Read Angami Naga Habakuk 2 Bible Online

Habakuk 2 - Angami Naga bible

Habakuk 2

¹A rükhoubau nu thatuo, mu a dahou gei thatuo; sidi puo a ki kedipuo pushütuo shicü, mu a panyakeshüu puo kedipuo se a die kelatuo shi pfhe batuo.

²Sitse Jihova a pfhekhoshü sidi a ki: Ziemho-u thuliecie; mu süu thu kemecümecieshülie, dieyie se taketuomia bu rei süu phrülie kevi chülie.

³Kekreilamonyü pethopie keba teiu la ziemho puo baluo, süu thela dze pushü, mu medaya mo. Süu chü menuoketa mhie zorei, pfhe baliecie; süu vor tou zotuo, süu chü menuotalie lho.

⁴Kemiako kebako mehoshücie! Uko ruopfüu u gei puotou tuo mo, derei kemiathomia we u kepele la rheilietuo.

⁵Sizomoü, kinyi[2] ha mha kese vie puo; mia rünyü kemomia thalie lho. Ukoe u mezha gapie Sheol tuoi thaya; kesia puo kelhuo chülie kemo tuoi. Uko la seyie pete kengulietaya, sidi themia pete pie u vie mhieitaya.

⁶Kehoupuorei themia sikecümia petsou, tsiu u krenyükecü dieko si di uko ki, “U vie kemo pie u vie chü pekralieyakezhako we ce chülietie!” isi lho me? Mia pie pfüshütuoü di mhanyako pie puo thuo puo pie dalieyakezhamia kichiepuo sibatuo ga?

⁷No u pupfü kebako mhai sier lho üme? Mu n bie kemideshüketuoko colie lhoü ba me? Sitse noe uko la teseketa vienya chütatuo.

⁸Noe seyie kekra pekawakecü la, themia lhiepie keba pete n pekakewa la. themia zie pekru, mu kijüu, nadiko mu sünu lhou keba pete bie pesuokecü la.

⁹“Nie kiko la mha kesuo nunu kinyi pfhülieyakezhako, kemezhiekecü nunu talietuoü di nie kru chüpie kerükrie gei shülieyakezhamia we ce chülietie!”

¹⁰Noe themia kekra dathewa di u kiu bu thenga kraliete; noe n thuo n kelhou pejüwate.

¹¹Ketsieko thuo sozha geinu melie partatuo, mu no mela donu nu mhanyhüpie kebako thuo süu die kelashütuo.

¹²“Nie thezie kepekru pie rüna chükelieko, mu kephouma nunu rüna chükelieko we ce chülietie!”

¹³Themia bu mi ca chüketuo la mhachü, tsiu seyieko kemethuo puo la mhachü u nyieketa haha krodiko Jihova kinu nu vor mo me?

¹⁴Derei dzüe dzükezha zepfü keba tuoi, Jihova mhasi vithedze kechüu thuo kijüu tshupfülietuo.

¹⁵“U zanuomia bu krie mezelie di, u kemenga ngu kemochie n noupfhüu[3] rushüyakezhamia we ce chülietie!”

¹⁶Noe zapuzayieu monyü mia bu ngumecükecüu n tshupfhü batatuo. No n thuo krieliecie, sidi meze thuvüvü tuocie, Jihova dzie puo zatsa hieu n ki vortuo, sidi n zayieu gei thenga vortuo!

¹⁷Kekreilamonyü Lebanon gei mha kesuo chükeshü n vupfülietuo; khunuo pekakeshüko n kechütatuo, kekreilamonyü themia zie kepekru mu kijüu, nadiko mu sünu lhou keba pete pekawacü la.

¹⁸Mharhiyakezhau la terhuorhi puoe kedipuomu! mha lhopie rhikelie puo, kemeda kepetha puo. Kekreilamonyü süu rhikeshüue puo thuo chükelieu peleya, puo rhikelieue die pulieya kemo miarhi puo zoü rei!

¹⁹Sei üse, “Colie!” mu die pulieya kemo ketsie üse, “N thuo sielie!” iyakezhako we ce chülietie! Süu mia pethalie vi me? Harie, süue suna mu rakachü pie kenhekecü rübei zo, mu uko gei kerhei thesü tuo moto zo.

²⁰Derei Jihova puo kemesa rüsuoki nu baya; kijüu bu puo mhodzü kemekrie bataliecie!