Read Angami Naga Zekaria 9 Bible Online

Zekaria 9 - Angami Naga bible

Zekaria 9

¹Die puo pukeshü. Jihova die Hadrak kijüu petsou, mu Damaska gei batatuo. Kekreilamonyü Siria[6] seluoba[7] Jihova viekecü la, Israel seyie peteko tuoi di;

²Hamath rei sa, süu puo tierie nu kebau, Tur mu Sidon, unie thuo mhasi se ba zorei.

³Tur-e thuo dahou pfheliete, sidi nyophe tuoi rakachü pfhekengulie, mu sunae chaü nu mhakerhuko tuoite.

⁴Derei tsiewe, Jihovae puo vieko chüsetatuo, mu puo kinyiko kelhoupie dzükezha nu shüwatuo, sidi mi bu puo mezulietuo.

⁵Ashkelon-e süu ngu di michietatuo, Gaza rei, mu puo nousuo di meyhumezhietatuo; Ekron rei sa, puo kemerüko rüwikecü la. Kediu Gaza nunu katatuo. Ashkelon nu themia lhou motatuo;

⁶themia lhou kereikecü Ashdod nu lhoutatuo, mu ae Filistinko kemiakokecüu puo thela chüwatuo.

⁷Ae puo me nunu puo zieu, mu puo hu donu mha rhikemo kemecüu chüsetatuo; puo rei úko Kepenuopfü la lhiekelieu chütuo; puoe Juda nu chienuo puo mhietuo, mu Ekron-e Jebusmia mhietatuo.

⁸Sitse ae kipfhemia puo kemhiei a kiu nu balietuo, sitse miapuorei tuo kho mu ke motatuo; mia kepesemia puorei süko pfüthe la volie lho, kekreilamonyü tsiewe a mhi pie nguwaketa la.

⁹N nei philie, he-i Zion nuopfü! Shie petoshülie, he-i Jerusalem nuopfü! Harie, nie kediu nie ki vorzhie; zapuzayie mu kuokelie sü puo zo, menenuoi di gada geinu, gada kemedzü yopuo geinu.

¹⁰Puoe Efraim nu gura gari, mu Jerusalem nu terhü gura pekawatuo; mu terhü theü dathewatuo, sidi puoe seyieko bu vitho chünushütuo, puo rüvie-e dzükezha nunu vo dzükezha ketsotuo, mu kerüu nunu vo kijü vala ketsotuo.

¹¹Siro n la zowe, a zie se n ze dietseidiekho chükelie la, ae dzü kejü khe nunu n dieko ze parshütuo.

¹²Nie dahou gei votalie, he-i kemerü keba kediemiako; thie a n gei puo de kenie kelashüketuo pushüya.

¹³Kekreilamonyü a theü tuoi Juda galiete; a Efraim pie puo theütsie chüshü. A n nuonuoko piesieshütuo, he-i Zion, süko bu n nuonuoko petsoutuo, he-i Gris, sidi n pie terhümiavimia zhiecha mhieshütuo.

¹⁴Sitse Jihova uko mho geinu partuo, mu puo theütsie teikemela tuoi votuo; tsiu Niepuu Ukepenuopfü ketsü khoushütuo, mu pekhrotsa khriedi ze mele votuo.

¹⁵Krodiko Jihova uko yalietuo, ukoe ketsie deiyakezhako[8] peka mu kedewatuo; ukoe zu tuoi süko ziekrietuo, mu mhabou mhiei tshulietuo, tsiu rüsuoba puokeko mhie thezie üse petsewatuo.

¹⁶Sünhie Jihova uko Kepenuopfü uko kelalietuo, kekreilamonyü ukoe puo kuokro-u zokecü la; ukoe keditsüre gei ketsie puoma kerepfü tuoi, puo kijü nu zieshüketuo la.

¹⁷Kekreilamonyü puo kevi mu puo zivi kide zha shi! Telhae khriesamia chüpie vilieya, mu khubezu kerünie kesae rüüko chüpie vilieya.