Read Angami Naga Zekaria 2 Bible Online

Zekaria 2 - Angami Naga bible

Zekaria 2

¹A meho sie ru themia puo puo dzie nu mha kemejü ro puo se ketha ngu.

²Sitse a sie, “No kirapuo votieya ga?” idi ketsoshü. Puo a die kela di, “Jerusalem mejüketuo la, puocha puozha kedithechie shi mehotuoü di lie” si.

³Sitse teigeidielie a rüchü kethau a ze kesetuoü tuo phir,

⁴sidi puo a ki, “Tashülienukecü, khriesa luu ki pushücie: Jerusalem-e puo sozha sa kemo rünako mhietatuo, kekreilamonyü themia mu khunuo sünu ba seketa la.

⁵Kekreilamonyü ae süu khie lutsahatsa mi sozha kemhietuo, tsiu sünu zapuzayie chülietuo, Jihovae siya” sishü.

⁶Sielie, sielie! Pesotsa kijü nunu tatalie, Jihova siya; kekreilamonyü teigei teikhrie diako tuoi a nieko kelhapie chazou shüwaketa la, Jihova siya.

⁷Sielie! Zion nu vo rüshütalie, nie Babilon nuopfü ze lhoukebako.

⁸Kekreilamonyü krodiko Jihova hakemhie puya (puo zapuzayieu la a ketseshücie) nie pekakewa seyieko dze pushü: Ketho zo, n biekeshüu a mhi shülou-u biewate.

⁹Süla tsie, a a dzie yhapie uko petsoutuo, mu ukoe u kituomia la kepeka chütatuo. Sitse niekoe krodiko Jihova a ketseshü ücü silietuo.

¹⁰Kelilie mu nie neilie, he-i Zion nuopfü! Kekreilamonyü harie, a vor nieko donu lhoutuo, Jihova siya.

¹¹Sünhie seyie kekra u thuo vo Jihova zetatuo, sidi a themia chülietuo; mu a nieko donu lhou balietuo. Sitse niekoe krodiko Jihova thuo a ketsepie nieko ki shü ücü silietuo.

¹²Jihova kemesa kijü nu Juda pie puo yau chü di welietuo, mu Jerusalem keda lalietuo.

¹³Themia pete, Jihova mhodzü kemekrietalie; kekreilamonyü puoe puo kemesa tha nunu sietakecü la.