Read Angami Naga Nahum 2 Bible Online

Nahum 2 - Angami Naga bible

Nahum 2

¹Puo biephroshüyakezha[1] puo sier n petsoute. Dahouko pfhelie; chako meho menuolie; nie chiepha kemeteilie; nie kekuo pete kengulie.

²(Kekreilamonyü Jihovae Jakob therhu, Israel therhu rei sa se la vorshütuo, mia bie pejüwayakezhamia thuo uko bie pejü mu uko coko pekawa zorei.)

³Puo terhümiavimia pezhüko sü merieyhara zo; Puo chüpahiko pfhenei meriemegekecü se. Puo uko kengukelie nhie guragari nyako vavaikecü chü; kekuokesekoe[2] kuo kemeriechütuo.

⁴Chaüko nu gurako thu votuo, ukoe ziekeko nu ta kho mu ke tuoya; uko ngupie mi mhie, ukoe teikemela tuoitaya.

⁵Puoe puo kezhako kieshüya; uko tuo kevor ki uphi mesüwa; uko rükri dahou gei vo, sidi u keya chülie.

⁶Kerü kharuko khrüshü, kedi kiu peta.

⁷Nadiu bu miadiechü votaketuo thezho khashüte, puo diepfüko zeta, mekhru tuoi ruo di mu uko merü kepfhü di.

⁸Ninevi-e rüzie puo nu dzü kruparketau mhie zo “Thalie! Thalie” isi, derei miapuorei rürei la mo.

⁹“Rakachüu vapfülie, sunau vapfülie! Kinyi-e puo thela jü! Mhama kere vie ha pete ba!”

¹⁰Bie pesuokewa, peruokewa, mu pekakewa! U melou suo mu khoudza pete, puo chieca pete rüniete, thezie pete u thesuosieite!

¹¹Loshako kebachüko kita ga? Losha nuonuoko keba tsiepfüko,[3] losha voyakezha chüko, miapuorei uko kebvüwaya kemo chü kirapuo ba ga?

¹²Loshae puo nuonuoko la se morokesuo de ciechücierhaliete mu loshapfü la puo chüte kenie khriliete. Puoe puo chüte pie tsiepfüko mu chürhapie puo bouko tshuliete.

¹³Harie, a n petsou, krodiko Jihova sidi puya, mu a n gura gariko the pekhuwatuo, tsiu zhiecha se n losha shapouko cülietuo; a kijü geinu n chüte bie pejüwatuo, sidi n dieliemiako pfhe si sa motatuo.