Read Angami Naga Zekaria 10 Bible Online

Zekaria 10 - Angami Naga bible

Zekaria 10

¹Nieko bayie teiu nu Jihova ki teirü chalie, Jihova kimhou chükeshü, tei perüpie nie ketsüu, lie nu nha menyieko pie mia pete tsüya.

²Kekreilamonyü terafim-e[9] kemethuo puya, mu mha ngulieyakezhakoe kemeda nguya; u mho pemakecükoe kemeda mho pushüya, mu thupeluolie kelho kemethuo die puya. Süla themiakoe tekuo tuoi yotuote; uko kepfhe kejü la kemezhie tuote.

³A nouyie-e kuopfheko petsou, mu a krütako siazha chüshütuo; krodiko Jihovae puo kuokro-u, Juda kiu dze leyacü la, mu uko chüpie terhü gura kevipfü mhiewatuo.

⁴Uko geinu puoke nu tsieu partuo, uko geinu dzüpfheki seizhieu partuo, uko geinu terhü theü partuo, uko geinu krüta kehoupuorei partuo.

⁵Uko keze terhü nu terhümiavimia mhietuo, chaüko nu u ngumvümia kedepie nyoba chüwatuo; uko terhü chüshütuo, kekreilamonyü Jihovae uko zetuo, sidi ukoe gura gei ketuoko bu thenga chütatuo.

⁶A Juda kiu chü kemeteishütuo, mu a Josef kiu kelashütuo, uko ze la vorshütuo kekreilamonyü a uko ngumezhiecü la, mu uko bu ae uko meliewakemo mhie lalietuo; kekreilamonyü a Jihova uko Kepenuopfü mu a uko pfhekhoshütuo.

⁷Sitse Efraimiakoe terhümiavimia mhielietuo, mu uko nou khubezu kekrie tuoi u neilietuo. Uko nuonuoko sü ngu di u neituo, uko meloue Jihova geinu u noumvülietuo.

⁸A uko la zasi chüshü di uko kie kengulietuo, kekreilamonyü a uko rhaliete, sidi ukoe thiedzü kemhie kra phi lalietuo.

⁹A thuo uko chüpie seyieko donu cürewa zorei, sirei ukoe rüna kepetseko nunu a rükralietuo, sidi u nuonuo theketuo mu la vortuo.

¹⁰A Ijipt kijü nunu uko ze kinu la vorshütuo, mu Asiria nunu uko pfhü kengulietuo; a uko ze Gilid mu Lebanon kijü nu la voshütuo, uko la sünu thechü jüta kemochie.

¹¹Ukoe kemezhiekecü dzükezhau cie votuo, sidi dzükezha rüpfhüko vüwatuo, mu Nail kesouu pete sotatuo. Asiria kemiakokecü bie kerünuowatuo mu Ijipt theu bu tuotatuo.

¹²A, Jihova geinu uko chü pekuoshütuo, mu ukoe puo za nunu tuotuo, Jihovae siya.