Read Angami Naga Mathi 14 Bible Online

Mathi 14 - Angami Naga bible

Mathi 14

¹Süki kediu Herod Jisu meyie parketa dze sishü;

²sitse puo sie puo kituoko ki, “Hau Johan mia baptaiz chükezhau zo; puo kesia nunu rheisiete, süla ungomhatho hako puo geinu chü keba zo” sita.

³Kekreilamonyü tsiemhodzü Herod-e puo siezeu Filip kimia Herodiapfü la Johan telie di puo phapie kedieki nu shüwa,

⁴Johan puo ki, “No süpfü liekecü thezho mo!” sikeshü la.

⁵Siro Herod puo dukhriwa nyü tuo rei, puo themia kro-u preita, uko puo üse siedzekesimia puo üketa la.

⁶Derei Herod kepenuo teisozhau vor tse, Herodia nuopfü mia mhodzünu nu nashüshü, di Herod nei chülieta,

⁷süla puo keneipfü süpfü mhakehoupuo cha rei pie puo tsüketuo rüseshüwata.

⁸Sitse süpfü puo zuo die lie di, “No Johan mia baptaiz chükezhau tsü pie mekhou puo nu shülie di se vor a tsücie,” sita.

⁹Sitse kediu puo nou kemezhie phita, derei puo rüse dieu la mu puo kinu hie kebako la süu khashü puo tsütuo üdi pushüwa;

¹⁰sidi puo mia ketsepie kedieki nu shü di Johan tsü zielie.

¹¹Sidi mekhou puo nunu puo tsüu pie vor rüüpfü tsüwa, mu süpfü rei süu se vo puo zuo tsüwa.

¹²Sitse puo siedziko vor puo rüngetsa toupie vo khruwa; sidi uko vo Jisu ki pushü.

¹³Süsie Jisu süu silie tse, puo rübei rou puo nunu mia kejüra puo vota. Derei themia kroko süu sishü tse, uko rünako nunu tuo vor puo siemedzita.

¹⁴Siro puo kijü keso nu par tse themia krodi puo ngu; sitse uko ngu puo noumezhieta di uko kechükenyüko chü keshürhoshü.

¹⁵Siro thevatie puoe pethakelieko puo ki vor di sie, “Thechü hau mia kejürate, mu menuote; süla themiako ketsewa di uko bu vo rünako nu u thuo u la kecüca khrülietacie” sita.

¹⁶Sitse Jisu sie uko ki, “Uko bu tuota morei vi; nieko mha huo khapie uko bu cücie!” sita.

¹⁷Sitse uko sie, “Hieko niekhrüda pengou mu khuo kenie rübei sie kekrei puorei tuo mote,” sita.

¹⁸Sirei puo sie, “Süko se a ki vorlie” sishü.

¹⁹Siro puo themiako bu phiechü gei balienushü. Süsie puo niekhrüda pengou mu khuonie pielie di tosie teigei meho di jashü; süsie niekhrüdako bietshielie di khapie pethakelieko tsüshü, mu pethakelieko rei süko pie themia kroko tsüshü.

²⁰Siro uko pete rei cülie mu pevü phrelie; mu uko puose cü kepeshako khopenuo kerekenie ketshu pfhülie.

²¹Siro süko cükecü, thenuthenuo mu nhicuko sa kemo mia nyie pengou mese.

²²Süsie puoe themia kroko ketse ketha ki pethakelieko bu rükri rou nu le balie di puo mhodzü rie dzükezha khie kekreitsa pfülienushüwa.

²³Siro puo themiako ketsewaketa sie, puo rübei kechachütuoü kijüthou gei vota. Siro teizeitazhü tse, puo rübeita,

²⁴derei süki rou-u pecietho vota mu dzü rüpfhü sier süu vata, kekreilamonyü teirükrierükhrie uko hetacü la.

²⁵Siro khiserüna Jisu dzü kezha mho geinu tuo uko ki vor.

²⁶Derei pethakelieko puo dzükezha gei vorkezhü ngu tse, ukoe michie phita, sidi sie, “Temi puote” ita.

²⁷Derei Jisu rükri sie uko rüchü di, “Thepfulie! A zo mu; michie hiecie” sishü.

²⁸Sitse Pitor sie, “Niepu-u, no zo ketho ro, a bu rei dzü mhonu tuo n ki phirlie kevi chüshücie” sita.

²⁹Sitse puo sie, “Phirlie” ishü. Süla Pitor rou-u nunu par di dzü mho geinu chatuo Jisu ki phi.

³⁰Derei puo teirükhrie phi keba ngu di michieta, sidi rüle dzü khro letatuoüta. Sitse puo shie puo rhie chü di sie, “Niepuu, a kelashücie!” sita.

³¹Sitse Jisu rükri puo dzie yhapie puo mezalie di sie, “Harie n kepele ketsau, no kiüdi kenoudota ga?” sita.

³²Siro unie kenienie rou-u nu lekelie sie teikhrie lata.

³³Süki rou nu ketuoko vor puo rüsuo di sie, “No Ukepenuopfü Nuou ketho zo” sita.

³⁴Süsie uko süu ciepralie tse tuo Genesaret kijü nu vorlie.

³⁵Sitse themia sünu kebako puo silieta, sidi uko mia ketsepie rüna sükhiesümhou keba pete nu shü di mhachü keba kheko ze puo ki vor,

³⁶Sidi ukoe kechükenyüko bu puo pfhephrie zorei bienu cha; mu süu biekelie khe shürholieta.