Read Angami Naga Zekaria 1 Bible Online

Zekaria 1 - Angami Naga bible

Zekaria 1

¹Darius dikelie cie kenie cie, khrü thethau nu Jihova die Iddo tsuu, Berekia nuou Zekaria siedzekesiu ki vor di pukecü:

²Jihova nie puonuoko gei puo nei mo sete.

³Süla uko ki pushülie, krodiko Jihova hakemhie puya: Rürei a ki vorlie, krodiko Jihova hakemhie puya, sitse a rei rürei nieko kitsa vortuo, krodiko Jihova siya.

⁴Nieko puonuoko kemhieta hie, siedzekesiko uko ki pukecü, “Krodiko Jihova hakemhie puya, nieko kekrükecü chako nu mu nie mhatho kesuoko nunu rüreiliecie.” siya. Derei uko a pfhe morei a die rünyü mvüte, Jihova siya.

⁵Nie puonuoko, uko kirapuo tuota ga? Siro siedzekesiko, kechachie rhei batuo me?

⁶Derei a dieko mu a zhoko, a kituo siedzekesiko ki pukeshüko, süko nieko puonuokoe sanyü mota moü me? Siro uko thenou kedilie di sie, “Krodiko Jihovae chütuoü di rhükelie mhiei u zhoko mu u mhathoko medzi di u gei mhachüshü” si.

⁷Khrü kerepuou nu zha mepfüedia nhie, Shebat-u khrü, Darius kedi chükelie cie kenie cie, Jihova die Iddo tsuu Berekia nuou Zekaria siedzekesiu ki vor di sie,

⁸Theva geinu mia puo gura kemerie puo seketuo a ngu! Puoe razha nu Mürtel seibo donu tha; mu puo sietsatie gura merie, rürhü mu kracü puo tuo.

⁹Sitse a sie, “Hako kedipuo ga? A Niepuu?” isi. Siro teigeidieliemia a rüchü kethau sie a ki, “Hako kedipuo shicü thapie n kieshütuo” si.

¹⁰Süla themia Mürtel seiboko donu kethau a die kela di, “Hako Jihova uko bu kijüu yalieketuo la ketsekeshüko” si.

¹¹Süsie uko Jihova dielieu Mürtel seibo donu kethau rüchü di sie, “Hieko kijüu gei rühou vowate, mu harie, kijü pete nu rei menetshüi ba zo” si.

¹²Sitse Jihova dielieu sie, “He-i krodiko Jihova, Jerusalem mu Juda nadiko gei cie hiethenie n nei mo vorketau gei no kichiepuo ngukemezhieu khase ba zotieya ga?” sishü.

¹³Sitse Jihovae teigeidielie a ze kerüchü kethau gei menuoi mu thukepeluo dieko pushü.

¹⁴Süla teigeidielie a ze kerüchü kethau a ki, dielie hau pushülie: Krodiko Jihova hakemhie puya; Ae Jerusalem mu Zion la a rothor bate.

¹⁵Mu seyie rüütshüi kebako gei a nei mothor bate; kekreilamonyü a nei mo za bakecü ki, ukoe mha pekakecüu chü pesuokuoshü.

¹⁶Jihova hakemhie puya, a ngukemezhie se rürei Jerusalem nu vor; a ki süu nunu chütuo, krodiko Jihova siya, mu kemejü ro-u teshüpie Jerusalem gei shütuo.

¹⁷Tsie rei pu sashülie: Krodiko Jihova hakemhiekecü puya: A nadiko kinyi bu ketshukelhuo chü lalietuo; Jihovae Zion thupeluo latuo mu Jerusalem keda lalietuo.

¹⁸Siro a mehoshü ru, mha kia dia ngu.

¹⁹Ae teigeidieliemia a ze kerüchü kethau ketso di, “Mha hako kedipuo ga?” sishü ru puo a die kela di sie, “Mha kia hako Juda, Israel mu Jerusalem kezapie lukihaki shüwaketako zo” si

²⁰Süsie Jihova rükreimia dia thashü a kie.

²¹Sitse a sie, “Uko kedipuo chütuoü di vorzhü ga?” sishü. Puo a die kela di sie, “Mha kia hako Juda bie kezakewako zo, süla miapuorei puo tsü pie sielie mota; derei hako uko kedeketuo la, seyieko uko kia pie Juda kezawatuoü di petsoukecü kiako biekhrüshüketuo la vorte” sishü.