Read Angami Naga Malaki 2 Bible Online

Malaki 2 - Angami Naga bible

Malaki 2

¹Siro tsie, he-i zievoko, diekhakeshü hauha nieko la zo;

²Niekoe rünyü mo, niekoe süu pie a za chü kemeyieketuo la pie nie melou nu shülie mo liro, krodiko Jihova hakemhie puya, a rüse pie nie geishütuo mu a nie thejako rüsewatuo; ketho zo a hadzü nu uko rüsewate, kekreilamonyü nieko süu pie nie melou nu shülie kemo la.

³A nie nuosenuoyieko kerhieshütuo, mu thubuo kelhoupie nie zie vatuo, nie ruosuo buoko, sidi a mhodzünu nu nie khawatuo.

⁴Süla tsie, a diekhakeshü hau pie nie kishü ücü siliete, süu a dietseidiekho-u Levi zetuolieketuo la, krodiko Jihova sidi puya.

⁵A puo ze dietseidiekho chükelieu sü kerheiro dietseidiekho mu vitho-u zo, a sünie pie puo tsüshü; kekie hau therhu nunu morosuo, mu puoe a rhu tsiu a zau prei thalie.

⁶Kepetha ketho-u puo me nu tuo, mu kekrükecü puorei puotie nu ngulie mo. Puoe mezhü mu puotou di a ze tuo, mu puoe themia kekra bu kephouma therhielie.

⁷Kekreilamonyü zievomia tie-e kesikele rüguose ba morosuo, mu themiae puotie nunu chatha pfhü morosuo, kekreilamonyü puoe krodiko Jihova dieliemia zokecü la.

⁸Derei niekoe rürei se nie chau therüte; nieko chathau medzi di themia kekra bu u phi mesükelie chüshü; niekoe Levi dietseidiekho-u bie pesuowa, krodiko Jihova siya,

⁹süla a n bu themia peteko mhodzü rütsekecü mu zhasekepfümia chüwate, sümhorei nieko a zhoko se balie mo derei nie chatha khakeshüko nu nie nei si kreite.

¹⁰U pete u krü puo zo moü me? Ukepenuopfü puo thuo u chüshü moü me? Siüro kidi we huoniehuo gei diethoshülie mo di u puonuoko dietseidiekho-u perhuwa ga?

¹¹Judae pele thalie mote, tsiu Israel mu Jerusalem nu mha kerütsekecü chüwate; kekreilamonyü Judae Jihova kemesachüu, puo khrieyakecüu perhuwa, sidi pelekemomia nuonuo lieliete.

¹²Jihova bu Jakob pfheki nunu mhahaikecü kechüko kehoupuorei zhapuchü[3] morei pfhekhokeshü, morei ruosuo se krodiko Jihova ki kevor pete dathewalie.

¹³Siro nieko hau rei chü sa, Jihova ruosuobau mhodzü, kekra mu meheimelokecü pie wheshü kekreilamonyü puoe nieko ruosuo lie sa mota, morei puo nei di nie dzie nunu lie sa motacü la.

¹⁴Nieko sie, “Kiüdi puo chüshü mota ga?” idi ketsoya. Kekreilamonyü Jihova no mu n khriesa ki ze lhoukeliepfü nnie donu zhapuu chüshü rei, no puo pele thalie mote, hapfü n dziesepfü mu dietseidiekho geinu n kimia chükeliepfü zoürei.

¹⁵Hapfüha Ukepenuopfüe puo chüshü moü me?[4] Chüüphou mu ruopfü rei puo vie![5] Di siro Ukepenuopfü kedipuo mengu ba ga? Ukepenuopfü keprei yieu zo. Süla nie thuo nie mehoshüliecie, sidi mia puo bu rei puo khriesa ki ze lhoukeliepfü gei dietho mowa hiecie.

¹⁶Kekreilamonyü a kekhokevakecü ngumecü, Jihova, Israel Kepenuopfü puya, mu mia kemvü kechüpie u wheseketuomia rei, krodiko Jihova puya. Süla nie menuotuolie mu pelekemo chüta hie.

¹⁷Nie diepuko la Jihova puo nyiete. Sishierei niekoe sie, “Hie kikecüpuo nunu puo bu puo nyieta ga?” siya. Sidi nie sie, “Mha kesuo kechümia zorei pete Jihova mhodzünu we vi zo mu puo uko ngu puo nei” iya. Morei, “Kethoca Kepenuopfü kirapuo ba ga?” isiya.