Read Angami Naga Zekaria 7 Bible Online

Zekaria 7 - Angami Naga bible

Zekaria 7

¹Kediu Darius dikelie cie dia cie, khrü thepfüu, süusü Kislev-u khrü zha dia nhie Jihova die Zekaria ki vor.

²Süki Bethel themia Sharezer mu Regem-Melek mu u themiako ketsepie Jihova medo-u rüsatuoü,

³mu krodiko Jihova kinu bayakezha zievoko mu siedzekesiko ketsotuoü di sie, “A teicie kekra chü kevor tuoi a bu khrü pengouu khrü thekrüchü mu a kela kemesa krei se ba morosuotuo me?” ishü.

⁴Sitse krodiko Jihova die a ki vor: Kijü sünu themiako mu siedzekesiko ki pushücie:

⁵Nieko teicie hiethenie khrü pengouu mu thenieu nu mevo mu thekrü chükecü ki, a la mevo me?

⁶Siro nieko cüükriekecü ki nieko thuo nieko rübei la cüükrie moü ba me?

⁷Hako ha thiedzü Jerusalem nu themia kruo mu lhou keba ki, siro puokhie puomhou rünako nu, tsiu Negeb mu Shefela nu rei themia lhou keba ki Jihovae siedzekesiko geinu pukecü die mo me?

⁸Jihova die Zekaria siedzekesiu ki vor di sie:

⁹Krodiko Jihova hakemhie puya: Ketho cau chüshülie, ketseikevi mu ngukemezhie se huoniehuo gei shülie;

¹⁰Samimiapfü, merünuomia, solhimia morei kejümia pese hie; mu huoniehuo ngumvü di nie melou nu mhakesuo rhü hie.

¹¹Derei ukoe rünyü mvüte, sidi u nou kere boukau pela pielie, tsiu rünyü mvü di uko nyieto keguliete.

¹²Ukoe krodiko Jihovae kerieki siedzekesiko geinu puo ruopfü ketseshü di thezho-u mu die pukeshüko rünyülie lhoü di u nou bie pekhrüpie tsiekhrü tuoiliete. Süla krodiko Jihova noupfhü kemeriekecüu vor.

¹³Süla, puoe meliekeshü ki, uko rünyü mvüketa tuoi, sükemhiei uko meliekeshü ki, a rünyü mvütatuo, krodiko Jihova siya,

¹⁴mu khriewhi geinu uko keza kecürepie sikemo seyie pete nu shüwa. Hakemhie di uko khakewa kijüu razhüte, sidi miapuorei tuo kho mu ke mote, tsiu u kenei kijüu methuozhüte.