Read Angami Naga Mathi 12 Bible Online

Mathi 12 - Angami Naga bible

Mathi 12

¹Siro Jisu sabat zha puo nhie tuose lievu puo pfüthe vozhü, süki puoe pethakelieko merü tuota; süla uko telhakre merhelie di cü tuo.

²Siro Farisiko süu ngushü di sie Jisu ki, “Harie, noe pethakelieko sabat nhie chükecü hau thezho kemo puo chü tuote” sita.

³Sitse puo uko ki, “Nieko David mu puo zeketuoko merüketa ki kedipuo chüte shikecü dze phrü mo zo me?

⁴Puo Kepenuopfü kinu le di zievoko rübei sie kekreimia cüya kemo zho varhuo di Kepekie niekhrüda cü ze.

⁵Sizomonyü zievoko thuo zorei sabat nhie rüsuokiu nunu sabat perhuta zorei kejo jü ükecü nieko thezho-u phrü mo zo me?

⁶Derei a nieko ki pushütuo, rüsuokiu kirei zhakuokecü puo haki tha.

⁷Sirei, ‘A ruosuou kirei ngukemezhie a nei,’ ikecü dieu ca niekoe sikecü sie we jokemomia pejolie lheciü.

⁸Kekreilamonyü Themia Nuou sabat mho rei niepu-u zokecü la” sita.

⁹Siro puo thechü süu nunu tuose sinagogko nu vota.

¹⁰Sitse sünu dziesiamia puo ba di ngulie. Süki uko puo pejo kenyü la puo ketso di, “Sabat nhie mia chü keshürhokecü thezho me?” ita.

¹¹Derei puo sie “Mhanuü nieko huomia tekuo puo nyi di sabat nhie süu te kheho puo nu leta ro, puo süu merhashü par chazou shü motuo me?

¹²Di siro themia tekuo kirei puoma re phi mo üme? Süla sabat nhie mha kevi chükecü puotou zo” sita.

¹³Sidi puo themiau ki, “N dzie petoshücie,” sishü. Sitse puo puo dzie chashü ru süu vi lapie kekreitsatie mhielieta.

¹⁴Derei Farisiko pra di puo dukhriketuo rhü di puo la kerüchü.

¹⁵Sirei Jisu mha hau silie tse, sünu nu tuota, mu mia kekra puo siemedzita; mu puo süko pete chü keshürhoshü,

¹⁶Siro puo süko bu puo dze pu hienu khawa.

¹⁷Puo hau chükeshü thiedzü siedzekesiu Isaya tie nunu:

¹⁸“Harie, a kituou, a thuo puo kedakelieu, a khrieu, a nou zorei puo neiyakezhau. A a Ruopfü pie puo gei shütuo, mu puoe kethoca se pelekemoko pesishütuo.

¹⁹Puoe mia ze keprüli mu shie zotuolie lho, morei chapfüchaüko nu miapuorei puo pfhe silie lho.

²⁰Puo kethocau bu kuolie kemochie; puoe tekhrie tsakezhü puorei bietshewa lho, mu puoe mi kepetu lo khukezhüyo rei pemhewalie lho!

²¹Mu pelekemo seyieko puo zau gei u kemerü batuo” idi pushü.

²²Süki mia terhuo kesuo bu kebi zeketuo puo mhicie mu liehuokecü puo ze puo ki vor; ru puo süu chü pevishü, sidi keliehuo süu bu diepulie mu mha ngulie.

²³Sitse themia kroko pete u ngo di sie, “Hau David nuouta zomonyü?” sita.

²⁴Derei Farisiko süu sishü di sie, “Hau terhuokesuoko kediu Belzebul la zokemosie terhuo kesuoko whuolieya mo” sita.

²⁵Süki Jisu uko noudoko silie di sie uko ki, “Kedi kehoupuorei puo thuo puo pfüphrota ro kataya, mu nadi morei kikru kehoupuorei puo thuo puo pfüphrota ro thalieya mo.

²⁶Siro Satan thuo Satan whuota ro, puo thuo puo pfüphrote, siliro kikidi puo kedi thalie ta?

²⁷Mhanuü a Belzebul se di terhuo kesuoko whuota üro nieko nuonuoko supuo kekuo se di süko whuowa ga? Süla süko thuo nieko ketsotuo.

²⁸Derei Kepenuopfü Ruopfü kekuo se di terhuokesuoko whuoya liro, siro Kepenuopfü kedi vo nie tso bate.

²⁹Morei mia puoe kekuomia puo phawa perie mo ro kiki di le süu kinu puo vieko chülie vi ta? Puo phakelie sie nu puo kinu vieko chülietuo.

³⁰Kehoupuorei a kitsa kemomia a ngumvümia zo, mu kehoupuorei a ze mha kengukemo-u mha kezawayakezha zo.

³¹Süla a nieko ki pushütuo, kephouma mu mia ketha kehoupuorei vapie themia tsütuo, derei Ruopfü ketha we vapie tsülie lho.

³²Kehoupuorei Themia Nuou gei die kesuo pu ro vashü puo tsütuo; derei kehoupuorei Ruopfüu gei die kesuo pu ro, tsiedo kelhou kirei mu tsiesieu nu rei vashü puo tsülie lho.

³³“Seibo-u theke pevishülie, siro puo si kevi vülietuo; morei seibo-u theke pesuoshülie, siro puo si kesuo vüshütuo; kekreilamonyü puo si geinu puo bo-u silieyakezha la.

³⁴Nieko prielepfü seyieko, nieko vi mo di kikidi mha kevi pulie vi ta? Kekreilamonyü u nou mha kekra bakecü la u tie bu pu parya.

³⁵Themia kevimia puo mhaviebou kevi nunu mha kevi hielashüya, mu themia kesuomia puo mhaviebou kesuo nunu mha kesuo hielashüya.

³⁶A nieko ki pushütuo, themia die pukezha diethuodieruo kheko la rei u rülei ketsokecü nhie pu la phre zotuo,

³⁷kekreilamonyü n dieko la no mezhülietuo, mu n dieko la no jotatuokecü la” sita.

³⁸Süsie thezho-u pethayakezhako mu Farisiko huomia la sie puo ki, “Kepethau, hie n bu u ngo mhatho puo chüshü di ngu nyüyalie” sita.

³⁹Derei puo uko ki, “Kerüzhü mu pieü themia hako ungomhatho pfhüyakezha zo, derei siedzekesiu Jona geinu chükeshüu sie ungomhatho kekrei kha lapie süko tsü salie lhote.

⁴⁰Jona teisozha se mu teizeizha se khuo kezhau vadi nu kezhü tuoi Themia Nuou rei teisozha se mu teizeizha se kijü khro zhütuo.

⁴¹Siro mia nyiekecüketuo zha nhie Ninevimiako themia phou hau ze sie di uko pejotuo, kekreilamonyü uko Jona kepetha die sikeshü ki u kephouma nunu thenoukedilie, mu harie Jona ki zhakuokecü puo haki tha zo!

⁴²Mia nyiekecüketuo zha nhie Pesotsa kedipfü themia hako ze sie di uko pejotuo, puo kijü vala nunu Solomon mhasidie rünyütuoü vorkecü la, mu harie, Solomon ki zhakuokecü puo haki tha zo!

⁴³“Siro mesa kemo ruopfüe mia puo geinu praketa ki süu puo rüleichü pfhü dzü kejüko nu voya, derei süu ngulieya mo.

⁴⁴Sitse puo sie, ‘A thiedzü ba di praketa a ki nu la votatuo.’ siya. Sidi puo sünu vor tse ki süu methuo mu ketso kezivipie keba ngulieya.

⁴⁵Sitse puo tuo la pra puo kirei suokuocü ruopfü kekrei thenie ze la vor di uko keze ki sünu bataya; sidi themia süu rüli kenuotsa therietsa kirei suokuotaya. Tsiedo themia kesuo phou-u rei sümhie zotuo” sishü

⁴⁶Siro puo themiako ki mhapu tha zoluocü nu, puo zuo mu puo siezedzürieko puo ze kerüchütuoü puo pfhü vor kitie thata.

⁴⁷Süki mia puo puo ki, “Harie n zuo mu n siezedzürieko n ze kerüchütuoü n pfhü vor kitie thalie” sishü.

⁴⁸Derei Jisu la sie hau pukeshüu ki, “Supfüpuo a zuo mu suomia a siezedzüriemia ga?” sita.

⁴⁹Sidi puo puo dzie chapie puo siedziko tha di, “A zuo mu a siezeko hakowe!

⁵⁰Kekreilamonyü kehoupuorei teigei keba a Puou medo chüyakezhamia sü a siezemia, a üpfü mu a zuonuo zo” sita.