Read Angami Naga Mika 3 Bible Online

Mika 3 - Angami Naga bible

Mika 3

¹Sitse ae sie; Rünyüliecie, nie Jakob kezhako mu Israel kiu mho kezhako! Nie kethocau si mo me?

²Nie mhakevi ngumecü mu mha kesuou khrieyakezhako, a themia zhü lowayakezhako,[6] tsiu uko ruko gei u chüko lowayakezhako;

³a themia chü cüyakezhako, uko geinu u zhü lhewaya, uko ruko bietshe phaphawaya, mu uko dathe pie gali nu themuo mhie, lidou nu themuo mhieshüyakezhako.

⁴Sidi ukoe Jihova ki chatuo, sirei puo uko pfhekhoshülie lho; süteiki puo uko kinu puo zie kevielietatuo, uko mhatho kesuo chükecü la.

⁵A themia chatha kekrüwayakezha siedzekesiko la Jihova hakemhie puya, ukoe kecükekrie keba ki “Kezekevi” idi puya, derei mhapie uko me nu shü kemo-u ze terhü chütuoü pesiya.

⁶Süla süu nieko mhodzü ki teizei chütatuo, ziemho sa mo di, tsiu pesikeshü jü di, nie mhodzü ki zeitatuo. Siedzekesiko geinu niakiu letatuo, tsiu uko gei teisozhau teimekietatuo;

⁷siedzekesikoe mengatatuo, tsiu mha pushüyakezhako pie thenga nu shüwatuo; uko pete u tie kegou phrelietuo, Ukepenuopfü kinu mhapuorei vor mokecü la.

⁸Derei a la we, kekuo, Jihova ruopfü mu kethoca, tsiu kemecakemekhro se a tshupfülietuo, Jakob kesuokechü mu Israel kephouma thashüketuo la.

⁹Rünyüliecie, nie Jakob kiu kekhakezhako, mu Israel kiu krütako, kethoca rütseya, mu kemezhüu bie kerüpfhiwayakezhako,

¹⁰thezie pie Zion chükelieko, tsiu kekrükecü pie Jerusalem chükelieko!

¹¹Sünu kezhako theso lie di capi chüya, puo zievoko puo zha lietuoü pethaya, puo siedzekesiko raka la diepuya; sishierei uko Jihova ki pu di, “Jihova u ze ba ketho zo! mha kesuo puorei u gei vorlie lho” siya.

¹²Süla nieko la Zion pie lie kemhie ciewatuo; Jerusalem-e pekapie pfhepie zhüwate, mu kiu keba kijüthou-u ketsa chütatuo.