,

¹³mu thudonuo kerese, tekuochü kenie, tekuonuo cie puoketa keredia se puore kethengu kethe ruosuo chüpie Jihova tsü morosuo, mu hako pete mesa phre morosuo.

¹⁴Süko lhacülhale ruosuo la thou kevitho tier pie reikecü, thuodonuo kereseko puopuo la efa ker za se, tekuochü nie puo la ker za kenie,

¹⁵tekuonuo kerediako puopuo la ker za puotuo;

¹⁶teisonhie kethe ruosuo mu süu lhacülhale ruosuo, mu kekrie ruosuoko zokemo hamho thukeshüko rei chü morosuo.

¹⁷Zha kenie nhie: nieko thudonuo kerekenie, tekuochü kenie, tekuonuo puochü kemesa cie puoketa keredia pie ruosuo chü morosuo;

¹⁸mu thezho nu kemhie di thudoko mu tekuochü nie mu tekuoko, mu süko thou ruosuoko mu kekrie ruosuoko.

¹⁹Siro kephouma ruosuo la mvüdo, teisonhie kethe ruosuou mu süu lhacülhale ruosuoko, mu kekrie ruosuou zokemo hamho thukeshüko rei chü morosuo.

²⁰Zha se nhie: thudo kere puo, tekuochü kenie, tekuonuo teicie puoketa keredia, mu hako pete mesa morosuo,

²¹siro thezho nu pupie kezhü mhiei thudo, tekuochü nie mu tekuonuoko la lhacülhale ruosuo mu kekrie ruosuoko sa khashütuo;

²²tsiu kephouma ruosuo la mvüdo puotuo, hau pupie kezhü kethe ruosuou, süu la lhacülhale ruosuo mu kekrie ruosuo zokemo khashü ketuou.

²³Siro zha dia nhie thudo ker, tekuochü kenie, tekuonuo cie puoketa kemesa keredia,

²⁴mu thezho nu kemhie thudoko mu tekuochü nie, tekuonuoko la lhacülhale ruosuoko mu kekrie ruosuoko,

²⁵siro kephouma ruosuo la mvüdo puo, teisonhie kethe ruosuou mu süu lhacülhale ruosuou, mu kekrie ruosuou zokemo hamho thukeshüko rei chü morosuo.

²⁶Siro zha pengou nhie thudo thepfü, tekuochü kenie, tekuonuochü kemesa cie puoketa keredia;

²⁷mu thezho nu kemhie thudoko, tekuochü nie, mu tekuonuoko la thou ruosuoko mu kekrie ruosuoko;

²⁸mu kephouma ruosuo la mvüdo puo, teisonhie kethe ruosuou mu süu lhacülhale ruosuou, mu kekrie ruosuou zokemo hamho thukeshüko rei chü morosuo.

²⁹Siro zha sorou nhie thudo thetha, tekuochü kenie, tekuonuochü kemesa cie puoketa keredia,

³⁰mu thezho nu kemhie thudoko tekuochü nie, mu tekuonuoko la thou ruosuo mu kekrie ruosuoko;

³¹siro kephouma ruosuo la mvüdo puo; teisonhie kethe ruosuou, mu süu thou ruosuou mu kekrie ruosuou zokemo hamho thukeshüko rei chü morosuo.

³²Siro zha thenie nhie thudo thenie, tekuochü kenie, tekuonuochü kemesa ciepuoketa keredia,

³³mu thezho nu kemhie thudoko, tekuochü nie, mu tekuoko la lhacülhale ruosuo mu kekrie ruosuoko;

³⁴tsiu kephouma ruosuo la mvüdo puo, teisonhie ketheruosuo mu süu lhacülhale ruosuou mu kekrie ruosuou, zokemo hamho thukeshü rei chü morosuo.

³⁵Zha thetha nhie kerüsuo kehou batuo; sünhie nie mhatho puorei chü suo;

³⁶derei nie thudo puo, tekuochü puo, tekuonuochü kemesa cie puoketa thenie, pie puore kethengu ruosuo mi nu thepie Jihova rüsuo morosuo;

³⁷mu thezho nu kemhie thudo-u, tekuochü, tekuonuoko la lhacülhale ruosuo mu kekrie ruosuoko,

³⁸mu kephouma ruosuo la mvüdo puo, teisonhie kethe ruosuou mu süu lhacülhale ruosuou mu kekrie ruosuo zokemo rei hamho thukeshüko chü morosuo.

³⁹Nieko rüse la morei nie mianyü ruosuo zokemo nie kethe ruosuoko, lhacülhale ruosuoko mu kekrie ruosuoko, vitho ruosuo hako chü pie Jihova rüsuo morosuo.

⁴⁰Mosae Jihova puo ki diekhakeshü mhie mha pete se Israelko ki pu phreshü.