Read Angami Naga Mathi 11 Bible Online

Mathi 11 - Angami Naga bible

Mathi 11

¹Siro Jisu die hako pie puoe pethakelie kerekenieko tarhokeshü sie, puo sünu nu tuo uko nadiko nu mia petha mu puo dielieu pupie mia kietuoü vota.

²Siro Johan kedieki nunu Khristau mhathoko sikelie ki, puo[17] siedziko huomia ketsepie puo ki shü,

³mu uko puo ki, “Mia puo vortuo üketuou no me? Mo hie bu kekreimia puo merü batuo ga?” sita.

⁴Sitse Jisu sie uko ki, “Nieko vo di Johan ki nie kesi kenguko pushücie:

⁵Mhicieko mhangulie bate, phiyhoko chatuolie bate, mpa kechüko[18] chü kemesalie bate, nyievüko mhapfhe silie bate, kesiamiako rhei lalie bate, tsiu dieliekeviu pupie kejüko kieshü bate.

⁶A gei jata kemoko theja kepfütho” sita.

⁷Siro süko tuotazhü tse, Jisue Johan dze pu themia krodiko kie di: “Nieko rayha nu kedipuo mehotuoü pra ga? Teikhrie bu he kenie keba tekhriebo puo me?

⁸Mo, nieko kedipuo mehotuoü vo ga? Pfhenei puolo kememhiepfü sekezhamia puo me? Pfhenei puolo kememhie seyakezhamia kedimia kinu baya!

⁹Di siro nieko kedipuo la pra ga? Siedzekesimia puo mehotuo üdi me? U, mu sizomonyü siedzekesimia kirei zhakuokecü puo zo.

¹⁰Themia hau dze thiedzü thupie ketuo, ‘Harie, a n mhodzü a dielieu ketseshüzhie, puo n mhodzünu n chau kesetuo’ isi pie kezhüu zo.

¹¹A nieko ki pu toushütuo, thenumia geinu lhou keparko donu Johan mia baptaiz chükezhau ki kezha puorei lhou sier mo; derei teigei kedi nu we kecütho-u zorei puo ki zha.

¹²Siro Johan kelhou teiki nu vor tsie ketso mia teigei kedi pesüpemvü phi vorte, tsiu u zho kesuomia mia kemvü chü di süu pesetuoüya.

¹³Siro Johan kevor mhodzü siedzekesiko mu thezho-u rei süu dze pu vor zo;

¹⁴mu nieko süu rünyütuoü ro, puoe vortuo üdi pupie kezhü Elija-u zo.

¹⁵U nyie kenyimia bu rünyüliecie!

¹⁶“Derei a bu tsiedo nuoko pie kedipuo ze kemejülie vituo ga? Sükosü nhicumia lhithochüko nu huoniehuo kie di,

¹⁷‘Hie luoü khou nie kie, sirei nie nie dowhuolie mo; hie thekrü chüshü, derei nie kralie mo’ ikeba mhie zo.

¹⁸Kekreilamonyü Johan vorkecü ki mhacümhakrie mo ru, mia puo ki, ‘Puo terhuokesuo zeya!’ sishü.

¹⁹Themia Nuou vor mhacümhakrie ru, uko puo ki, ‘Harie, cahuocayau mu kemezeu, khezhanuo kekhruoko mu kephoumako khrietho-u!’ ite. Derei mhasi zo we puo mhatho geinu puo mezhüko tha toushüya!”

²⁰Siro puoe ungomhatho kekra chükeshü rünako nu themiako thenou kedilie moketa la süko kerhieta.

²¹Sidi sie, “Ce, Korasin no we chülietie! Ce, Bethsaida no rei chülietie! Mhanuü nnie kinu chükeshü ungomhatho Tur mu Sidon nunu chüshü ükecü we, uko gakhropfhe dzie mu mige pie u kenhepfü di thiedzütho nu uko nou kedilietatieciü!

²²Derei a nieko ki pushütuo, mia ketsoketuo zhanhie nieko rüli kirei Tur mu Sidonnie rüli we hielie rüükuotuo.

²³Siro no Kapernaum, n chü kerükrie kho tei thutuoü ba me? Mo, n chü kerünuopie tsu Hades nu shüwatuo. Kekreilamonyü n geinu chükeshü ungomhathoko Sodom nu chüshü ücüwe, thie ketso rei süu ba zotieciü!

²⁴Siro a n ki pu toushütuo, mia ketsoketuo zhanhie n rüli ki Sodom kijüu rüli we hielie rüükuotuo.”

²⁵Siro süteiki Jisu sie, “He-i, a Puo, tei mu kijü Niepu-u, a n tsheya, kekreilamonyü no mhakesikeleko ki we mha hako keviepie tuo di pie nuoranuoko pesi pengukeshü la.

²⁶Ketho, a Puo sikecü n neikecü la.[19]

²⁷A puo thuo mha pete pie a dzienu shüwate; mu Puou thuo zo kemosie miapuorei Nuou siya mo, sütuoi Nuou mu Nuou thuo süu thapie kieshüketuoko zo kemosie miapuorei Puou siya mo.

²⁸“Kemezhie mu nie pie mesikezha khe a ki vorliecie, siro a kerülei pie nie tsütuo.

²⁹Nieko a vocie pfülie, mu a kinu mhasilie; kekreilamonyü a zho vi mu a ko mocü la; silie liro nieko nou kerülei ngulietuo.

³⁰Kekreilamonyü a vocie pfü rüü mu a pieu rei medza.”