Read Angami Naga Habakuk 3 Bible Online

Habakuk 3 - Angami Naga bible

Habakuk 3

¹Habakuk siedzekesiue Shigionoth medzi di kechachü.

²He-i Jihova, a n za kemeyie si, mu a ngo bate, he-i Jihova, n mhathoko la. Hie teiu nu süko chüperhei lashücie; hie teiu nu süko pesishücie; noupfhü nunu no ngukemezhieu rükrashücie.

³Ukepenuopfü Teman nunu vor, Paran kijüthou geinu Kemesau vor. Selah Puo zayieu teiko zepfülie, mu kijüu puo ketshe thuo tshupfü bate.

⁴Kezieu ziepie niaki tuoi zo; keziechako puo dzie nunu par, sünu puo kekuo keviepie tuo.

⁵Puo mhodzü thesatheruo tuo, mu thepe süu sie medzitoi tuo.

⁶Puoe thata di kijüu shükenieshü; puo mehoshü di seyieko bu perüsürüsata. Kechachie keba kijüthouko keza phaphawate, keriekimia chaweko, kechachie keba kijütseiko sa di rükre tsute.

⁷Ae Kushan pfheko kemezhie kezhü ngushü; Midian kijü nu pfheki keya pfheko pekhrukhru bate.

⁸He-i Jihova, n noupfhüe kerüko petsou me? morei n nei kemo se kerüko petsou, morei n nouyieu se dzükezhako petsou me? no n gurako se takeshü ki, n guragariko bu kuokelieutuo me?

⁹No n theü kegeshü, n diekhakeshü nunu theütsie ketshukelhuo. No kerüko se kijüu kezawa.

¹⁰Kijüthouko n ngushü, di peta; dzü kru rüyo tsur; mha kesouu puo pfhe chüshü, Niaki puo dzie yha kerükrie khota,

¹¹khrüe puo tha meyiemeluokecü nu mele mo zhata, n theütsie kezieu ta kevo ki, n ngou peyie phriephriekeshü ki.

¹²N nouyie nunu no kijü kede vote, n nei kemo nunu noe seyieko kedewa.

¹³Noe n themiako kelatuoü, kenhekelieko kelatuoü di vor. Noe kerüzhü kiu tsü kedewa, puo mvüdze nunu vo sozha ketso bie kemethuowate, Selah

¹⁴Noe uko theütsieko se puo terhümiaviko tsü zephawa, khriewhi mhie hie bie kezawaketuo la vor, puoe mhakejümia rüshü kebako mezulietuoü di krenyü zo vor.

¹⁵Noe n gura se dzükezha pfüthe vo, sidi dzükezhau kebvüshü.

¹⁶A site, sidi a nou pekhrukhru bate; mhapfhe la a tie-e perüsürüsa bate. Ciemenakecü a ru nu lete, mu a phika mengate. Ae kemekrie di themia hie petsoukecüko pekaketuo zha vorketuou-u pfhe ba.

¹⁷Chiedebo thuo poupar mo, khubebo gei puosi vülie mo rei; Oliv geinu puosi parlie mota rei, mu lieko thuo puosi rüchü mota rei; tekuo ki nu tekuo ba mota zorei, mu mithu kinu mithu tha mota rei,

¹⁸Sishierei a Jihova nunu a neituo; a kelakelie Ukepenuopfü geinu a neituo zotuo.

¹⁹Niepuu, Ukepenuopfü sü a kekuou zo, puoe a phi chüpie chüzhie phi tuoi shüte, sidi a bu thechü kerükrie[4] gei tuolie. Bazhanya puorokechü[5] se keliyakezha krütau ki shü ho.