Read Angami Naga Nuolhoutsüphrü 3 Bible Online

Nuolhoutsüphrü 3 - Angami Naga bible

Nuolhoutsüphrü 3

¹Sinai kijüthou geinu Jihovae Mosa ze kerüchücü ki Aron mu Mosa unie seyieko hako:

²Hako Aron nuonuoko za: phichütho-u Nadab mu Abihu, Eliazar mu Ithamar.

³Hako Aron nuonuoko, puoe uko bu zievo mereibou nu mhachütuoü di kenhekelie zievoko.

⁴Derei Nadab mu Abihu unie Sinai nhatsa nu mesakemo mi se Jihova mhodzünu ruosuo kechü la siata; mu unie nuo jü phre. Siro Eliazar mu Ithamar unie unie kelhou ki puo puo Aron ze di zievo mhathoko chü.

⁵Siro Jihova Mosa ki:

⁶Aron zievo-u chaliechüketuo la, Levi yieko ze Aron mhodzünu vorlie.

⁷Sidi mechü kehou pfhekiu mhodzünu uko bu rüsuopfhekiu nu mhathoko chü di, puo la mu mechü kehou la morokesuoko chütuo.

⁸Siro kehou pfhekiu nu mhatho pete se uko peletuo, mu Israelmiako la morokesuo mhathoko chütuo.

⁹Siro no Leviko pie Aron mu puo nuonuoko tsüwa morosuo; Israelmiako donu uko pie puo tsü tseiwa morosuo.

¹⁰Mu no Aron mu puo nuonuoko keda kreilie, uko bu zievo mhathoko chülieketuo la; derei kekreimia süki penuo kevormia dukhrituo.

¹¹Siro Jihova Mosa ki:

¹²Harie, ae Israelmiako donu nuorieko pete sounu Leviko lieliete. Süla Leviko sü a vie zo.

¹³Kekreilamonyü nuorieko pete a vie zocü la; Ijipt kijü nu ae nuorieko pete dukhrikewa nhie, a vie chütuoü di Israel nu nuorieu pete chü kemesaliete, themia rei mu khunuo rei, uko sü a vie zo: Ae Jihova zo.

¹⁴Siro Jihovae Sinai nhatsa nunu Mosa ki:

¹⁵No Levi nuomiako phrüliecie, u pfutsanuo puopuo idi, thepfumia khrü puo mu sümhoko phrüliecie.

¹⁶Süla Mosae Jihova puo ki diekhakeshü mhie di uko phrülie.

¹⁷Levinuomia za hako Gershon mu Kohat mu Merari nuonuo kinumiako za,

¹⁸mu Gershon nuonuo kinumia za hako; Libni mu Shimei.

¹⁹Siro Kohat nuonuo kinumiako: Amram mu Izhar, Hebron mu Uziel.

²⁰Mu Merari nuonuo kinumiako: Mahli mu Mushi. Levinuomia pfutsanuomia hakoha.

²¹Libnimia kinumiako mu Shimeitmia kinumiako Gershon yiemia, Gershonmia kinumia hako:

²²thepfumia khrü puo nunu süki kephichüko phrükecü nyie thenie di krie pengou phrülie.

²³Gershonmia kinumiako bu rüsuo pfhekiu pethoutuo.

²⁴Mu Lael nuou Eliasaf-e Gershonmia pfutsanuomia krütau.

²⁵Siro Gershon nuonuoko pelekeshü mhathoko liro, kehou pfhekiu nu vo rüsuopfhekiu süu kewheu mu kehou pfhekiu keya pfhe pete.

²⁶Mu kiluobouu nu keya pfheko, kiluobou kicie, pfheu rüsuopfhekiu nu ruosuobau khie lutsa kezhako mu sünu seyakezha keroko pete uko bu mehotuo.

²⁷Siro Amrammia kinumiako mu Izharmia kinumiako, Hebronmia kinumiako, Uzielmia kinumiakoe Kohat yiemia.

²⁸Kohatmia kinumiakoe hako: thepfumia khrü puo nunu süki kephichüko phrükelie pete nyie thetha di krie sorou, uko bu kemesa chüu pfhetuo.

²⁹Kohat nuonuo kinumiako bu rüsuopfhekiu pekhro tsatie nu uko pfheki pethoutuo.

³⁰Mu Uziel nuou Elizafan, Kohat nuonuo kinumiako donu krütau.

³¹Uko bu dietseidiekhopie kezhü bouu mu mizhüu mu mitubou mu ruosuobako mu kemesa chü nu seyakezha mhabouko mu keyapfhe mu se süu chüyakezha mha pete mehotuo.

³²Siro Aron zievo-u nuou Eliazar bu Levimia krütako mhokezha chütuo, sidi puo bu kemesa chüu nu kemehoko mho kemeho-u chütuo.

³³Mahlitmia mu Mushitmiae Merari kinumia: Merari kinumia hako:

³⁴Uko thepfumia khrü puo nunu sümhoko phrükelieko nyie sorou di krie kenie.

³⁵Siro Abihail nuou Zuriel-e Merari nuonuo kinumiako kezhau: uko bu rüsuopfhekiu pesotsa uko pfheki pethou di batuo.

³⁶Tsiu Merari nuonuoko bu rüsuopfhekiu melako puo kitheko, puo coko, cokhreko, sünu se mhachüyakezha nyako pete mu sünu mhatho pete chütuo.

³⁷Siro kiluobou lutsahatsa coko, cokhreko mu puo kezhieko mu puo roko mehotuo.

³⁸Siro Mosa mu Aron mu puo nuonuoko bu rüsuopfhekiu niathutsa kehou pfhekiu niaki kepar kepetsou tsanu uko pfhekiu pethoutuo, sidi uko bu kemesa chüu nu Israel nuonuoko kemeho chütuo; mu kekreimia süu penuo kevormia dukhriwatuo.

³⁹Jihova diekhakeshü ze di Mosa Aron unie Levimia u kinumiamia di thepfumia khrü puo nunu sümhoko pete phrükelieko nyie mepfüekenie.

⁴⁰Jihovae Mosa ki, Israelmia donu thepfu nuorieko pete phrülie, khrü puo nunu sümhoko di uko za thu phreliecie.

⁴¹Sidi no a la Leviko lieliecie. Ae Jihova zo. Israelmiako donu nuorieko pete sounu mu Israel perinuoko donunu nuorieko pete sounu Leviko perinuoko lieliecie.

⁴²Sitse Mosae Jihova puo ki diekhakeshü tuoi Israelko donu nuorieko pete phrülie.

⁴³Mu thepfunuomia nuorieko pete phrükelieko nyie mepfüekenie di krie kenie di hiethenieese.

⁴⁴Süsie Jihovae Mosa ki:

⁴⁵Israelko donu nuorieko pete sounu Leviko lielie mu uko perinuoko sounu Leviko perinuoko lieliecie; sidi Leviko pie a vie chütuo: Ae Jihova zo.

⁴⁶Siro Israelmia nuorieko krie kenie di hiethenieseko mu Leviko sükezie pete rhaketuo la.

⁴⁷No kemesachü nu shekel-u se di shekel puo gera mepfü, mia puo sounu shekel pengoungou seliecie.

⁴⁸Sidi no kerükrüko rhaketuo raka pie Aron mu puo nuonuoko tsüshücie.

⁴⁹Sitse Mosa Leviko bu u souchü di rhakelieko zie kebako rhaketuo rakau lielie.

⁵⁰Puoe kemesachü shekel nu le di shekel nyie puo, krie se di hiesorouepengou; Israelko nuorieko lielie.

⁵¹Sidi Jihova Mosa ki diekhakeshü tuoi di rhaketuo rakau pie Aron mu puo nuonuoko tsüshü.