Read Angami Naga Zefania 3 Bible Online

Zefania 3 - Angami Naga bible

Zefania 3

¹He-i rhu, mu perhuwate, pechüpenyükecü nadiu!

²Puoe mia pfhe rünyüya mo; puo chü kemezhükeshü lieya mo. Puoe Jihova peleya mo; puoe puo Kepenuopfü penuo vorya mo.

³Sünu keba kezhakoe losha meho kebako zo; puo capiko sü thevatie socieko zo, teisolie rei laya mo.

⁴Puo siedzekesikoe kehoukeruo chü, kepele kejü themia zo; puo zievokoe mha kemesako bie perhuwaya, ukoe thezho-u kemvü chüwate.

⁵Jihova puo kemiatho nunu; mhapuorei chü kekrüya mo. Teisoduü puoe capi chüshüya, khuduü rei chü motaya mo; derei thetou kemoko we thenga siya mo.

⁶A seyieko dathewate; uko dahouko ruozhüte; a uko chako chü kemethuowa, süla süko nu miapuorei tuoya mote; uko nadiko chü peruowate, themia tuo mo, miapuorei lhou tuo mote.

⁷Ae sie, “Ketho zo nadiu a preituo, puoe chü kemezhükeshü lietuo; a puo gei chükeshüko pete puoe ngu motalie lho”[7] siya. Derei ukoe kenourhei u mhatho pete bie ketheviewate.

⁸Süla a merü baliecie, Jihovae siya, a zhapu khashütuoü kesie teisozhau la. Kekreilamonyü a pepikelieu sü, seyieko teshü kenguketuo, kedirüvieko pfhü kengukelie, süko gei a nou kerüpe, a nouyie kesier pete rushüketuou zo; a nouyie miu pie kijüu pete the pejüwaketuo la.

⁹Süki a themiako die chü kedipie kemesa die chüshütuo, sidi uko pete Jihova zau kielie sidi nou puo chü puo lie chülietuo.

¹⁰Ethiopia[8] nu kerüko khietsatie nu, a ki mhachayakezhako, a themiako cüreketuoko a ruosuo se vortuo.

¹¹Sünhie n pie thenga nu shülie lho, no a perhiekecü mhatho pete chüwa zorei, kekreilamonyü a sünhie n donu nu kemiako di u neiketuoko chüwatatuo, sidi noe a kemesa kijüthou geinu mia rünyü mokecü chü sa motatuo.

¹²Kekreilamonyü a n donu rünuo, mu menekecümia khashütuo. Ukoe Jihova za nunu rüzhükelie pfhütuo.

¹³Israel geinu lhiekelieko; uko mha kesuo chü lho mu kemeda pu lho, morei kecürü meüu uko me nunu ngulie lho, ukoe nha liecü mu ke zhü ituo rei, miapuorei uko bie kemichie salie lho.

¹⁴Keli petoshülie, he-i Zion nuopfü; shieshülie, He-i Israel! N melou pete se di shie mu n noumvüliecie; He-i Jerusalem nuopfü!

¹⁵Jihova n petsoukecü chüsete, puoe n ngumvüko chü kereiwate. Israel kediu, Jihova sü n donu bate; noe kepeka prei sa morei vite.

¹⁶Sünhie Jerusalem ki pushütuo; Michie hiecie, he-i Zion; n dzie bu thachüta hie.

¹⁷Jihova, n Kepenuopfü n donu ba, terhümiavi kuokelie khashüyakecüu; puoe n gei puo nei mu puo noumvülietuo, puoe kekhrie nunu n chü kesalietuo; puoe keli peto di n pu kerükrieshütuo.

¹⁸Thenyi tei nhie tuoi di a n geinu kepeka chüwatuo,[9] sitse süu la n kerhie sa motatuo.

¹⁹Süki a n pesekecüko pete gei mhachüshütuo. Mu a phiyhoko kelalietuo mu kelhiwaketamia pfhü kengulietuo, sidi uko ngau chüpie ketshe mu kijü pete nu zayie chüshütuo.

²⁰Süki a n ze kinu vortatuo, süla a n pfhü kengukelie ki; kijü nu themia pete donu nu n chü kemeyie mu n ketshe chüshütuo, sidi n mhiki nu n ruo chü pevishütuo, Jihova siya.