Read Angami Naga Hagai 1 Bible Online

Hagai 1 - Angami Naga bible

Hagai 1

¹Darius kediu dikelie cie kenie cie, khrü sorou nu, khrülhou zha puo nhie, Jihova die Hagai siedzekesiu geinu Shealtiel nuo Zerubabel, Juda nu ahng mu Jehozadak nuou Joshua, phichükezhau ki vor:

²Krodiko Jihova hakemhie puya: Themia hakoe Jihova kiu chüketuo tei vor moluo übaya.

³Sitse Jihova die Hagai siedzekesiu geinu vor di pukecü:

⁴Nie thuo nie ki we chü pevi phikelie nu balie, sirei ki hau bu we suokezhü tei zo üba me?

⁵Süla tsie krodiko Jihova hakemhie puya: Nie chükezhüko le menuoshücie.

⁶Nieko mha kekra prushüte, mu mha huoyo rübei rekelie zo, nie mhacüya, derei nie kelhuo ba mo, nie krieya derei nie ketshu chülie mo; nie pfhe dzielie, derei miapuorei lelieya mo; mu nie mha krakelieu zorei krapie likhuo kepa nu shüwaya.

⁷Krodiko Jihova hakemhie puya: Nie mhachükezhüko le menuoshücie.

⁸Kijütseiko gei kho, di sei se vorlie, sidi kiu chülie. Sitse a süu nunu a neilietuo mu therhu pfülietuo, Jihovae siya.

⁹Niekoe mha kekra pfhe, ru harie, huoyo zie se vor mo; süu se kinu vor tse, a süu mhe petawa. Kiüdi ga? Krodiko Jihova siya. Kekreilamonyü a kiu ruo zhüketa la zo, sirei nieko pete rükri nie thuo nie ki nu vote.

¹⁰Süla nie mho geikezha tei-e thezei pekrüshü mote, mu kijüu rei rüchükelie khashü mote.

¹¹Siro a teikuo kiepie kijüu gei mu kijükhruko gei, lhacülhale gei, khubezu kesa gei, tier gei, kijü nu lhou parlieyakecü khe gei, themia gei mu khunuoko gei, tsiu uko mhathoko gei shü.

¹²Sitse Shealtiel nuou Zerubabel mu Jehozadak nuou Joshua, phichükezhau, themia peshapie keba pete Jihova uko Kepenuopfü die zelie mu siedzekesiu Hagai die zelie, Jihova uko Kepenuopfü puo ketsekeshü tuoi; mu themiako Jihova khrü preilie.

¹³Sitse Hagai Jihova dielieu, Jihova dieu pie themiako ki pu di sie, a nieko zetuo zo. Jihova siya.

¹⁴Süsie Jihova Shealtiel nuou Zerubabel, Juda kezhau, mu Jehozadak phichükezhau, tsiu themia peshapie keba pete hülie, sidi uko vor krodiko Jihova, uko Kepenuopfü kiu mhatho,

¹⁵thekhrü sorouu nu zha mepfüedia nhie chü.