Read Angami Naga Mika 5 Bible Online

Mika 5 - Angami Naga bible

Mika 5

¹Tsiepfhe puo pfhepie nie khahouliete; u petsou di u re ba, ukoe sei pie Israelmia mha kekhayakezhako dzo vü.

²Derei no, he-i, Bethlehem Efratha, noe Juda chienuoko donu kecütho-u, n geinu a la Israel kekhaketuou partuo, puo thiedzütho nu tuote, kerietho ki nu tuote.

³Süla nuonuovachü di penuoketuo teiu vorlie kemochie, puo uko khawatuo; süsie siezedzüriemia peshapie kebako la, Israelmiako ki vortatuo.

⁴Siro puoe thalietuo mu Jihova kekuo nunu puo kuoko, mu Jihova puo Kepenuopfü zapuzayie kechüu nunu uko vachülietuo. Siro ukoe lhou khrukhretatuo, tsie yawinu puoe kijü vala ketso zhalietuo;

⁵mu puoe kezekevi themiautuo. Asiriamia u kijü nu vor di u kijü[7] kedeta ro, ukoe kuopfhemia thenie mu kezhamia thetha ketsepie uko petsoutuo.

⁶Ukoe zhiecha se di Asiria kijüu kekhatuo, mu zhiecha zupie[8] di Nimrod kijü kekhatuo; ukoe u kijü nu vor morei u tierie nu tuo vor ro, ukoe Asiriamia dzienu u kelashütuo.

⁷Sitse Jakob geinu lhiekelieko, themia kekra bu u houpfü di, Jihova kinu thezei krü ketsur tuoi, teirü nha gei ketsur tuoi, themia pelelie lho, morei uko kemerü pie themia gei shülie lho.

⁸Siro Jakob lhiepie kebako seyieko donu nu, themia kekra bu u houpfü di, ketsa nu loshae khunuoko donu keba tuoi, losha nuonuo tekuo kro donu keba tuoi, puoe tuo vo ro, mia kedewa sidi ciechücierha phaphawaya, miapuorei puo kinu kelaketuo jü di.

⁹N dzie yhapie n ngumvümia mho shülietuo, sidi n ngumvümia pete dathewatuo.

¹⁰Jihovae puya, teisozha sünhie, a nie donu nu nie gurako dathewatuo, tsiu nie guragariko pekawatuo;

¹¹mu a kijü nu nadiko pekawatuo, tsiu nie kuda kemeteiko chü kelhouwatuo;

¹²siro a nie dzie nunu themoumiako pekawatuo, sidi nie bu meduokecü kepu sa motatuo;

¹³mu a nie rhuorhiko, tsiu nie donu sepie keba coko dathewatuo, sidi nie bu nie dziethoko mhodzü nuketsu salie lho;

¹⁴mu a nie kemesachüko[9] pekawatuo, sidi nie rüna pekawatuo.

¹⁵Siro noupfhü mu nouyie se di, pelekemo seyieko gei a kheputuo.