Read Angami Naga Zekaria 8 Bible Online

Zekaria 8 - Angami Naga bible

Zekaria 8

¹Krodiko Jihova die a ki vor di sie;

²Krodiko Jihova hakemhie puya: Ae a rothorkecü se Zion gei a ro bate, mu a noupfhü kemeriekecü se puo gei a ro bate.

³Jihova hakemhie puya: A Zion gei la vortuo, sidi Jerusalem metsuo nu lhoutatuo; Jerusalem üse kedietho nadi üdi kietuo, mu krodiko Jihova kijüthou-u üse kemesa kijüthou ütuo.

⁴Krodiko Jihova hakemhie puya: Jerusalem chaüko nu ketsamia mu ketsapfümia phichüthorketa ze di u dzie nu u the se phretatuo.

⁵Siro nadi chaüko nu thepfunuomia mu thenunuomia thuo tshu di chaü nu rüzhü tuotatuo.

⁶Krodiko Jihova hakemhie puya: Tsiedoki themia lhiekelieko la we chülie kenjükecü puo, süu a la rei chülie kenjü isituo me? Sidi krodiko Jihova puya.

⁷Krodiko Jihova puya: Ae rüna niakratsa mu niathutsa nu a themiako kelalietuo;

⁸mu uko ze vor Jerusalem nu lhoushütuo. Kedietho mu kemiatho nunu ukoe a themia chütuo mu a uko Kepenuopfü chülietuo.

⁹Siro krodiko Jihova hakemhie puya: Nie dzie bu meteilie-niekoe tsie mhodzü kinu rüsuoki, krodiko Jihova kiu mvüdze dzekeshü nhie süki ketha siedzekesiko tie nunu die hako sishüta zo.

¹⁰Kekreilamonyü sümhodzü themia morei khunuoko zha khrüya mo, morei themia ketsukevo chükecü kemichie nyi, ae uko pete bu huoniehuo perhiekecü chükeshü la.

¹¹Derei tsiewe, a themia peshapie keba hako gei thiedzü keriekiko gei keshü tuoilie lhote, krodiko Jihova siya.

¹²Kekreilamonyü kezekevi prushütuo; khubebo puo si vülietuo, kijüu puo si vüshütuo, mu teikoe thezei pekrüshütuo; mu a themia peshapie keba hako bu mha hako pete pevielietuo.

¹³Siro niekoe seyieko donu rüsepfü tuoketa mhiei, he-i Juda mu Israel kinuko, sükemhie a nieko kelalietuo, sidi nieko bu thejakepfümia chülietuo. Michieta hie, derei nie dzie bu meteilie.

¹⁴Kekreilamonyü krodiko Jihova hakemhie puya: Nieko puonuoko a nou chü kemeyieshü mu a ketheta mo di kepeka se nieko gei vortuoükeshü mhie, krodiko Jihova puya.

¹⁵Sütuoi teisozha hako nu ae Jerusalem mu Juda kiu gei mhakevi chüshütuoü rhüliete; michieta hie.

¹⁶Mha hako no chü morosuo: Nie huoniehuo gei ketho-u pulie, nie kharuko nu ketho capi mu vitho chüshülie.

¹⁷Nie nou nu huoniehuo perhietuoü di mha kesuo rhü hie, mu kekrükecü rüseko khrieta hie; kekreilamonyü mha hako pete ae rütseya, Jihova siya.

¹⁸Krodiko Jihova die a ki vor di sie:

¹⁹Krodiko Jihova hakemhie puya: Khrü diau nu mevokecüu, mu khrü pengouu nu mevokecüu, mu khrü thenieu nu mevokecüu, siro khrü ker nu mevokecüu bu Juda kiu la kenei mu thenoukemvü teiu, tsiu u kenei thenyiko chütuo; süla ketho mu kezekevi u neilie.

²⁰Krodiko Jihova hakemhie puya: Themiako vor, nadiko nu kelhouko;

²¹nadi puo nu kelhoumia kekreiu ki votuo, sidi sie, “Vorlie, úko Jihova ki vo puo medo ketso khe mu krodiko Jihova pfhü khe; a thuo rei votuo,” situo.

²²Themia kekra mu seyie kekuo kekra Jerusalem nunu krodiko Jihova pfhütuo, mu Jihova ki chatuo.

²³Krodiko Jihova hakemhie puya: Süteiki seyieko nunu mia ker Judamia puo pfhe teshülie di, “Hie bu n ze vocie, Ukepenuopfü nie ze tuokecü hie sikecü la” situo.