Read Angami Naga Nahum 1 Bible Online

Nahum 1 - Angami Naga bible

Nahum 1

¹Ninevi la diekhakeshü Elkosh-u Nahum ziemho kengu leshü.

²Jihovae puo rokenyi mu khepulieyakecü Kepenuopfü puo, Jihova khepulieya mu noupfhünouyie tshubaya; Jihovae puo ngukemecümia gei khepu lieya, mu puo ngumvümia petsou sieya.

³Jihovae puo noumeyie tho derei puo kekuo zha se, tsiu Jihovae kerüzhümia bu mesatalie lho zo. Puo chakoe khriedi nu ba, tsiu kimhoukoe puo phi nu nyophe zo.

⁴Puoe dzükezha kerhieshü sidi süu bie pesowaya, mu puoe kerü pete bie pesowa; Bashan mu Karmel rüwitaya, tsiu Lebanon pou rataya.

⁵Puo mhodzünu kijüthouko rünietaya, mu kijükhruko zhataya; puo mhodzünu kijüu pete melete, kijüu mu sünu lhoukeba pete.

⁶Supuonie puo noupfhünouyie mhodzünu thalie vituo ga? Supuonie puo nouyie kereu nu shügelie vi ga? Puo noupfhüu miü tuoi rushüya mu puo geinu tsiekrieko biephro phawaya.

⁷Jihovae vi, kemezhiekecü teisozha nhie ukeya kemeteiu zo; puoe puo geinu rüzhükelieko keyau chülieya,

⁸dzü di rüyokezhü nu zorei; Puoe puo ngumvüko chü pejü lotsowatuo, mu puo ngumvüko whuopie kezeinu shüwatuo.

⁹Kiüdi Jihova petsouya ga? Puoe bie pejü lotsowatuo; mia ngukemvüu va kenie lasierlie lho.

¹⁰Zohu mhie di uko teshü kengulietuo, kemezemia tuoi uko ketolietuo; rügu tuoi uko the pejüwatuo.

¹¹N geinu mia puo partuo, Jihova petsoukecü puo, mha kesuo rhüyakezhamia puo.

¹²Jihova hakemhie puya, “Uko thuo kuo se mu kra se ba shierei, uko dathewatuo mu jütatuo. A thuo n pechüpenyüshü zo ürei, a n pechüpenyü sa lhote.

¹³Siro tsiewe a n geinu puo vocieu bietshewatuo, sidi n phapfüketuoko phreiwatuo.”

¹⁴Jihova n la diekhashüte: “N zae kechachie la ba salie lhote; n rhuoko kinu no kepie chükelie miarhi, mu lhopiekechü miarhi chükelhouwatuo. A n mekhru chüshütuo, noe kemethuokemeruo zocü la.”

¹⁵Mehoshücie! Kijüthouko gei dieliekevi se kevorko; kezekevi pushüyakezhako phi! He-i Juda, n thenyiko nyiliecie, no phrakeshüko chüshülie, kekreilamonyü kerüzhümia n penyü salie lhote; uko peka tseiwate.