Read Angami Naga Nuolhoutsüphrü 8 Bible Online

Nuolhoutsüphrü 8 - Angami Naga bible

Nuolhoutsüphrü 8

¹Süsie Jihovae Mosa ki:

²Aron ki pushülie, no mitubau petukeshü ki, mitubou thenie bu mitubau mhodzütsa vapezie morosuo.

³Aron-e sükemhie chüshü. Jihova Mosa ki diekhakeshü mhiei, puoe mitubou petupie mitubou bau mhodzü tsatie vapezieshü.

⁴Siro mitubou bau suna ketsapie chü; puo ba nunu puo nyiepouko ketso, suna ketsapie chü; Jihova Mosa ki puorhei thakeshü mhie di, puoe mitubou bako chülie.

⁵Siro Jihovae Mosa ki:

⁶Israelko donu nu Leviko zelie, di uko chükemesaliecie.

⁷Mu no hakemhie di uko chükemesalie morosuo: chü kemesayakezha ruosuo dzüu kegepie uko vashülie, di uko bu tsüpfü pie uko mo pete thiewalie, sidi u pfhe menyiwa, mu u thuo u chü kemesalie morosuo.

⁸Süsie uko bu thudonuo puo mu süu lhacülhale ruosuo la thou kevitho tier pie rikecü selie, mu no kephouma ruosuo la thudonuo kekrei puo selie.

⁹Siro no Leviko ze vor kehou pfhekiu mhodzünu balie, di no Israelko pete kie kengulie.

¹⁰No Leviko pie Jihova mhodzünu keshü, Israelkoe u dzie pie Leviko tsü gei shütuo.

¹¹Sidi Israelko donu nu Leviko bu Jihova liechüketuo la, Aron bu kegekecü ruosuo puo khapie Jihova mhodzü shütuo.

¹²Süsie Leviko bu u dzie pie thudonuo nie tsügei shülie, sidi no sünie puo pie kephouma ruosuo mu kekreiu pie kethe ruosuo chüpie Leviko rhaketuo la Jihova rüsuotuo.

¹³Süsie no Leviko pie Aron mu puo nuonuoko mhodzünu thalie di uko pie Jihova ki kegekecü ruosuo chüshütuo.

¹⁴Hamhie di no Israelmia donunu Leviko kelakreipie uko bu a vie chülietuo.

¹⁵Süsie Leviko bu kehou pfhekiu nu le di uko sünu mhathoko chütuo, sidi no uko chü kemesalie di uko pie kegekecü ruosuo khashütuo.

¹⁶Kekreilamonyü Israelmiako donunu uko pie a tsü tseiwate, u zuo va nunu kepar pete, Israelmiako donu nuorieu pete sounu, ae uko lieliete.

¹⁷Themia rei khunuo rei Israelmiako donu nuorieko sü a vie zo. Kekreilamonyü ae Ijipt nunu nuorieko pete dukhrikewa nhie a a thuo uko chü kemesaliete.

¹⁸Mu Israelmiako donu nuorieu pete sounu a Leviko lieliete.

¹⁹Israelmiako kemesa chüu penuo kevor ki, Israelmiako gei thepe bu vor molieketuo la; mu Israelmiako la ruosuo chülie di Israelmiako bu kehou pfhekiu nu mhathoko chüketuo la, Israelmia donunu ae Levimia pie Aron mu puo nuonuoko tsüwate.

²⁰Jihovae Mosa ki Israelko la diekhakeshü mhie di Mosa mu Aron mu Israelmia kro-u pete Leviko gei chüshülie, Israelkoe Leviko gei sükemhie chülie.

²¹Mu Leviko uko kephouma nunu u thuo u chü kemesalie di u pfheneiko menyiwa, sidi Aron-e Jihova mhodzü uko pie sie kegekecü ruosuo chüshü mu uko chükemesaketuo la ruosuo chüshü.

²²Süsie kehou pfhekiu nu mhathoko chüketuo la Levikoe Aron mu puo nuonuoko mhodzü leta. Sidi Jihovae Mosa ki Leviko la diekhakeshü mhie Israelmiakoe uko gei chüshü.

²³Süsie Jihova Mosa ki:

²⁴Leviko mhathoe haha: u kelhou zha cie mepfüepengou nunu sümhoko bu kehouu pfhekiu mhathoko chütuoü le morosuo.

²⁵u kelhouzha cie hiepengou ketako bu mhachü sa motatuo.

²⁶Ukoe u siezeko ze di kehou pfhekiu meholie morosuo, mu mhatho kekrei we chü suo. Leviko bu mhachü morokesuoko dze no uko gei hakemhie chüshütuo.