Read Angami Naga Hagai 2 Bible Online

Hagai 2 - Angami Naga bible

Hagai 2

¹Darius kediu dikelie cie kenie cie, khrü thenieu zha mepfüe puo nhie, Jihova die Hagai siedzekesiu geinu vor di sie:

²tsie Shealtiel nuou Jerubabel, Juda nu kezhau, mu Jehozadak nuou Joshua, phichükezhau, mu themia peshapie kebako ki pushülie, sidi sie,

³Nieko kebako donu supuonie ki hau therieki zayie chü zokecü ngu ga? Siro nie tsie süu kedipuo mhie di ngu ga? N mhiki süu ngupie kemethuo puota mo üme?

⁴Sishierei tsiewe thepfulie, He-i Zerubabel, Jihova siya; thepfulie, He-i Joshua, Jehozadak nuou, phichükezhau; thepfulie, nie kijü nu themia peteko, Jihova siya; mhachülie kekreilamonyü a nie ze tuo zo, krodiko Jihova siya,

⁵a Ijipt nu nieko ze kepar ki a die phrakeshü mhie di. A ruopfü nieko donu ba zotuo; michie hiecie.

⁶Kekreilamonyü krodiko Jihova hakemhie puya: Puotei huoyo sie, a teiko mu kijü tsiu dzükezha siro kijükesoko shükenie lashütuo.

⁷Mu a seyie pete shükenieshütuo, sitse seyie peteko vortuo, sidi a ki hau zapuzayie kechü pie tshulietuo, krodiko Jihova siya.

⁸Rakachü a vie, mu suna a vie, krodiko Jihova siya.

⁹Siro ki hau zapuzayie kechüu kenuotsa therietsa kirei zhakuolietuo, Krodiko Jihova siya; mu thechü hau nu a kruokelie khashütuo, krodiko Jihova siya.

¹⁰Khrü thepfüu zha mepfüedia nhie, Darius kedi chükelie cie kenie cie, Jihova die Hagai siedzekesiu geinu vor di sie:

¹¹krodiko Jihova hakemhie puya: Mha kekhaketuo la zievoko ketsoliecie:

¹²Mhanuü mia puoe puo pfhenei tie nunu themuo chü kemesakewa dze setuo, mu puo pfhe se vo niekhrüda, morei ga, morei khubezu, morei tier, morei kecüca kehoupuorei nyüwata ro, süusü mesa ütuo me? Sitse zievokoe puo die kela di sie, “Mo” si.

¹³Sitse Hagai sie, “Mhanuü nieko mia puoe kesiamo biecü la mesa mota di vo mha hako bie, siliro süu mesa mo ütatuo me?” si. Sitse zievoko puo die kela di, “U we, süu mesa motatuo” sishü.

¹⁴Sitse Hagai sie, süla a mhodzü ki themia hako mu seyie hako sükemhiete, Jihova siya; mu uko dzie mhatho pete; mu uko mha khakeshüko rei mesa mote.

¹⁵Derei tsie yawinu mha kikecü puo vortuo shi leliecie. Jihova rüsuoki nu ketsie puo pie puo mho sekewa mhodzü,

¹⁶kimhie di no puo zhau chü ga? Miapuoe mha kemejü mepfü keba nu vor ru, süu ker zota; mia puoe kouzuo nunu zu sü hiepengou pietuoü vor, ru mepfü zota.

¹⁷Ae nieko vüshü mu nie mhatho chükelie pete nu teikhrie mu thezei mu prü pie vashü; sirei nieko rürei a ki vorlie mo, Jihova siya.

¹⁸Süla thie yawinu, khrü thepfüu zha mepfüediau leliecie. Jihova rüsuokiu mvü dzekeshü teisozha, leliecie:

¹⁹Puo tsia huo tsierei chüu nu ba zoluo me? Khubebo-u, chiedebo-u, turaü, mu olivbo-u tsierei puo si vülie mo zo me? Thie yawinu a japie nie tsütuo.

²⁰Jihova die, Hagai ki thekhrüu nu zha mepfüedia nhie la vor.

²¹Zerubabel, Juda nu kezhau ki pushücie, süu pukecü; Ae teiko mu kijüu shükenieshütuoüzhie,

²²sidi kedibako chü kelhouwaketuo la; ae seyieko kediba kekuoko pekawatuo, sidi guragari mu süko gei tuoyakezhako chü kelhouwatuo; sidi gurako mu uko seketuoko tetsutatuo, mu themia kehoupuorei u zemia zhiecha geinu tetsutatuo.

²³Sünhie krodiko Jihova puya, a n zelietuo, he-i Zerubabel, a kituo-u, Shealtiel nuou, Jihova puya, sidi n chüpie zasi dziekha puo mhiewatuo; kekreilamonyü a n kedaliete ru, krodiko Jihova siya.