Read Angami Naga Habakuk 1 Bible Online

Habakuk 1 - Angami Naga bible

Habakuk 1

¹Habakuk siedzekesiu mha kenguko pukeshü.

²He-i Jihova, a bu kichiepuo kekhruo cha, mu no rünyüshü mo batieya ga? morei n ki “Mha kesuo” idi shie mu no kelashü mo batuo ga?

³Kiüdi no a bu kekrükecüko ngu, mu kemezhiekecüko mehokecü chüshü ga? Kepeka mu mha kesuo a mhodzünu bate; kegeikecü mu keprülikecü sierte.

⁴Sidi thezho-u rünyhute, mu kethoca mhakipuorei tuo mo. Kelhiecümia kemiathoko houpfüliete, süko thecau chü kerüpfhiwate.

⁵Seyieko mehoshü, sidi leshücie. Nie ngolie! Nie kedetheliecie! Kekreilamonyü nieko teiki nu mhatho puo chüshüzhie, süu nieko ki pushü zorei nieko pelelie lho.

⁶Kekreilamonyü a Chaldianmia pie sieshütuo, seyie puo zho suo mu meyiemehükecü puo, mia lhou keba kijü u vie kemoko lielietuoü di tuo kijü puochapuochie pete pfüthe votuo.

⁷Uko ngu prei mu kemerie zo; uko capi mu uko kemesü uko thuo u geinu par.

⁸Gurako khurhü ki rei ta vikuo, thevatie socie ki u zho suokuo; u gurako mia whuoya. U gurakeseko kepetse nunu vor; ukoe rümou mhatetuoü thu kevo tuoi zo.

⁹Uko pete rei mia kemvü chütuoü tuoya, uko zie pelapfü thu voya; uko kediemia tepie theshünyo tuoilieya.

¹⁰U kedimiako krenyüya, mu kezhako u mhodzüki kethekre zo. Ukoe dahou pete kre nyüya, sidi kijü pfhelie di süu lielieya.

¹¹Uko teikhrie mha hekelhoukezha tuoi voya; ukoe moutaya sidi phoumataya; kekuo sü uko rhuo zo.

¹²He-i Jihova a Kepenuopfü, Kemesau. No thiedzü nu tuo mo me? No siatalie lho. He-i Jihova, noe uko nyiekecütuoü uko rü se bate; mu no, he-i Tsiekrieu, siazha pie uko tsüketuo la uko sesiershüte.

¹³Mha kesuo mehoketuo n mhi mesathor, mu noe kekrükecü meholie kenjü; kiüdi no kelhiekecüko mehoya mu, mu kerüzhüko uko ki miathokuokecü mezulie zorei kemekrie bata ga?

¹⁴Noe themia chüpie dzükezha nu khuoko mhieshüte, khunuo gouketuo u mhokezha ba kemo tuoiwate.

¹⁵Ngumvümia[1] khuoshüwi se uko pete teshüliete; puo jal pie uko boliete, puo jal se uko bo kenguliete; süla puo nei mu puo noumvü bate.

¹⁶Süla ruosuo chüpie puo jal tsü, mu mha pie puo khuose tsü, kekreilamonyü süko geinu puo ya chü pekra philie, mu puo kecüca ngukelie la.

¹⁷Süla puo bu puo jal bu methuo sei bate me? Sidi ngukemezhie jütoi zo di seyieko peka ba zotuo me?