Read Angami Naga Zekaria 14 Bible Online

Zekaria 14 - Angami Naga bible

Zekaria 14

¹Harie, Jihova la teisozha puo vorzhie, sünhie n kinu pekakelieko nieko donu nu kezawatuo.

²Kekreilamonyü a seyie pete kie kengupie Jerusalem ze kegeituo, mu nadiu lielietuo tsiu kiko nu mha ketalietuo mu thenuko shüwatuo; nadiu nu themia ketoupuoe miadie chü votatuo, derei themia lhiekeliekoe nadiu nunu pekawalie lho.

³Sitse Jihovae par di seyie süko ze kegeituo, terhü kegeikecü nhie tuoi di.

⁴Sünhie puo phi-e Oliv kijüthou gei thalietuo, süue niathutsa Jerusalem mhodzünu ba; siro Oliv kijüthou-ue razha kezha puo bu puo keza kenie chüpie niathutsa mu niakratsa vota; sitse kijüthou ketou puoe pesotsa vatatuo, mu süu ketoupuoe pekhrotsa vatatuo.

⁵Siro niekoe ta Jihova kijüthou razha nu tsutatuo, kekreilamonyü kijüthouko donu razhau vo Azal ketsotuo; mu niekoe Uzia Juda kediu teiki kiükishükecü nunu taketa tuoi tatatuo. Sitse Jihova, a Kepenuopfü vortuo, mu kemesako pete puo ze vortuo.

⁶Sünhie kemeku morei thezei rei krülie lho.

⁷Siro teiso sei batatuo (süue Jihova thuo chüshütuo) teiso morei teizei chülie lho, kekreilamonyü thevatie rei ziekruoi batatuo.

⁸Sünhie Jerusalem nunu kerheiprü dzüluou partuo, süko ketoupuoe niathutsa dzükezhatsa votatuo mu ketoupuoe niakratsa dzükezhatsa votatuo; süu teile ki rei teisei ki rei si zotuo.

⁹Siro Jihova thuo kijüu pete mho kedi chütatuo, sünhie Jihovae puo mu puo za rei puo chütatuo.

¹⁰Kijü pete Jerusalem pekhrotsa Geba nunu vo Rimmon ketso chüpie razha kemezhü chüwatuo. Derei Jerusalem puo thau rükrie sietatuo, Benjamin kharu nunu vo thiedzü kharuu ketso, vo puokeu nu kharuu ketso, mu Hananel tsiepfhe nunu vo kediu khubedzü kethebou nu ketso nunu sitatuo.

¹¹Siro sünu themia lhou batatuo, siro süu peka lotsokecü chü salie lho; Jerusalem-e khrukhre batatuo.

¹²Siro Jihovae thepe pie Jerusalem perhie di terhü kechü themia pete tsütuo; uko u phi gei tha zoluokecü nu uko chü jütatuo; uko mhi-e puo thau nunu jütatuo, mu uko meüe uko me nunu jütatuo.

¹³Sünhie kemerie sekecü Jihova ki nu uko gei vortuo, sitse mia puo mia puo sie u zanuou dzie telietuo, sitse mia puo dzie-e sie kekreiu dzie petsoutatuo;

¹⁴Juda thuo zorei Jerusalem nunu kegeitatuo. Siro seyie puokhie puomhou houpfü keba kinyiko pete, suna, rakachü, mu pfhemeneiko kekra se vor kengulietuo.

¹⁵Siro thepe hakemhiekecü pie gurako, khunuoko, utko, gadako, mu khunuo kehoupuorei razhü nu keba pete gei shütuo.

¹⁶Süsie seyie pete vor Jerusalem perhiekecü ki lhiekelieko teicie kepra kho kediu, krodiko Jihova rüsuotuo, mu pru nyiko[13] nyituoü khotuo.

¹⁷Kijü nu kikru huo Jerusalem nu vo kediu, krodiko Jihova rüsuo mota ro, süko gei tei rüshü motatuo.

¹⁸Mu Ijipt kikruu kho di uko khashülie mota ro, uko gei Jihova thepe pie seyieko pechükecüu khashütuo, uko kho di pru nyiko nyi kemo la.

¹⁹Hauha Ijipt mu seyie pete kho pru nyiko nyi kemomia siazhautuo.

²⁰Sünhie gura gei khepfüketuo thetseiko gei “Mesapie Jihova tsülie” icüu tuotuo. Siro Jihova kiu nu galikoe mesapie rüsuobau mhodzünu mhabouko tuoitatuo;

²¹tsiu Jerusalem mu Juda nu gali kehoupuorei krodiko Jihova mhodzünu mesatatuo, sitse rüsuo chüketuomia kehoupuorei vortuo sidi süko se rüsuoko belietuo. Sidi uko sünhie krodiko Jihova kiu nu thelhikechümia[14] puo rei ba salie lhote.