Read Angami Naga Nuolhoutsüphrü 35 Bible Online

Nuolhoutsüphrü 35 - Angami Naga bible

Nuolhoutsüphrü 35

¹Süsie Jordan rükhie Moab kijü razha Jeriko nunu Jihova Mosa rüchü di sie,

²Israelko ki pushülie: Leviko bu lhouketuo la nieko phruokeshü kijü nunu rünako, mu uko khurinuo la rünako khieümhouko kijü khapie perituo la kijü kha Leviko tsüshülie.

³Sidi uko bu nadiko nu mu puokhiepuomhouko nu uko thu, uko kicükiriko mu uko khunuoko bu tuotuo.

⁴Siro rüna khieümhouko pie Leviko tsüketuoko, rünau chazoutsa cahou sozha nunu lutsa thu nyie puo ketsotuo.

⁵Siro nieko rünau bu puo metsuo nu mu chazou rie nunu mejü di niathutsa thu nyie kenie, mu pekhrotsa thu nyiekenie, mu kisietsa thu nyie kenienie mu pesotsa thu nyie kenieniecü mejüliecie. Hako pie uko rünako thutuo chütuo.

⁶Siro nie rünako pie Leviko tsüketuoko rünako liro nadi hiediaekenie, mu süko mia kedukhrimia bu ta volie kevi themou nadi sorou sa.

⁷Nieko rüna pie Leviko tsüketuo pete kesa hiediaethetha; mu puokhie puomhouko satuo.

⁸Mu Israelko rüvie nunu nie rüna pie uko tsüketuo hamhie; kekra seyieu kinu lie pekra; mu ketsa seyieu kinu lie petsa morosuo; kehoupuorei puo phruo kijü ngukelie kemhie di puo rünako pie Leviko tsü morosuo.

⁹Süsie Jihova Mosa ki:

¹⁰Israelko ki pushülie: Nie Jordan cie se Kanan nu kele ki,

¹¹biejobiemou nunu mia dukhrikewa mia bu ta volie ketuo la rüna huo pie themou kechü rüna chüketuo kedalie morosuo.

¹²Sidi themou rünako nu mia kedukhrimia bu themia kro-u mhodzünu tha di puo nyiekecü kemochie puo khepu dzie nunu sia molieketuo la themou nadi hako batuo.

¹³Nieko rüna khakeshüko donu rüna sorou pie themou nadi chütuo.

¹⁴Jordan rü lutsa khie rüna se mu Kanan nu rüna se khapie themou nadiko chütuo.

¹⁵Kehoupuorei biejobiemoulie di mia dukhrikewau bu ta vo balieketuo la Israelko la rei mu chazoumia la rei, mu mia kekreimia uko donu lhouketuomia la rei rüna sorou hako pie themou nadi chütuo.

¹⁶Derei mia kehoupuorei theginya se mia puo vüshü, mu süu siata ro, puoe mia kedukhrimiata zo: mia kedukhriu bu sia petuo zotuo.

¹⁷Morei mia puoe ketsie pie mia va di vakhriwa ro, puoe mia kedukhrimiata zo, mia kedukhrimia bu sia petuo zotuo.

¹⁸Morei mia puoe sei pie mia vü di vükhriwa ro, puoe mia kedukhrimiata zo: mia kedukhrimia bu sia petuo zotuo.

¹⁹Thezie khepukelieu thuo mia kedukhriu dukhriwa morosuo; puoe puo ze kesekelie ki, puo dukhriwatuo.

²⁰Tsiu mia puoe mia ngumecü di mia neshü morei mia chadzeba di mha kelhou pie mia va di süu bu siata.

²¹Morei puo ngumvü nu puo vüshü di puo bu siata ro, mia vükhrikewau bu sia petuo zotuo, puoe mia kedukhrimiata zo; thezie khepukelieu bu mia kedukhriu ze kesekelie ki puo dukhriwatuo.

²²Derei mia puoe ngukemvü nu mo di lekemo nunu mia puo neshü morei puo chadzeba mo di mha huo kelhoupie puo vawa,

²³morei ngu mo di ketsie kelhou pie mia puo vakhriwa zoürei, puoe puo ngumvü morei puoe chü nyü di chü kemosie,

²⁴kehouu bu thezho hako ze di mia kevüu mu thezie khepukelieu unie capi chü morosuo.

²⁵Sidi kehoue thezie khepukelieu dzie nunu mia kerheiro pevokewau kelalie morosuo, mu süsie kehoue puo ze vo themou rünau nu shüwatuo: sidi kemesa tier pie puo kenhelieketa phichükezhau se ketso puo bu sünu bata morosuo.

²⁶Derei themoukechü kehoupuorei ta vo keba rüna sie pra,

²⁷mu khepukelieu bu cahou sienu puo ngulie di puo dukhriwata zo rei, puo bu phoumalie lho.

²⁸kekreilamonyü phichü kezhau siata kemochie themouu rünau nu bakecü mesekecü la, derei phichü kezhau se sie mia kedukhriu bu puo rüvie puo kijü nu la votalie vi.

²⁹Siro nie nuosenuoyie pete la nie kehoura lhouba shierei hakoha pie nie la chü morosuo.

³⁰Mhanuü mia puoe mia dukhriwa, mu mia kenie kese tie nunu dukhrikewa zhapu ngulie ro puo pie kesia nushü zotuo, derei zhapu puo rübei la we, mia puo bu rei sialie lho.

³¹Sizomonyü nie bu mia kedukhrimia sia zhükecümia kerheiro rhalie kenjü, puo bu sia petuo zotuo.

³²Siro nie rhakelie ma lielie di themou nadi nu voketau bu zievo-u siata kemo nu la vo puo kijü nu lhou lalie lho.

³³Nie lhou keba kijü vaperhu hiecie, kekreilamonyü thezie-e kijü perhuwaya, mu thezie pekrupie va perhukewa kijüu rhalie kenjü. Mia zie pekrukeshüu zie zo kemosie.

³⁴Nie lhou keba kijüu nu a rei lhou ba, süu chü perhuwa hiecie, kekreilamonyü ae Israelmiako donu lhou bayakezha Jihova zokecü la.