Read Angami Naga Nahum 3 Bible Online

Nahum 3 - Angami Naga bible

Nahum 3

¹He-i! Thezie kepekru nadiu, mia pete meda phre, mia vie vakelie thuo tshupfü, mha pekakecü puo thela jü!

²Seiro pfhe nu gari thuo kerütou pfhe, gura kepru pfhe tsiu guragari toutouketuo pfhe.

³Gurakesemia ta whuokevo, zhiecha phriephriekecü tsiu rüngou kepreikecü, siaketako kengu piezhü, kesia mo pfhepie zhü, kesia moko puo kela jü zo, ukoe themoko geinu u phi mesü!

⁴Kekreilamonyü thethelie di pieükechü krathorte, kethemoukecü kezhapfü, menenuoi di mia ketsi, kethemouyakezhapfü, menenuoi di mia ketsi, puo pieü chü ketheriecü geinu seyieko pie puo die[4] chülie, mu puo themou geinu themiako chüpie kediechüwa,

⁵ae n petsou, krodiko Jihova sidi puya, mu n neiu hiepie n zie whewatuo; sidi a seyieko bu n kemethuo mehotuo, mu n ngapie kedi rünako bu mehotuo.

⁶A kerütsekecü kelhoupie n gei shütuo. mu n pie mhathomharo kemo chüwatuo, tsiu n pie zasizapra chüshütuo.

⁷Sitse n ngukecü pete n ki nunu tatatuo sidi sie, “Ninevi sü pekawate; supuonie puo krükra ta?” situo. Kirapuonu a n la thukepeluo mia pfhü ta?

⁸Noe Nail khie keba Thebes[5], puo khie dzü bu houpfükeba, dzükezha se puo dahou chü, dzü bu puo sozha chükecüu ki vikuo me?

⁹Ethiopia[6] pie puo kekuou chü, Ijipt rei, mu süu puo thela ba mo; Put mu Libiamia sü puo[7] kekhruohiko.

¹⁰Sishierei puo miadiechüte, puo miadie chü vote; puo nuonuo kecüko rei cha tietshü pete nunu vütshie phawate; puo themia kezhako la dape chü, puo themia kemeyieko pete thegiro se pha ze phrete.

¹¹No rei mezetatuo, no vo rüshütatuo; no ngumvümia kinu rüzhükelie pfhütuo.

¹²N dahou pete rei chiedebo tuoi, puosi melie kerieu mhie, kenieshü ro ukoe te cüyakezhamia me nu letuo.

¹³N chüpahiko mehoshücie: sükoe n donu keba thenumia zo. N kijü nu kharuko khrü kemeyapie n ngumvümia tsütuo; mi bu n kharuko thewate.

¹⁴Terhü la dzüüliecie, n dahouko chü kemeteilie; rünyo kenyoshüliecie, nyoba kenyoshülie, ita kerie miphuu chü kemeteilie!

¹⁵Sünunu mi-e n thewatuo, zhiechae n dathewatuo. Süue ku tuoi n cü pejüwatuo. Ku tuoi n thuo n chü pekraliecie, kuprie tuoi n chü pekralie!

¹⁶Noe n lhithomiako chü pekrapie teigei themvüko ki krakuote; kue silie di proutaya.

¹⁷N rükhoukoe kuprie mhie zo, n themia mhakesikoe teikesei ki cakha gei baya, mu niaki thu par tse proutaya; ukoe kirapuo vote shi miapuorei süu siya mo.

¹⁸N kuopfheko ze zhüte, He-i Asiria kediu; n raümiako rüngute. N themiako ta cüre vo kijüthouko gei tuo, uko pfhükengushü ketuo puorei jü.

¹⁹N rüzapfü chü kemeneshü ketuo miapuorei jü, n rüzau soute. N dze kesi pete dzieda n kietuo. Kekreilamonyü supuonie n zhokesuo puo thelakejüu nunu talie ga?