Read Angami Naga Nuolhoutsüphrü 6 Bible Online

Nuolhoutsüphrü 6 - Angami Naga bible

Nuolhoutsüphrü 6

¹Siro Jihovae Mosa ki:

²Israelmiako ki pushülie: Mhanuü mia puo morei miapfü puo Nazirmia[7] chütuoü di puo die phrashü, puo thuo puo kela kreipie Jihova tsütuoü di phrashükewa sie,

³khubezu morei zu kekuo pete khawa morosuo; puo bu khubezu kekhro morei krie di mezeketa zu kekhrodzü puorei krie suo, morei khubesi kerhei morei keso shierei cü suo.

⁴Puo thuo puo nazir kechü[8] teikiko khubesi puoshülou morei puokou shierei pie kechü vie puorei cü suo.

⁵Siro puo thuo puo khakreipie keba teikiko puo tsü thielie lho puo thuo puo khakreipie Jihova tsükewa teiu tseita kemochie puo mesa ba zo; puo tsütha pesepfü ba zotuo.

⁶Puo thuo puo khakreipie Jihova tsükeba teikiko puo bu kesiamo penuo vo suo.

⁷Puo puo morei puo zuo morei puo siezeu, morei puo üpfü siaketa la puo bu puo perhuwalie kenjü; kekreilamonyü puo thuo puo khakreipie Ukepenuopfü tsükewa puo tsügei keba la.

⁸Puo thuo puo nazir chü[9] kebachie puoe Jihova mhodzü mesa ba zo.

⁹Siro puo khieki nu huomia sia mha zota, di puo bu puo khakreipie keba tsüu perhuwa ro, puo bu puo chü kemesakecü teisozha nhie puo tsü thiewatuo, zha thenie nhie thiewa morosuo.

¹⁰Zha thetha nhie puo bu mekhru morei paruonuo kenie se kehouu pfhekiu kicie nu zievo-u ki vortuo,

¹¹sidi zievo-ue puo pie kephouma ruosuo mu kekreiu pie kethe ruosuo chü di puo la ruosuo chü morosuo, kekreilamonyü kesiamo la puo phoumatakecü la. Siro sünhie puo tsü chükemesa latuo,

¹²sidi puo bu puo thuo puo khakreipie keba teiko khakreipie Jihova tsü morosuo, sidi cie puo keta tekuo chü puo se vor di kejo ruosuo chütuo; derei sümhodzü teiko we mhapuorei motatuo; kekreilamonyü puo khakrei kemesapie keba tsüu perhuwaketa la.

¹³Siro Nazirmia[10] la thezhoe hau, puo khakreipie keba teisozhako tseiketa sie; puo ze kehou pfheki kicieu nu vortuo,

¹⁴sidi mhakhapie Jihova tsütuo, cie puo keta tekuo chü kemesayo puo pie kethe ruosuo mu cie puoketa tekuoü kemesayo puo pie kephouma ruosuo mu tekuochü kemesa puo pie kezekevi ruosuo chütuo,

¹⁵mu khreiü shükemo niekhrüda, thou kevitho tier keripie chükelie niekhrüda, mu khreiü shü mo di tier pie kenhe di riekelie niekhrüda se merha puo nunu lhacülhale ruosuo mu kekrie ruosuoko sa se Jihova rüsuoketuo la se vortuo.

¹⁶Sidi zievo-u bu süko se Jihova mhodzünu vo di kephouma ruosuo mu kethe ruosuo chütuo.

¹⁷Süsie puoe tekuochüu, mu merhau nu khreiü shükemo niekhrüda sapie kezekevi ruosuochü pie Jihova rüsuotuo: mu zievo-u bu süu thou ruosuo mu kekrie ruosuo rei chüshü morosuo.

¹⁸Siro Nazir-ue kehou pfhekiu kicie nunu puo thuo puo khakrei pie keba tsüu thietuo, sidi puo khakreipie keba tsüthau selie di pie kezekevi ruotho-u khro mi kebau gei shüshütuo.

¹⁹Süsie zievo-u bu tekuo bou bekelieu mu merha nunu khreiü shükemo niekhrüda puo mu khreiu shükemo niekhrüda kerüpfü puo selie di pie Nazir-u,[11] puo khakreipie kebau tsü thiekewa sie puo dzie nu khashütuo.

²⁰Sidi zievo-u bu süko pie Jihova mhodzü piesie kegekecü ruosuo chü di kegeshütuo, hau zievo-u la mesa mu kegekecü khoudzüu mu puo do-u rei mesa zo, süsie Nazir-u[12] bu khubezu krielie vi.

²¹Nazirmia[13] puoe die phrakeshüu la thezho hauha Jihova ki ruosuo khakeshü cie puoe Nazirmia[14] chütuoü di puo die phrakeshü medzituo, hasie rei puoe chülie vi ro mhakha sashü di puo thuo puo chü kemesalieketuo la thezho haha chü morosuo.

²²Süsie Jihovae Mosa ki:

²³Aron mu puo nuonuoko ki pushücie, hakemhie di nieko japie Israelko tsütuo: No uko ki,

²⁴Jihova bu japie nie tsülie mu nie ze baliecie.

²⁵Jihova bu puo zie pie nie va pezielie, mu nie khrie nie ngumezhiekelieu chücie.

²⁶Jihova bu puo keneizie pie nie meholie, mu noune pie nie tsükelieu chücie.

²⁷Sükemhie di uko bu a za pie Israelko gei pie batuo; sidi a japie uko tsütuo.