Read Angami Naga Mathi 10 Bible Online

Mathi 10 - Angami Naga bible

Mathi 10

¹Süsie Jisue puo thuo pethakelie kerekenieko kie kengulie di uko bu mesa kemo ruopfüko whuolieketuo, mu kechükenyü mu kesuokemezie neiüko chü keshürholieketuo kekuo khapie uko tsüshü.

²Siro apostel kerekenieko za hako: kerieu, Pitor ükezha Simon mu puo siezeu Andria, Zebedi nuo Jakob mu puo siezeu Johan,

³Filip mu Bartholoma; Thoma mu khezhanuo khruoyakezhau Mathi; Alfia nuou Jakob mu Thadia[15];

⁴Kananmia Simon, mu Jisu tekeshü Judas Iskariot rei sa.

⁵Jisu mia kerekenie hako tarhoshü di uko ketse di sie, “Nieko Judakemoko kijü morei Samariamia rüna puo nu rei vo hie,

⁶derei Israel seyiemia jüketa tekuoko ki vocie.

⁷Nieko vokecü ki, ‘Teigei kedi vor penuoteitewe[16]’ idi dieliekeviu pushüliecie.

⁸Kechümia chü keshürholie, kesiamia chü perheishülie, mpa kechümia chü kemeneshülie, mu terhuokesuoko whuowalie. Nie methuo ngulie zeru, methuo zashücie.

⁹Nieko priesabou nu suna, rakachü morei mese piekechü priesa puorei pfü hie,

¹⁰nie rüve likhuo, morei boulie kenie morei phikou morei kethe puorei se hie. Kekreilamonyü mhachüyakezhau puo va ngu cü zhükecü la.

¹¹Nieko tuo rüna kecü morei kezha kehoupuo nu le rei supuonie sünu puotou ba shikecü pfhüliecie, sidi nie tuo lata kemochie ki sünu balie.

¹²Nieko tuo ki puo nu lekelie ki, japie ki süu nu shülie.

¹³Mhanuü ki sünu puotou ro, nie jakeshü nouneu bu sünu balie.

¹⁴derei nieko die rei rünyü mo ro, ki sünu morei rüna sünu nu tuotaketuo ki nie phi gei nyophe rei kepfhüshüwalie.

¹⁵A nieko ki pu toushütuo, mia ketsoketuo zhanhie rüna süu rüli ki Sodom mu Gomora rünanie rüli we hielie rüükuotuo.

¹⁶“Harie, tekuo socie donu kevo tuoi a nie ketseshüzhü ho. Nieko nie do vipie tinyhü tuoilie mu nie zho menepie mekhru tuoilie;

¹⁷Themia süko gei we nieko kireilie; kekreilamonyü uko nie tepie pehüko kehou nu shütuo, mu uko sinagogko nunu nie vütuo.

¹⁸A za la mia bu nie teze kezhako mu kediko mhodzünu rei votuo, sügeisünu nieko bu süko mu Judakemoko ki zhapu chülietuo.

¹⁹Mia nie tekeshü ki kikidi mhapu ta morei kedipuo pu ta, ikecü le nieko nou kemezhie hie, süteiki nie bu kedipuo putie shikecü khapie nieko tsü zotuokecü la,

²⁰kekreilamonyü nie thuo mha pu lho, derei nieko Puou Ruopfüu thuo nie nou nu pushü zotuokecü la.

²¹Siro siezedzürie thuo siezedzürie tepie mia bu dukhrituo, mu mia puonuoko rei unuonuo gei sükemhie chütuo, mu unuonuo thuo ukrü ngumvü sie di mia bu dukhrituo.

²²Themia pete rei a za la nieko ngumecütuo. Derei kehoupuorei hiepfü zo tha thela tsokelieu kelalietuo.

²³Siro rüna puo nu mia nie pechüketa ki, ta rüna kekrei puo nu votaliecie. A nieko ki pu toushütuo, Themia Nuou kevor mhodzü nieko Israel rünako nu vo ketso phrelie lho.

²⁴“Kepethau ki pethakelieu zha mo; morei niepu-u ki puo kituomia zha mo,

²⁵süla pethakelieu puo kepethau mhielie mu kituomia puo niepumia mhiekelie sie vi zo. Mia ki niepu-u thuo rei üse Belzebul üdi kieya liro, puo kikruko zo we süu kirei pesekuotuo.

²⁶“Süla nieko süko prei hiecie, kekreilamonyü mhapuorei se mia pesipengulie lhoü whepie keba jü; tsiu mia bu si motuo üdi keviepie kezhü rei jü zo.

²⁷A kezei nunu nie ki pukeshüko, kezie nunu se mia ki pushülie; mu nie nupukeshüko ki mho geinu shieshülie.

²⁸Siro themo-u dukhriwa, derei ruopfüu dukhriwalie kenjükecüko prei hiecie; sirei Gehena nunu themo-u mu ruopfüu rei pekawalie keviu preikuoliecie.

²⁹Tsiekhrienuo kenie pie priesa puo nu zeya mo me? Sirei nie Puou medo zo kemosie süko puorei te kijü tsutalie lho.

³⁰Nie la we nie tsütha pete rei phrü phreliete.

³¹Süla michie hiecie; nieko tsiekhrienuo kekra kirei puoma rekuo eru!

³²“Süla themia kehoupuorei mia kengu ki a phra liro, a rei teigei a Puou mhodzünu puo za pie putuo.

³³Derei kehoupuorei themia mhodzünu a phra mvü ro, a rei teigei a Puou mhodzünu puo phra mvütatuo.

³⁴“A kijü gei kezekevi khashütuoü vor ücü le hiecie; a kezekeviu monyü zhiecha khashütuo üdi vor zo.

³⁵Kekreilamonyü puo nuou bu puo puo ngumvü, puo nuopfü bu puo zuo ngumvü, tsiu puo miepfü bu puo niapfü ngumvüketuo la kevor zo;

³⁶Siro mia puoe puo kikru thuo puo ngumvümia chütatuo.

³⁷“Kehoupuorei a ki puo puo morei puo zuo khriekuota liro, puo a themia chülie sü mo; mu kehoupuorei a ki puo nuou morei puo nuopfü khriekuoya liro, puo a themia chülie sü mo.

³⁸Mu kehoupuorei puo thuo puo krus pie di a siemedzi mo ro a themia chü sü mo.

³⁹Siro kehoupuorei puo thuo puo phou pekrulie nyüyakezhau süu pejüwatuo; derei kehoupuorei a la puo phou pekapejükeshüu süu ngu lalietuo.

⁴⁰“Kehoupuorei nieko zelieyakezhau a zelieya; mu kehoupuorei a zelieyakezhau a ketsekeshüu rei zelieya.

⁴¹Kehoupuorei siedzekesimia puo za nunu siedzekesimia puo zelieyakezhau siedzekesimia puo zhakhra ngulietuo; mu themia kehoupuorei kemiathomia puo za nunu kemiathomia puo zelie ro kemiathomia zhakhra ngulietuo.

⁴²Siro kehoupuorei pethakeliemia za nunu dzüku hie puo rei pie kecütho hako yopuo zorei dieshü ro: a nieko ki pu toushütuo, süko puorei zhakhra jütalie lho zo.”