Read Angami Naga Malaki 3 Bible Online

Malaki 3 - Angami Naga bible

Malaki 3

¹Harie, a dieliemia puo a mhodzü cha kesetuoü ketseshüzhie, mu nie Niepuu pfhüyakezhau le mo keba nu puo rüsuoki nu vortuo. Dietseidiekho piekezhü dielieu puo gei nie neiyakecüu, ketho zo, puo vorzhie, krodiko Jihova siya.

²Derei supuonie puo kevor nhie shügeshühielie mu supuonie puo kengu ki thalie vituo ga? Kekreilamonyü puoe chü kemesakecü mi tuoi mu sabou kekuothopfü tuoi zo;

³puoe mhachü kemesakecüu mu rakachü chü kemesakecü puo tuoi balietuo, sidi puoe Levi nuosenuoyieko chü kemesalietuo üdi uko chü kemesapie suna mu rakachü tuoilietuo, ukoe kemiatho[6] nunu ruosuo chüpie Jihova ki shülie kemochie.

⁴Sitse thiedzü teiko tuoi Juda mu Jerusalem ruosuo khakeshükoe Jihova puo neilietuo.

⁵Sitse a dienyakecüketuo la nie penuo vortuo; a themoumia petsoukecü, pieükechümia petsoukecü, tijü di rüsekecümia petsoukecü, zhakhrü ze mhachü di mia zhakra peseyakecümia, samimiapfü mu merünuomia, chazoumia mezhü pejücümia, mu a preiyakemomia petsoutuoü mhai vor zhapu khashütuo, krodiko Jihova siya.

⁶Kekreilamonyü a Jihova rüdiya mo; süla nieko, He-i Jakob nuonuoko, kaüjütalie lho.

⁷Nie puonuoko teiki sie nieko a zhoko therhiete mu süko se balie mote. Rürei a ki vorlie, sitse a rei rürei nieko ki vorlietuo, krodiko Jihova siya. Derei nie sie, “We kimhie di rürei ta?” siya.

⁸Miapuonie Ukepenuopfü vie selie vi me? Sishierei nieko a vie selie bate! Derei nie sie, “Hie kikecüpuo nu n vie seya ga?” siya. Nie ker za khakeshü nu mu mha khakeshü nu!

⁹Rüse se nieko rüsewate, kekreilamonyü nieko a vie seyacü la, nie seyie peteko!

¹⁰Nie ker zau pete se mhakenguyakezha kiu nu vorlie, sidi a kiu nu bu kecüca balieketuo la, mu sükemhie di a dojücie, krodiko Jihova siya, sidi nieko a teigei khirkiko khrüshü mu theja rupie nie ketshukeli chüshütuo mo lho shi mehocie,

¹¹a nieko la ku[7] kerhiewatuo, sitse sükoe kijüu nu nie mhaleiko pekawalie lho; mu nie khubelie bu puo si rüchü moketa chülie lho, krodiko Jihova siya.

¹²Sitse seyie pete rei nieko üse theja kepfümia ütuo, kekreilamonyü nie kenei kijü puo chülietuo, krodiko Jihova siya.

¹³Niekoe a petsou di die kereko pute, Jihova siya. Sishierei nie sie, “Hie kikecüpuo nu n petsoukecü die puta ga?” siya.

¹⁴Niekoe sie, “Ukepenuopfü lie chükecüe thedo zo. Puo diekhakeshüko ze bakecü morei u nousuo siei di krodiko Jihova mhodzünu kevo kedipuo kemevi ba ga?

¹⁵Siro we kerüzhakecümia üse puo neituo üya; mhakesuo chüyakezhamia bu kruokelie rübei zo mo, derei Ukepenuopfü mia dojükecü kirei ukoe talieya” idi puya.

¹⁶Sitse Ukepenuopfü rhutuoyakezhakoe huoniehuo rüchü, sitse Jihova leshü mu rünyüshü, sidi Jihova rhu tuoyakezhako mu puo za le tuoyakezhako la puo kerükra leshüda puo thulie.

¹⁷Ukoe a vie chütuo, krodiko Jihova siya, a mha chükecü zha nhie a vienya a khrietho puo chütuo, miakrünuokoe puo nuonuo u lie chüyakezhako ngumezhieshüyakezha tuoi a uko ngumezhieshütuo.

¹⁸Sitse nieko kemiatho mu kerüzhü, Ukepenuopfü lie chüyakezhako mu chüyakemoko si kekrei lalietuo.