Read Angami Naga Nuolhoutsüphrü 4 Bible Online

Nuolhoutsüphrü 4 - Angami Naga bible

Nuolhoutsüphrü 4

²Levi nuonuoko donu Kohatmia u pfutsanuo mu u kinumia idi kedithede ba shiü phrüliecie.

³Kehou pfhekiu nu mhachüketuo la, mhachülie kevi le di u kelhouzha cie ser nunu kho cie hiepengou ketso phrüliecie.

⁴Hako kehou pfhekiu nu Kohatnuomia mhatho: Kemesatho vieko zo.

⁵Razhüchüu keyieketuo ki, Aron mu puo nuonuokoe kinu le di kikha keya pfheu biepie dietseidiekho bouu[5] whelietuo.

⁶Sidi süu mhogei kememhie chüzhü pie whelie mu sümhogei pfhe keloshü phrekecü se whelie di pie puo phiko nu pie balie.

⁷Mu Kepekie Niekhrüda mizhü gei uko bu pfhe keloshükecü puo khrashü di sügeinu khoudako, mekhouko, dzieteikhouko pie mha theyakezha tehieko mu süu mhogei Kepekie Niekhrüdau khapie balietuo;

⁸süsie süu mho pfhe kemerie puo khrashü di kememhie chüzhü pie whelie di se puo phiko nu pie balietuo.

⁹Siro uko bu pfhe teimeziekecü puo selie di pie mitubako, puo mitubouko, puo mikreiko, puo mikreibouko mu uko seyakezha tierko pete whelie;

¹⁰sidi uko bu süu mu süu mhabouko pete kememhie chüzhü pie whelie di se puo ba gei pie balietuo.

¹¹Mu uko bu pfhe teimeziekecü puo pie suna pie kechü ruosuobau gei khrashü di chüzhü pie whelie, sidi se puo phiko nu pie balietuo.

¹²Mu ukoe kemesachüu nu se mha chüyakezha mhabou pete selie di pie pfhe teimeziekecü puo nu shülie, sidi chüzhü kemene se whelie di pie puo gari gei balietuo.

¹³Sidi ukoe ruosuobau nunu migeko se vo pfhe meriemegekecü puo pie whelietuo,

¹⁴mu uko bu süu mhogei uko se mhachüyakezha mhabouko pete, mi kechü khouko, zohucieko, nyothukhou, sikhouko, ruosuobau vie bouko pete pie balie; sidi ukoe kememhie chüzhüu se süu whelie di pie puo phiko nu pie balietuo.

¹⁵Pfhekiu se keyietuoü kecü ki Aron mu puo nuonuokoe kemesa chüu mu kemesa chüu vienyako pete whekelie Kohat nuonuoko bu vor pietuo derei kemesa chüu vie puorei bie suo, uko siaketa keprei la. Rüsuopfhekiu nu Kohatmiako bu pieketuoko mha hako.

¹⁶Siro Aron nuou Eliazar bu mitu la tier, puore kethengu tsa, teisonhie kerüsuo thou, kenhekecü tier, rüsuopfhekiu pete mu sünu keba pete, kemesa chüu mu süu vienyako pete puo bu mehotuo.

¹⁷Siro Jihova Mosa mu Aron unie ki:

¹⁸Leviko donunu Kohatmia kinuko pekawa hie.

¹⁹Uko bu siata mo di rheilieketuo la kemesatho vie nyako penuo kevo ki hakemhie chüliecie: Aron mu puo nuonuoko bu uko mia puopuo mhatho-u mu puo pieu khapie uko tsüshülie.

²⁰Derei Kohatko[6] siaketa keprei la kemesa chüu nu we le di kemesa vieko meho rei hie.

²¹Jihovae Mosa ki:

²²Gershon nuonuoko rei, u pfutsanuo mu u kinumia kide ba shiü phrüliecie,

²³kehou pfhekiu nu mha chüketuo la mha chülie kevi le di, u kelhouzha cie ser nunu kho cie hiepengou ketsoko phrüliecie.

²⁴Gershonmia mhatho mu u piepfüketuoko:

²⁵ukoe rüsuopfhekiu nu pfheko, kehouu pfhekiu mu süu kewhe pfheko mu süu mho keba rekewa chüzhü pie puo kewhe kechüu, kehouu pfhekiu kicie nu kelha pfheu.

²⁶Mu ruosuokechü mechü bau nu kelha pfheko mu puo kegouko rüsuopfhekiu mu ruosuobau care kicie nu kelha pfheu, puoe puo roko mu se puo mhatho chüyakezha nyako pete uko bu toupietuo, mu süko se kikecü puo chüchü morosuo shiü süko uko bu chütuo.

²⁷Gershonmia mhakechü pete Aron mu puo nuonuoko diekhakeshüu nu zotuo, toupieketuo mhatho pete pie uko pelewaliecie.

²⁸Kehou pfhekiu nu Gershonmiako mhathoe hako, mu Aron zievo-u nuo Ithamar bu uko mho kemeho-u chütuo.

²⁹Noe Merari nuonuoko rei, u pfutsanuo mu u kinumiamia di phrüliecie.

³⁰Kehou pfhekiu nu mhachüketuo la, mha chülie kevi le di, u kelhouzha cie ser nunu kho cie hiepengou ketsoko pfhüliecie.

³¹Mu kehou pfhekiu nu mha chüketuo la uko pie-e hako: rüsuokiu rako, mu kitheko, coko mu sünu cokhreko,

³²mu mechübouu lutsa hatsa keba coko, süko cokhreko mu puo kezhieko mu keroko, se mha chüyakezha nyako mu puo mhathoko pete sa di mhanyako za thu phrelie di uko pieko pie uko pelewaliecie.

³³Merari nuonuo kinumiakoe Aron zievo-u nuo Ithamar dzie nunu kehou pfhekiu nu mhakechü mhathoko hako.

³⁴Süsie Mosa, Aron mu kehouu krütakoe Kohatmia, u pfutsanuo puopuo mu u kinumia idi phrülie,

³⁵kehou pfhekiu nu mhachüketuo la mha chülie kevi le di, u kelhouzha cie ser nunu kho cie hiepengou ketsoko:

³⁶mu u kinumia le di uko phrükelie mia nyie kenie krie thenie di hiepengou.

³⁷Jihova Mosa ki diekhakeshü mhie di Mosa mu Aron unie Kohatmia kinumiako kehou pfhekiu nu mhachüketuo phrükelie hako.

³⁸Siro Gershon nuonuoko, u pfutsanuo mu u kinumia le di phrükelieko,

³⁹u kelhouzha cie ser nunu kho cie hiepengou ketsoko, kehou pfhekiu nu mha chülie kevi le di,

⁴⁰u kinumia mu u pfutsanuo idi phrükelieko nyie kenie krie sorou di ser.

⁴¹Jihova diekhakeshü mhie di Mosa mu Aron unie Gershonnuomia kinumiako kehou pfhekiu nu lietho chüyakezha pete hako.

⁴²Siro Merarinuomiako, u pfutsanuo mu u kinumiamia di phrükelie,

⁴³kehou pfhekiu nu mha chüketuo la, mha chülie kevi le di, teicie ser nunu kho cie hiepengou ketsoko,

⁴⁴u kinumiamia idi phrükelieko nyie se di krie kenie.

⁴⁵Jihova Mosa ki diekhakeshü mhie di Mosa mu Aron unie Merari nuomiako kinumia pfhükelie hakoha.

⁴⁶Mosa, Aron mu Israelmia krütakoe Levimia, u kinumia mu u pfutsanuonuo idi phrükelieko:

⁴⁷u kelhouzha cie ser nunu kho cie hiepengou ketso, mha chülie kevi le di, kehou pfhekiu nu kepfükepie mhatho chüketuo la,

⁴⁸uko phrükelieko nyie thetha krie pengou di hiethetha.

⁴⁹Themia kehoupuorei mhakikecüpuo chü mu pfüpfütie shikecü le di Jihova diekhakeshü mhie di Mosa bu uko phrülie, Jihova diekhakeshü mhie di Mosae uko phrülie.