Read Angami Naga Nuolhoutsüphrü 9 Bible Online

Nuolhoutsüphrü 9 - Angami Naga bible

Nuolhoutsüphrü 9

¹Uko Ijipt kijü nunu praketa sie cie kenie cie, khrü kenieu nu, Jihovae Sinai nhatsa nunu Mosa ki:

²Israelko bu puotei ki ciekevo hau nyi melie.

³Khrü zha keredia nhie, thevatie,[17] nieko nyinyituo, puo cako mu puo zhoko pete ze tou di nyinyituo.

⁴Süla Mosae Israelko ki ciekevo nyi morokesuo pushü.

⁵Süla Sinai nhatsa nunu thekhrü kerieu zha keredia nhie, thevatie[18] ukoe ciekevo-u nyi: Jihova Mosa ki diekhakeshü mhie di Israelkoe ciekevo-u nyi.

⁶Siro kesiamo puo biekewa la mia huoe mesa mota di sünhie ciekevo-u nyilie mota tse ukoe sünhie Mosa mu Aron unie ki vortuo,

⁷sidi themia sükoe puo ki, “Hieko kesiamo biewa di mesa mote; kiüdi hieko bu Israelko donu vor di puotei ki Jihova rüsuolie mota ga?” idi ketsotuo.

⁸Sitse Mosae uko ki, “Pfhebalie, a bu Jihova die kikecü puo khashütie shiü rüsa rünyüketuo la” sishü.

⁹Jihovae Mosa ki:

¹⁰Israelko ki pushücie: Nieko morei nie nuosenuoyie kehoupuorei kesia mo biewa di mesa mota morei rüverüvü chü kepecie nu tuo shierei, Jihova ki ciekevonyi hau nyituo.

¹¹Khrü kenieu zhakeredia nhie thevatie[19] uko bu nyinyituo, uko bu khreiü shükemo niekhrüda mu gapfhü sa di cücütuo.

¹²Ukoe puochü puorei khapie ba süsieduü tso suo morei puo ru puo rei dutshe dutsha lho: ciekevonyiu zhoko pete ze di nyi morosuo.

¹³Derei mia puo mesa ba zo mu rüverüvü chü mo ba di ciekevo nyi mota ro, themia süu puo themiako donunu puo khawatuo: kekreilamonyü süue puotei ki Jihova ki ruosuo chülie moketa la, puo themiako donunu puo kelhiwatuo, mu puo bu phoumatatuo.

¹⁴Siro solhimia puoe vor nie donu lhoutuo di ciekevo-u nyi pie Jihova ki shütuoü ro, puo bu ciekevonyi zho nanyüko ze di nyituo. Nieko solhimia la rei mu khenu kelhoumia la rei thezho puo se zotuo.

¹⁵Siro rüsuopfhekiu pethoukelie nhie, kimhouue rüsuopfhekiu süusü dietseidiekhobou pfhekiu[20] üyakezhau whepfülie, mu thevatie nu khise ketso kimhou süu rüsuopfhekiu mhogei mi kemhie ngu bataya.

¹⁶Sükemhie di kimhouue süu whepfü sei baya, mu theva gei mi kemhie di ngu.

¹⁷Siro rüsuopfhekiu geinu kimhou chüse sieketa ki Israelko uko rüve la tuoshüya, mu kimhou bakelie thechüu nu uko pfhekiu pethoulieya.

¹⁸Jihova diekhakeshü ki ze di Israelko tuoshüya di pfhekiko pethouya. Kimhoue rüsuopfhekiu mhogei kebachie thechü sünu razhüchüya.

¹⁹Teisozha kekra kimhoue rüsuopfhekiu mhogei bata zorei Israelko tuoshüya mo, derei Jihovae chünukeshüu chüya.

²⁰Huokipuo kimhoue rüsuopfhekiu mhogei zha huoyo rübei ba ro, ukoe Jihova diekhakeshü ze di zha huoyo rübei baya, mu Jihova diekhakeshü ze di uko tuoshüshüya.

²¹Siro huoki kimhoue thevatie nu süsieduü ketso ba di khise kimhou chüse sieta, tse uko rei tuoshüya; morei khinhie shierei theva shierei kimhou chüse sieketa ki uko tuoshü seituoya.

²²Zha kenie morei khrü puo shierei morei cie puo shierei kimhouu rüsuopfhekiu mhogei keba chie Israelmiako rei tuoshü mo di uko razhüchü nu baya, derei kimhouu chü se sieketa ki uko tuoshüya.

²³Jihova diekhakeshü ze di uko razhüchü nu baya mu Jihova diekhakeshü ze di uko tuoshüshüya. Mu Jihova Mosa ki diekhakeshüko ze di, Jihova uko bu chünukeshüko chüya.