Read Angami Naga Nuolhoutsüphrü 32 Bible Online

Nuolhoutsüphrü 32 - Angami Naga bible

Nuolhoutsüphrü 32

¹Siro Reuben yiemiako mu Gad yiemiako mithu nyi phi ru harie, ukoe Jezer kijü mu Gilid kijü khurinuo la viketuo kijü ngushü,

²süla Gad yiemiako mu Reuben yiemiako vor Mosa mu Eliazar zievo-u mu themia kro-u krütako ki,

³“Atarot, Dibon, Jazer, Nimra, Heshbon, Eliale, Sebam, Nebo mu Beon,

⁴Israel kro-u mhodzünu Jihova penyükeshü kijü hako khurinuo la viketuo, mu n kituokoe uko kicükiri nyi” sishü.

⁵Sidi ukoe sie, “Hie n mhi ki n khriepfülie üro, kijü hau pie n kituoko phruoshüwacie, di hie bu Jordan cie pra hietacie” sita.

⁶Derei Mosae Gad yiemiako mu Reuben yiemiako ki, “Nie siezedzürieko terhü nu vo mu nie bu haki rülei batatuo me?

⁷Siro Israelko Jihova khapie uko ketsü kijü nu votuoü kezhü nie kiüdi uko melou chü pesuoya ga?

⁸Ae Kadesh-barnia nunu nie puonuoko ketsepie kijü mehokeshü ki uko rei hamhieta.

⁹Kekreilamonyü ukoe Eshkol razha nu kho di kijü kengu ki, ukoe Israelmiako bu Jihova kha uko ketsü kijü nu vo moketuo la uko melou chü pesuowa.

¹⁰Sünhie uko Jihova nou va kerüpewa di puo bu rüse di sie,

¹¹‘Ijipt nunu takepar themia u kelhouzha cie mepfü mu sümhoko bu ae Abraham, Isak mu Jakob ki rüse pie kezhü kijüu ngulie lhote, kekreilamonyü ukoe a siemedzituo mote;

¹²Jihova siemedzi toukelie Kenizmia Jefune nuou Kaleb mu Nun nuou Joshua unie zo kemosie’ siwa.

¹³Mu Jihova bu Israel gei puo nou rüpeta di Jihova mhodzünu mhakesuo chükewa thephou pete jüta kemochie puoe uko bu cie hiedia nha nu whituota.

¹⁴Mu harie kephouma themiako, nie puonuoko sounu niekoe sier, Jihova nou vakerüpe sa pie puo bu Israel petsoute.

¹⁵Kekreilamonyü nie puo siemedzi mo di rüreita ro, puoe rayha nunu nie khawa di nie la themia hako pete pekawatuo” sita.

¹⁶Sitse ukoe puo ki vor di sie, “Thechü hau nunu hie khurinuo bou houtuo, mu hie hie nuonuoko la nadi chütuo,

¹⁷derei hie we Israelmiako ze vo uko ba nu tsoshü kemochie, uko mhodzünu voshütuoü hie rünyie kese seba zo, mu kijü hau nu kelhouko la kuda houshü di hie nuonuo bu batatuo.

¹⁸Israelmiako kijü u phruo ngu phrelie kemochie hie la hie kinu vortalie lho zo.

¹⁹Siro Jordan niathu hatsatie nu kijü hie ya ngulieketa la, hie Jordan rü lutsa khie we uko ze kijü pevielie lho,” sita.

²⁰Süla Mosa sie uko ki, “Mhanuü nie mhahako chülietuoü, nie rünyie se terhü la Jihova mhodzünu phishütuoü ro,

²¹nie rünyie kese khe Jordan rükhie cie vo Jihova mhodzünu ngumvüko pete whuowa di kijüu lielieta ro,

²²süze nieko bu la votatuo, sitse Jihova mhodzü rei mu Israel mhodzü rei nieko kejo jütatuo; sidi nie bu kijü hau pie nie vie chülietuo.

²³Derei nie sükemhie chülie moro, harie, nie Jihova mhodzü phoumate, mu nie kephouma thuo nie pfhüshüketuo si touliecie.

²⁴Nie nupfünienuo la nadi chülie mu nie kuoko bou houliecie, derei nie phrakeshü mhie chülie” sita.

²⁵Sitse Gad mu Reuben yiemiako sie, Mosa ki, “Hie Jihova diekhakeshü mhie chü zotuowe.

²⁶Hie nuonuo mu hie nupfünuoko hie kuo hie mvü mu hie thu hie riko Gilid nadi nu khapie batuo;

²⁷derei Jihova kepu mhie n kituoko we terhünyie kese pete Jihova mhodzü terhü kegeiketuo la pratuo” sishü.

²⁸Süla Mosae uko dze pie Eliazar zievo-u, mu Nun nuou Joshua, mu Israelmiako pfutsanuo krütako ki pushü.

²⁹Sidi Mosae uko ki, “Gad yiemiako mu Reuben yiemiako rünyie kese pete Jihova mhodzünu vo terhü kegeiketuoko ki nieko ze Jordan cievo di kijü lieshü nieko tsü ro nie-e uko bu Gilid kijü pie uko vie chüketuo la pie uko tsü morosuo;

³⁰derei ukoe rünyie se di nieko zepra moro, uko bu rei Kanan kijü nu nieko donu uko rüvie nyi zotuo,” sita.

³¹Sitse Gad yiemiako mu Reuben yiemiako sie, “Jihova n kituoko ki kepu kemhie hieko chüüze zotuo.

³²Hie rei hie rünyie se di Jihova mhodzünu, Kanan kijü nu votuo derei kijü hie ya we Jordan hatsa khie zotuo” isita.

³³Süsie Mosae Ammonmia kediu Sihon, mu Bashan kediu Og rüvieko, kijü mu nadiko, mu sükhiesümhou rüna pete khapie Gad yiemiako, Reuben yiemiako mu Josef nuou Manasseh yiemia tietsa tsüwa.

³⁴Sitse Gad yiemiakoe Dibon, Atarot, Aroer,

³⁵Atroth-Shofan, Jazer, Jogbeha,

³⁶Beth-nimra, mu Beth-haran, rünako chü lalie di kudako pfhe mu uko kuoko bou chülie.

³⁷Siro Reuben yiemiako Heshbon, Eliale, Kiriathaim,

³⁸Nebo mu Baal-meon (süko za kediwa) rünako mu Shibma nadiko chü lalie sidi uko rüna chükelieko zatho pekreiwa.

³⁹Siro Manasseh nuou Makir nuomiako Gilid nu vo di süu lielie, di sünu keba Amorko whuowa.

⁴⁰Mu Mosa Gilid se Manasseh nuou Makir tsüwa, sidi puo bu sünu rüna chübata.

⁴¹Sitse Manasseh nuou Jair-e vo di sünu rünako lielie di süko üse Havot-Jair[55] üdi kielie.

⁴²Mu Noba-e vo di Kenath mu sünu rünako lielie, sidi rüna süu zatho pie puo za kemhie Noba üdi kielie.