Read Angami Naga Nuolhoutsüphrü 36 Bible Online

Nuolhoutsüphrü 36 - Angami Naga bible

Nuolhoutsüphrü 36

¹Josef chienuomia, Manasseh nuo Makir, Gilid nuo kayiemia thekrükoe Mosa mu Israel krütako mhodzünu vor di sie;

²“Jihovae a niepuu bu dape di kijü kezapie Israelmiako tsünu, mu Jihovae a niepuu bu hieko siezeu Zelofehad kayieu pie puo nuo thenuko tsüshünu di die khashü.

³Derei ukoe Israelmia donu seyie kekrei huo ki nyita ro, hie pfutsanuo kayie nunu uko kayie se uko nyhü voketa kayieu nu votatuo; sükemhie di hie pfutsanuo kayie kijü huo pie mia tsüwatuo.

⁴Siro Israelmia Jubilee teiu kevor ki, uko kayieu pie uko nhyü vo mia phou chüketa seyieu kayie sa kesalietuo, sidi hie pfutsanuo kayie kijü nunu uko kayie kijüko se tatie” sishü.

⁵Sitse Mosae Jihova diekhakeshü mhie pie Israelmiako ki pu di sie, “Josef nuonuoko kepuu puo tou zo.

⁶Zelofehad nuo thenuko la Jihova diekhakeshü haha; ‘Uko bu uko medomia ki nyilie vi, derei uko puo seyiemia rübei ki nyi morosuo.

⁷Israelko kayie kedi se seyie kekrei nu vota moketuo la, kekreilamonyü Israelmiako kehoupuorei u thuo u pfutsanuo kayieu seba morosuo.

⁸Siro Israelmia kehoupuorei u thuo u pfutsanuo kayieu sebalieketuo la, Israelmia donu kayie u vie kenyipfüko bu u thuo u puonuo seyiemia ki nyilie morosuo.

⁹Sidi kayie kijü bu pfutsanuo puo nunu kekrei puo nu vota molietuo; Israelmia kehoupuorei u thuo u pfutsanuo kayieu seba morosuocü la’ ” sita.

¹⁰Zelofehad nuo thenuko Jihova Mosa ki diekhakeshü mhie chülie.

¹¹Sidi Zelofehad nuo thenuko, Mahla, Tirza, Hogla, Milka mu Noah, hakoe uko puonuo siezedzürie nuonuoko ki nyilie.

¹²Ukoe Josef nuou Manasseh nuonuoko pfutsanuomia ki nyilie di uko kayie bu uko pfutsanuomia kayie nu balie.

¹³Jihovae Jordan rü khie Moab kijü razha nu keba Jeriko nunu Mosa ki thezho mu diekhapie Israelko tsükeshüko hakoha zo.