Read Angami Naga Mika 6 Bible Online

Mika 6 - Angami Naga bible

Mika 6

¹Jihova kedipuo puya shi rünyüshücie: Sielie, nie nyieko pie kijüthouko ki pushülie, sidi kijükhruko bu nie pfhe rünyüliecie.

²Rünyüliecie, nie kijüthouko, Jihova die kekrei baketako, nie ba seikecü kijü mvüdzeko, kekreilamonyü Jihovae puo themiako ze kediekrei bate, mu puo Israel ze keperhietuo.

³“He-i a themiako, a kedipuo nie gei chüshüwata ga? kikecü puo nu a n bu n nyieta ga? A die kelashücie!

⁴Kekreilamonyü a Ijipt kijü nunu n ze parshü, mia die kechü kiu nunu n shüphrashü; mu ae Mosa, Aron mu Miriam ketsepie nie mhodzünu shüshü.

⁵He-i, a n themiako, Moab kediu Balak kedipuo rhü shikecü, Beor nuou Balam kedipuo se puo die kelashü shicü, tsiu Shitim nunu vo Gilgal ketso kedipuo chüte shicü rükrashücie, sitse nie Jihova kelakeshü mhathoko silietuo” sishü.

⁶“A kedipuo se Jihova mhodzünu vorta? Tsiu kerükrie gei Ukepenuopfü mhodzü a nuketsutie shi? A bu kethe ruosuo, cie puoketa mithu nuonuo se di puo mhodzünu vortuo me?

⁷Jihovae mvüdo nyienyiekecü, mu tier bu kerü nyienyiekecü dzükru chükecü puo neituo me? A kesuo kechü la a nuorieu, a ruopfü kephouma la a geinu kepar siu khashütuo me?”

⁸He-i themiau, mha kiu vi shicü puo n ki pushüwate; mu Jihova n ki kedipuo lie nyüya shicü rei. Süu kethocau chü, ngukemezhieu khrie, mu rünuo di n Kepenuopfü ze tuokelieu zo.

⁹Jihova pfhe nadiu ki shieshü (Mhasi puotoukecüu n za preituo): Rünyüliecie, he-i, seyieu mu nadiu nu kengukelieko![10]

¹⁰Kelhiecümia kinu kelhiekecü kinyiko, tsiu mha mejü petsakecüko a rükra motalie vi me?

¹¹Dietho kemo roshükhou, mu kemeda shertsieko gei a shügeshühie sa balietuo me?

¹²Nie[11] kinyikoe mia kemvü kechü thuo tshu; nie[12] lhou keba pete kemeda puya, u me nu u meü miasekedokecü phre zo.

¹³Süla a n vükhrüshütuoü sedeliete,[13] n kephoumako la n chüpie u dzükezei chüwatuoü di.

¹⁴No mhacütuo, derei pevülie lho, nie donu kemerü ba sei zotuo; noe kha kreipie batuo, derei pekrupie n vie chülie lho, no mhakengu se kebako, a süko khapie zhiecha tsüwatuo.

¹⁵Nie prushütuo, derei relie lho; noe Oliv kedenyietuo, derei tier pie nie kenhelie lho; no khube thetuo, derei no khubezu krielie lho.

¹⁶Kekreilamonyü no Omri zhoko se bate, mu Ahab kiu mhatho pete chü, tsiu noe uko kepetha dieko medzi vote. Süla a n pekaperuowatuo, mu nie lhou kebako liro mia bu u rütsetatuo; sidi niekoe a themia krenyü pfütuo.