Read Angami Naga Zefania 1 Bible Online

Zefania 1 - Angami Naga bible

Zefania 1

¹ Jihova die Amon nuou Josia, Juda nu di keba teiki, Hezekia nuou Amaria nuou Gedalia nuou Kushi nuou Zefania ki kevor.

²A kijüu zie geinu mha pete chü kemesa tseiwatuo, Jihova siya.

³A khunuo mu themia rei rhesetatuo; a teikhrie nu perako rhese tuote, mu dzükezha nu khuo rei. A kerüzhüko bu u phi mesülietuo.[1] A kijüu zie geinu themia chüwatatuo, Jihova siya.

⁴A a dzie yhapie Juda petsoutuo, mu Jerusalem nu lhou keba pete rei; a thechü hau nunu Baal geinu lhiepie keba kehoupuorei, mu terhuorhi kerüsuo zievoko pete dathewatuo;

⁵Siro kikhru geinu nuketsu teiko krodi rüsuokecüko; nuketsu di rüsepie Jihova kishü, mu Milkom rei se rüsekecüko;

⁶Jihova siekemedzi nunu rüreiketako, Jihova pfhülie kemoko, morei puo sanyülie kemoko.

⁷Niepuu Ukepenuopfü mhodzünu kemekrietaliecie! Kekreilamonyü Jihova teisozhau penuo bate; Jihovae ruosuo puo keseliete, puoe puo phreimiako chü kemesaliete.

⁸Mu Jihova ruosuo kechü zha nhie siazha pie, kezhako mu kediu nuonuoko tsiu chazoumia pfhenei keseko pete tsütuo.

⁹Sünhie a siazha pie pru shie nu rülhou kebako pete, tsiu kecürü mu mia kemvü chü di u niepumia ki ketshu chükeshü pete gei shütuo.

¹⁰Sünhie, Jihova puya, Khuo Kharu nunu kekra pfhe si partuo. Ki Kenieu nunu krakhouikecü pfhe, kijükhruko geinu mhapfhe krakrakecü rei situo.

¹¹Mortar nu kelhouko kra khouikecü rei, kekreilamonyü lhithomia pete pekawate; rakachü pfhütuoyakezha pete bie pejüwate.

¹²Süteiki a mitubou se Jerusalem pfhütuo, themia u kiko nu vokhrü kebako siazha pie tsütuo, themia sükoe u nou nu sie, “Jihova mha kevi chüshülie lho, morei mha kesuo rei chüshülie lho” ibaya.

¹³Uko kinyiko pekawatuo, mu u kiko perapie zhüwatuo. Uko thuo kiko chülie zorei, uko süko nu lhoulie lho; uko thuo khube pelhou zorei, uko süko geinu puo zu krielie lho.

¹⁴Jihova teisozha kezhau penuo bate, penuo mu rükrei se vorzhie; Jihova teisozha pfheu pfhü, terhümiaviko sünu nu melie kemerie chütuo.

¹⁵Sünhie noupfhü teisozha puotuo, kemezhiekecü mu thenoukesuo tei puo, kepeka mu methuoketa teisozha puo, kezei mu thedzükekou teisozha puo, kimhou shükecü mu zeibouikecü teisozha puo,

¹⁶Dahou nadiko petsoukecü mu kuda rükriekecüko petsoukecü la ketsü khou, mu terhü pfhe chükeshü teisozha puo.

¹⁷Ae kemezhie sikecü se themiako geishütuo, mu ukoe mhiciemia mhie di chatuotuo; kekreilamonyü ukoe phoumapie Jihova petsoute, uko zie nyophe tuoi pekrushütuo, mu uko chüpie thubuo mhiewatuo.

¹⁸Jihova noupfhü zha nhie u rakachü morei u suna uko kelalie kenjütatuo; puo rhie kechü miu nunu kijü pete thewatuo; kekreilamonyü puoe kijü nu lhouketuo pete kemerie chü di puo thela chüwatuo.