Read Angami Naga Nuolhoutsüphrü 31 Bible Online

Nuolhoutsüphrü 31 - Angami Naga bible

Nuolhoutsüphrü 31

²“Israelmiako bu Midianmia gei u khepuliecie, süsie n ze n themiako ki votatuo” sita.

³Sitse Mosae themiako ki, “Terhü chüketuo la themia keseliecie, uko bu Midianmia whuoketuo la Jihova khepu noupfhüu pie Midianmia gei shüketuo la.

⁴Nie Israel seyie pete nunu seyie puo mia nyie puopuokecü ketse pie terhü nu shü morosuo.”

⁵Süla Israelmia nyie kekra donu nu, seyie puo nu mia nyie puopuo di mia nyie kerekenie bu terhü nu voketuo la keselie.

⁶Sidi Mosae seyie puo nu mia nyie puopuo ketsepie terhü nu shü, mu Eliazar zievo-u nuou Finehas bu kemesa chü nu mhanyako mu kemichie kevor ki khoushüketuo la ketsüko se puo dzie nu pie di uko ze terhü nu vo.

⁷Sidi ukoe Jihova diekhakeshü mhie, Midian ze kegei di thepfumia khe dukhriwa.

⁸Ukoe terhü nunu dukhrikewa kekreiko sa di Midianmia kedi pengou hako rei sa dukhriwa: Evi, Rekem, Zur, Hur, mu Reba; siro ukoe zhiecha pie Beor nuou Balaam rei dukhriwa.

⁹Siro Israelmiakoe Midianmiapfüko mu uko nuonuoko tepie uko die chülie mu uko kiri pete, thu kro pete mu uko vienya pete ketalie.

¹⁰Siro uko lhoukeba nadi pete mu uko kudako mi pie the phrewa,

¹¹derei uko themiako khunuoko zo we tezeta mu mhanya rei ketalie.

¹²Sidi ukoe kedie tekelieko mu khurinuo tekelieko mu mha ketakelieko se Moab razhau nu Jeriko nunu razhüchü kebau nu Mosa, zievo-u Eliazar mu Israelmia mechü ki vor.

¹³Sitse Mosa, Eliazar zievo-u mu themiakro-u krütakoe razhüchü nunu par di uko ze kese.

¹⁴Sitse Mosae rüpfhünuo mhokezhako, nyie mhokezhako mu krie mhokezhako terhü nu vo di la kevorko gei puo nei mota.

¹⁵Mosae sie uko ki, “Nieko thenumia pete perheishü zo me?

¹⁶Thenu hako Peor (nu mhachü ketau) nyieu nu Balaam chatha ze di Israelmiako chüpie uko bu Jihova ngumvü sieta, di thesau bu Jihova kehou nu vorta zo.

¹⁷Süla tsie thepfunuo kecüko pete dukhriwalie mu thenumia thepfumia zewaketa pete dukhriwalie.

¹⁸Derei thenunuomia thepfu ze moluokecü pete nie la khapie baliecie.

¹⁹Siro nieko zha thenie razhüchü khie ba morosuo; kehoupuorei mia dukhrikecümia, mu kehoupuorei kesia mo biekecümia zha se nhie mu zha thenie nhie nie thuo nie chü kemesalie morosuo, nie rei mu nie diemiako rei sa.

²⁰Siro pfhenei chüzhü pie kechü pete mu temvümie pie kechü pete, mu sei pie kechü vie pete chü kemesalie morosuo.”

²¹Siro Eliazar zievo-ue terhü nu kevo themiako pete ki, “Jihova Mosa ki thezho khakeshü hauha:

²²Suna rakachü, merenyi, thegi, tinyü, mu guli shierei,

²³mha kehoupuorei mi nu tutalie kelho vie pete nie the di süu chü kemesatatuo; sizomonyü kerhu chükemesakecü dzüu rei pie chü kemesa morosuo: mu mi nu tutalie kevi pete nieko dzü pie chü kemesa morosuo.

²⁴Siro zha thenie nhie nieko pfhe menyiwa morosuo, sitse nie mesalietuo; süzenu nieko bu razhüchü nu letuo.”

²⁵Jihova Mosa ki,

²⁶“No mu Eliazar zievo-u mu kehou pfutsanuo thekrüko, nieko themia rei khunuo rei tekelieko kidepuo shiü phrüliecie;

²⁷sidi süko keza kenie chülie, tietsa pie vo terhü kegeikecüko tsü mu tietsa pie themiakro-u pete tsücie.

²⁸Siro terhü nu kevo themiako ya tsatie nu themia rei, thudo rei, gada rei, mu temvü tekuo rei krie pengou nu puopuokecü pie Jihova tsücie.

²⁹Uko ya tsatie se Jihova ki ruosuo chüshüketuo la süko chüpie Eliazar zievo-u tsüshücie.

³⁰Tsiu Israelmiako vie tsatie, themia rei, thudo rei, gada rei mu temvü tekuo rei, khurinuo pete hiepengou gei puopuokecü no selie di pie Jihova rüsuokiu seyakezha Leviko tsüshücie” sita.

³¹Sitse Mosa mu Eliazar zievo-u unie Jihova Mosa ki diekhakeshü kemhie chülie.

³²Terhümiako mhanya ketakelieko, khurinuo mu themia tekelieko kesa: tekuo lakh sorou di nyie hietheniepengou,

³³thudo nyie hietheniekenie

³⁴gada nyie hiesorouepuo,

³⁵mu thenumia thepfumia zekemo pete nyie serekenie,

³⁶siro terhü nu keprako vietsatie phrükelie temvü lakh se nyie serethenie di krie pengou

³⁷mu Jihova ketsü temvüko krie sorou di hietheniepengou.

³⁸Siro thudoko nyie seresorou; mu Jihova ketsüko hietheniekenie.

³⁹Mu gadako nyie ser di krie pengou; mu Jihova ketsüko hiesorouepuo.

⁴⁰Mu themiako nyie keresorou; Jihova ketsüko mia serekenie.

⁴¹Tsiu Jihova Mosa ki diekhakeshü kemhie Mosae süko se ruosuo chüpie Jihova tsüketuoko pie Eliazar zievo-u tsüshü.

⁴²Siro Israelko yatsatie, süusü Mosae terhü kegeikecüko ze kezakeshüko,

⁴³tsie themia kro-u yatsatie temvü lakh se nyie serethenie di krie pengou,

⁴⁴thudo nyie seresorou,

⁴⁵gada nyie ser di krie pengou,

⁴⁶mu themia nyie keresorou,

⁴⁷Jihova diekhakeshü mhie Israelko yatsatie nu Mosae themia rei khunuo rei hiepengou geinu puopuokecü liepie Jihova rüsuoki mehoyakezha Leviko tsüshü.

⁴⁸Süsie rüpfhünuo nyienyie mhokezhako mu nyie mhokezhako mu krie mhokezhako Mosa penuo vor,

⁴⁹puo ki, “N kituokoe terhü nu kepra themia hie khro ketuoko phrü phreliete mu miapuorei jüta mo.

⁵⁰Tsiu hieko se Jihova tsüketuo ruosuou se vorya, di hie phou chükemesaketuo la, hie kehoupuorei ngukelie suna piekechü thegi phikha roko, kethuoko, dziekhako mu cümenyieko se vorzhie” sishü.

⁵¹Sitse Mosa mu Eliazar zievo-u unie suna pie kechü vienya süko pete lielie.

⁵²Siro suna pie Jihova rüsuotuoü di nyie mhokezhako mu krie mhokezhako kinu ngukelie pete shekel nyie keresorou krie thenie di hiepengou.

⁵³(Terhü nu keprako u thuo u lala di mha ketakelie la.)

⁵⁴sidi Mosa mu Eliazar zievo-u unie nyie mhokezhako mu krie mhokezhako kinu sunako lielie di Israelko la kerükra mhatho puo chütuoü di süko se kehoupfhekiu nu Jihova mhodzünu vorshü.