Read Angami Naga Zekaria 4 Bible Online

Zekaria 4 - Angami Naga bible

Zekaria 4

¹Teigeidielie a rüchükethau la vor, sidi mia puo zekezhü nunu kesoukelie tuoi a kesoushü.

²Puo sie a ki, “No kedipuo ngu ba ga?” isi. Sitse a sie, “Pete suna pie kechü mituba puo ngulie, süu mhogei mhabou puo ba, mu sügei mitu thenie ba, mu mitu thenieko puopuo gei puo tie puopuo ba, süko puo mhogei ba.

³Siro süu khieki Oliv bo kenie ba, puo liro mhabou thezatsa, mu kekreiu thevitsa ba” si.

⁴A teigeidielie a rüchü kethau ki, “Hako kedipuo ga? A niepuu” sishü.

⁵Sitse teigeidielie a rüchü kethau a die kela di sie, “No hako kedipuo shi si mo me?” ita. Süla a sie, “A niepuu, a si molie” sishü.

⁶Siru puo a ki, “Hau Jihova die Zerubabel ki pukeshüu: Kemecakemekhro geinu, morei kekuo geinulie lho, derei a ruopfü geinu zotuo, krodiko Jihova siya.

⁷No kedipuo ga? He-i kijüthou kezhau. Zerubabel mhodzü noe kijüthezha chütatuo; mu puoe ketsie pesotho-u se par shiekhoui di ‘Ngukemezhie, süu ngumezhielie!’ isituo” sishü.

⁸Sizomoü Jihova die a ki vor di sie,

⁹“Zerubabel dzie thuo ki hau mvü dzeshü; puo dzie thuo süu rei chü tseishütuo. Sitse niekoe krodiko Jihova thuo a ketsepie nieko ki shü ücü silietuo.

¹⁰Kekreilamonyü kehoupuorei mha kecü sedekelie zhau ngu u nou thesekecüko u neituo, uko Zerubabel dzie nu kemejüro ngulietuo. “Mha thenie hako Jihova mhiko zo, ta kijü pete nu votuoya” si.

¹¹Sitse a puo ki, “Mituba khie thevi thezatsa keba olivbo nie kedipuo ga?” sishü.

¹²Süsie va kenieu a puo ki, “Suna pou kenie nunu tier[2] rukeshü Oliv suna co hanie kedipuo ga?” si.

¹³Puo a ki, “No mha hako kedipuo shi si mo me?” sishü. A sie, “A niepuu, a si molie” sishü.

¹⁴Sitse puo sie, “Kenhekelie hanie, kijü pete nu Niepuu khieki thaya” si.