Read Angami Naga Mika 4 Bible Online

Mika 4 - Angami Naga bible

Mika 4

¹Siro vorketuo teiko nu kijüthou kerükriethoko tuoi di, Jihova kiu rükrie kijükhru mho sietatuo. Themiako kru süu vatuo,

²mu seyie kekra vor di sie, “Vorlie, úko Jihova kijüthou gei mu Jakob Kepenuopfü kiu nu vo khe; sitse puoe puo chako pie u pethashütuo, sidi u bu puo chako nu tuo volietuo” si. Kekreilamonyü Zion nunu pethakecü partuo, mu Jerusalem nunu Jihova dieu partuo.

³Puoe themia kekra ca chütuo, tsiu kepetse nu seyie kekuo donu theca chüshütuo; ukoe u zhiecha ketsapie kejü chüwatuo, tsiu uko rüngou ketsapie charuo chüwatuo; seyie puoe zhiecha yhapie seyie puo petsoulie lho, morei ukoe terhü do pfhü salie lho;

⁴derei uko pete rei u thuo u khubebo khro mu u thuo u chiedebo khro batatuo, mu miapuorei uko chü kemichie salie lho; kekreilamonyü krodiko Jihova tie thuo pushüwate.

⁵Kekreilamonyü themia peteko, mia puopuokecü u rhuou za nunu tuotuo, derei we kechachie mu kechachie Jihova úko Kepenuopfü za nunu tuotatuo.

⁶Teisozha sünhie, idi Jihova puya, a phiyhomia kengulietuo, mu whuowaketako teshü kengulietuo, tsiu ae pechükeshüko ze vor kengulietuo.

⁷Siro a phiyhomia peshapie kebako; mu kelhouwaketako pie seyie kemetei puo chülietuo; sidi tsie yawinu telhekechachie Jihova Zion kijüthou geinu uko mho kedi chütuo.

⁸Siro no, he-i tekuokro dahouu, Zion nuopfü kijükhruu, süu n ki vortuo, kerieki mha kekhakecüu vortuo, Jerusalem nuopfü kedi kechüu.

⁹Tsie no kiüdi kra peto ba ga? N gei kedi ba moü me? N ketarho jüketa la, n kechüe thenumia nuonuovachü tuoi n gei vorte me?

¹⁰He-i Zion nuopfüko, thenumia nuonuo vachü tuoi kemezhielie mu meyhumezhieshülie; kekreilamonyü no tsie nadiu nunu pratatuo, sidi vo phouyo nu lhoutatuo; no Babilon nu votatuo. Sünu nu n kelalietuo, Jihovae sünu n ngumvümia dzie nunu n rhalietuo.

¹¹Tsie seyie kekra n petsou di kengu ba, di sie, “Puo perhuwalie, mu u mhi pie Zion gei mehoshücie,” siya.

¹²Derei ukoe Jihova keleu si mo; ukoe puo mharhüu si mo, puoe telhakhro shie nu kezhü tuoi uko kengulietuo.

¹³Sielie di nyüshücie, he-i Zion nuopfü, kekreilamonyü thegi pie n kia chüwatuo, tsiu merenyi pie n mou chü chüwatuo; noe themia kekra vüchie phawatuo, sidi uko meviko chü kemesa pie Jihova tsütuo, uko kinyiko pie kijü pete mho Niepuu ki shütuo.