Read Angami Naga Mika 1 Bible Online

Mika 1 - Angami Naga bible

Mika 1

¹Jihova die-e Juda kediko Jotham, Ahaz mu Hezekia teiki Moresheth-u Mika ki kevor, sünu puoe Samaria mu Jerusalem la mhangu.

²Rünyüliecie, nie themia peteko; rünyüliecie, he-i kijüu, tsiu sünu keba pete; sidi Niepuu Ukepenuopfü bu nie petsoukecü zhapu chüshülie, Niepuu puo kemesa rüsuoki nunu pushü.

³Kekreilamonyü, harie Jihova puo chüu nunu vorzhie, sidi tsur kijü nu thechü kerükrieko kedewatuo.

⁴Puo khronu kijüthouko zetatuo, mu razhako mepfhibuo mi khieki kevo tuoi zhatatuo, tsiu puo he geinu dzü pekrukeshü tuoitatuo.

⁵Hako pete Jakob kejokemou la, mu Israel kikru kephoumako late. Jakob kejokemoue kikecü puo ga? Süu Samaria moü me? Siro Juda thechü kerükrieu[1] kicü puo ga? Süu Jerusalem moü me?

⁶Süla ae Samaria chüpie phouyo nu mha kepu pie, khube pelhouketuo lie chüwatuo, a puo ketsieko lapie razha nu shüwatuo, sidi puo mvüdzeko hielashütuo.

⁷Puo terhuorhi chükelie pete vüchie phawatuo, puo zhakhrükelie pete mi nunu thewatuo, mu puo rhuomiarhi pete a pekawatuo; kekreilamonyü puo thethenumia zhakhrükelie mhie uko pfhü kengukelie la, mu thethenumia zhakhrükelie kemhie uko se sükemhie chü latuo.

⁸Hau la a thekrü chü mu kratuo; a phithuo mu methuo di tuotuo; a meseruko tuoi kratuo, tsiu Ostrik tuoi kra tuotatuo.

⁹Kekreilamonyü puo rüzapfüu[2] chü kemenelie kenjüte, süu Juda nu vorte; süu a themiako kharu nu Jerusalem ketso rei vorte.

¹⁰Süu pie Gath nu pu hie, krata hie zocie; Beth-leafrah nu nyophe nu rütoucie.

¹¹Nie cha nu volie, Shafir nu kelhouko, methuo mu menga di; Zanan nu kelhouko tuo parlie mote. Beth-ezel krazhie, sidi puoe n yapie kethau n ki nunu khawatuo.

¹²Kekreilamonyü Marot nu kelhouko mhakeviu merüsiei vor, sishierei Jihova ki nunu kepekau Jerusalem kharu nu tsurte.

¹³Lakish nu kelhouko; gura se vo guragari gei phaliecie, süu Zion nuopfüko gei keshü kephouma kerieuta zo. Kekreilamonyü Israel kephouma n geinu ngulieketa la.

¹⁴Süla noe kekhoketa nunu mha methuo khapie Moresheth-gath tsütuo; Israel kediko mhodzü ki Akzib kinukoe mia se kedakecü puota zotuo.

¹⁵Maresha nu kelhouko. kuolieyakezha puo a se la vor nie tsüshütuo; Israel zayie Adulam nu vortatuo.

¹⁶No tsüpie chütalie mu n tsütha bewaliecie, no khrieyakecü nhicuko la, rümoupfü tuoi n tsü bu pie tseitalie, kekreilamonyü ukoe n ki nunu mia die chü votakecü la.