Read Angami Naga Zekaria 12 Bible Online

Zekaria 12 - Angami Naga bible

Zekaria 12

¹Die pukeshü puo. Jihova die Israel la pukeshü: Jihova hakemhie puya, teiko kelhakeshüu mu kijü mvüdzekeshüu tsiu themia gei kerheiro khakeshüu:

²Harie, ae Jerusalem khieümhou houpfü kebako la puo chüpie perüsürüsakecü tehie puo chüshütuo; süu Jerusalem perhie di re keba ki Juda rei sa perhietuo.

³Sünhie themia pete la Jerusalem pie ketsie kemesi puo chüwatuo; süu piekecümia kehoupuorei u thuo u pechü pesuo pfülietuo. Siro seyie pete rei vor kengulie di puo perhietuo.

⁴Sünhie a gura pete chü kemidewatuo, mu puo keseu bu nyatatuo; Jihova siya. Derei Juda kiu la zowe a meholietatuo, a süko gura pete mhi chü peciekewa ki.

⁵Sitse Juda chienuokoe sie u thuo u üse, “Jerusalem nu kelhouko we uko Kepenuopfü, krodiko Jihova geinu u kekuo bate” ituo.

⁶Sünhie a Juda chienuoko pie sei khropie kezhü gei gali tu keba mhieshütuo, telha khropie keba nu mi tu sieketa mhiei, sidi süue thezatsa mu thevitsa lhou keba themiako pejüwatuo, derei Jerusalem we Jerusalem gei lhoulietuo.

⁷Siro Jihova Juda pfhekiko bu kuolietuo, sitse David zayie kechüu mu Jerusalem nu keba themiako zayie kechüu bu u thuo u chü pezha pie Juda mhota molieketuo la zo.

⁸Sünhie Jihovae Jerusalem nu kelhouko yalietuo, sitse sünhie uko donu kethachüthomia rei David tuoitatuo, mu David kiue Ukepenuopfü mhietatuo, Jihova dieliemia uko mhodzü ketuo tuoitatuo.

⁹Sünhie ae Jerusalem petsoukecü seyie pete pekawatuoü pfhütatuo.

¹⁰Siro ae David kiu gei mu Jerusalem nu kelhouko gei ngukemezhie mu u mezhiemelokecü ruopfüu rushütuo, siro ukoe uko thuo rüngou pie zekewau ngu tse, ukoe puo krükratuo, mia puoe puo nuo puo rübei zokecüu la krakecü tuoituo, sidi kra pie mia puoe puo nuo nuorieu la krakecü tuoitatuo.

¹¹Sünhie Jerusalem nu kra thekrüchü kemeriechü di Megido razha Hadad-rimon nu kra thekrü kechü tuoitatuo.

¹²Kijüue kratuo, kikru puopuokecü, mu David kikru zocüu rei; siro uko nupfünuoko rei, tsiu Nathan kikru rei, tsiu süko nupfünuoko rei;

¹³Levi kikru rei, tsiu süko nupfünuoko rei; Shimei kikru rei, tsiu süko nupfünuoko rei,

¹⁴mu kikru peshapie kebako, puopuo, tsiu süko nupfünuoko rei tuo.