Read Angami Naga Mathi 13 Bible Online

Mathi 13 - Angami Naga bible

Mathi 13

¹Siro sünhie Jisu ki sünu nu tuo vo dzükezha khieki balie.

²Sitse mia krodi vor puo khieki kengulieta, süla puo rou puo nu le balie mu themiako pete bu keso nu thalie.

³Sitse puo dievi nunu uko ki mha kekra pu di sie, “Rünyüliecie! Tsia kevau puo tsia vatuoü tsu.

⁴Siro puo tsia vakeshü ki huo te cha nu tsuta, sidi perako bu vor süko pa cülieta.

⁵Siro huo te kijü puojü shükemo ketsietsoru nu tsuta, mu rünyo shükemo la süko tsü mha sierta.

⁶Derei teirünia par uko phieshü tse; süko u mie kejü la phie kerüwiwa.

⁷Siro huo te zohu donu tsuta, süla zohuko bu zha sier uko gekhriwa.

⁸Derei huo te kijü kevi nu tsulie di puo si vülie, huo krie puo, huo hiesorou mu huo ser vülie.

⁹Kehoupuorei u nyie kenyimia bu rünyüliecie” sishü.

¹⁰Sitse pethakelieko vor di puo ki, “No kiüdi dievi nunu uko ki mha puya ga?” sidi ketsota.

¹¹Sitse puo sie, “Nieko bu zo we teigei kedi dze kesouko silie kevi pie tsüwate, derei pie uko we tsü mo.

¹²Kekreilamonyü kehoupuorei mha puo gei kebau pie tsü sashütuo, sidi puo bu kra philietuo; derei mhapuorei bakemo-u we, puo kinu puo keduo yopuo kebau rei chü setatuo.

¹³Haha la a dievi nunu uko ki puyakecüu sü ‘uko mehocü we mehoya, derei nguya mo, uko rünyücü we rünyüya, derei puoca silieya mo.’

¹⁴Hau thiedzü Isaya siedzekesiu uko dze pupiekezhü: ‘Nieko rünyü we rünyütuo, derei silie lho; mu nieko meho we mehotuo, derei ngulie lho.

¹⁵Kekreilamonyü themia hako melou rüvote, tsiu uko nyie rei kenyiebite, mu uko mhi rei mhimie tuote; mocü sie we uko mhi mhangulie, mu uko nyie mhapfhe silie, tsiu uko nou pie puocapuola silie sidi rüreilie, sitse a uko chü keshürhoshütuo muru’ ikecü dieko uko geinu tseilieta zo.

¹⁶Derei nie mhi mha ngulieyakezha mu nie nyie mhapfhe silieyakezha la nie thejakepfütho.

¹⁷A nieko ki pu toushütuo, thiedzü siedzekesiko mu miathomia kekra nie nguyakezhako ngu nyü phi vor, derei ngulie mo, uko nie rünyükezhako rünyü nyü phi vor, derei rünyülie mote.

¹⁸“Siro tsia keva dieviu ca rünyüliecie.

¹⁹Themia huo kedi dieu rünyülie di puoca lelie mo keba nu, kesuou vor di puo nou leketau sesetaya; haue tsia te cha nu tsuketau zo.

²⁰Tsia te ketsietsoruko gei tsuketau liro rünyüshü mu u neisiei di lie mhakelie mhie zo.

²¹Derei themia süu puo mie kejü la zopuoki rübei bakelie zotaya; sidi dieu la kemezhiekecü morei mia u pesekecü sier tse puo tetsu mhataya.

²²Siro tsia vapie zohu donu shükewau, themia süu dieu rünyülie, derei kijü nu rüliko lepie thenou kenyü chü mu kishükinyi kemehou bu dieu gewa, sidi puo si vülie moketau zo.

²³Derei tsia vapie kijü kevi nu shükewau zo we die rünyülie di puoca silie; mu puo si rüchülie petuoya, sidi huomia krie puo; huomia hiesorou mu huomia ser vülieya” sita.

²⁴Puo dievi kekrei puo pie uko ki pu di sie, “Teigei kedi-e mia puo puo lha tsia kevi pie tsu puo lie nu prukeshü mhie zo;

²⁵derei mia zeketa ki, ngumvümia vor zotshü tsia pie telha donu prushüwa di tuota.

²⁶Siro telhako lhou sier puo si rüchülie tse, zotshüko rei parta.

²⁷Sitse themiau kituoko vor di sie puo ki, ‘Niepu-u, No telha tsia kevipie n lie nu prushü mo me? di siro zotshü hako kirapuonu vorta ga’ idi ketsota.

²⁸Sitse puo uko ki, ‘Ngumvümia thuo hau chüshüwate.’ sita. Sitse kituoko la sie puo ki ‘No hie bu süko piewaketuo n medo me?’ idi ketsota.

²⁹Derei puo sie, ‘Silho, nieko zotshü pie kengu vo tse telhako rei sa shüzoukewa prei mu.

³⁰Lieyie tei vor kemochie unie kenienie bu keze lhou balie; siro lieyie tei vor tse a thuo liekereko ki zotshüko bie kengulie rie di thewaketuo la süko khro kengulie, derei telhako we pie vo a lhaki nu kengulie.’ ”

³¹Süsie puo dievi kekrei puo pie uko ki pu la di: “Teigei kedi-e mia puo gakrie yopuo se tsu puo lie nu ciekeshü mhie zo.

³²Süusü mha tsiako donu kecütho zo, derei lhou sier zhalie ro ga pete donu kezhatho puo chülieya, sidi seibo puo chülie di teirako bu puocoko geinu puo kru chülie kevi chülieya.”

³³Süsie rei Jisu uko ki dievi kekrei puo pu la di sie, “Teigei kedi-e khrei kemhie zo: miapfü puo khrei se vo thou kemejü ketshu se nu shüshü di süu pou kepar pfhe keba mhie zo.”

³⁴Jisue mha hako pete dievi nunu themia kroko ki pu; puo dievi se mo di uko ki mhapuorei pu mo.

³⁵Puo hau chükeshü thiedzü siedzekesiu bu: “A a tie bu dievi pie mha putuo; A kijü chülie tsenu keviepieketuoko pushütuo” isi piekezhü dieko bu tseilieketuo la.

³⁶Süsie puo themia kroko khawa di kinu leta. Süsie puo pethakelieko puo ki vor di sie, “Lieu nu zotshü dze dieviu puoca hie ki pushücie” sita.

³⁷Sitse puo sie, “Tsia kevi prushüyakezhau sü Themia Nuou zo;

³⁸lieu sü kijüu, mu tsia keviko sü kedi nuonuoko; zotshü tsiako sü kesuou nuonuoko zo;

³⁹siro süko prukeshüu ngumvü süu terhuokesuou; siro lieyieu sü kelhou tei thelatsa, mu liekereko sü teigeidielieko zo.

⁴⁰Siro zotshü rhe kengupie mi nunu thewayakezha tuoi vo kelhou thelatsa rei sümhie zotuo.

⁴¹Themia Nuou thuo puo dielieko ketseshü di puo kedi nu mia chü kephoumayakezha pete mu ketho kemo kephouma pete pfhü kengulietuo,

⁴²sidi süko kelhoupie kemeriecü miü nu shüwatuo, sidi sünu kra mu u hu thegeipie batuo.

⁴³Siro kemiathoko we Puou kedi nu niaki tuoi ziekruoipfü batatuo. Themia kehoupuorei u nyie kenyimia sümia bu rünyüliecie.

⁴⁴“Teigei kedi-e lietsa puo nu kinyi keviepie kezhü mhie zo; mia puo vo süu ngulie di kevie lapie zhüwa; süsie puo keneipfü vo di puo vie ketuo peteko zelie di se vo süu khrülie.

⁴⁵“Süsie rei teigei kedi-e lhithomia puo cü puoma kerepfü pfhüketuo mhie zo;

⁴⁶sidi puoe cü puoma kerethopfü puo ngulie, sitse puo vo puo vie pete zelie di süu khrülie.

⁴⁷“Süsie rei teigei kedi-e jal kelhoupie dzükezha nu shü di khuo neiünei tekelie mhie zo;

⁴⁸Siro jal tshulie tse mia bu süu teshü dzükezha khie parlie, süsie kepalie di keviko pie u viebou nu shülie, derei kesuoko kelhouwa.

⁴⁹Süla themia kelhou thelatsa rei sümhie zotuo. Teigeidielieko vor di kemiathoko donu nu kerüzhüko kho kreiwatuo.

⁵⁰Mu süko kelhoupie kemeriecü miü nu shüwatuo, sünu kra mu u hu thegeipie batuo.

⁵¹“Nieko die hako pete ca siliete mo?” sishü. Sitse uko sie, “U” sita.

⁵²Sitse puo uko ki, “Süla thezho kepethamia kehoupuorei teigei kedi dze pethapfülieketamia sü ki niepumia puoe kinyibou nunu mha kesa mu kewe hielakeshü mhie zo” sita.

⁵³Siro Jisu dievi hako pu thewa tse sünu nu tuota.

⁵⁴Siro puoe la puo thuo puo ra vor di sinagog nunu mia petha sedevü, süla ukoe u ngo di sie, “Themia hauha kirapuonu mhasi hakemhie ngulie, mu kekuo kezha hako ngulieta mu?

⁵⁵Puo sei mistiri nuou zo mo me? Puo zuo Maria mo me? Siro puo siezeko Jakob mu Josef tsiu Simon mu Juda nuoko mo me?

⁵⁶Siro puo üpfünuoko pete u ze ba moü me? Di siro puo kirapuonu mha hako pete ngulieta ga?” sita.

⁵⁷Sidi uko puo gei unou kekrüta. Derei Jisu uko ki, “Siedzekesimia puo thuo puo ramia mu puo kikru-u nu zo kemosie mia puo rhuyakemo jü” sita.

⁵⁸Siro uko puo pele moketa la, sünu ungomhatho chü pekra mota.