Read Angami Naga Mathi 15 Bible Online

Mathi 15 - Angami Naga bible

Mathi 15

¹Süsie Farisiko mu thezho kepethako huomia Jerusalem nunu Jisu ki vor di sie,

²“Kiüdi n siedziko bu u pfutsanuo zhoko varhuoya ga? Uko mhakecü mhodzü uko dzie meteiya mo mo ga” sita.

³Sitse puo uko ki, “Nieko kiüdi nie thuo nie zhoko la Ukepenuopfü diekhakeshüu varhuoya ga?

⁴Kekreilamonyü Ukepenuopfüe pucü[20], ‘N puo mu n zuo rhulie,’ tsiu ‘kehoupuorei puo puo morei puo zuo gei die kesuo pu ro, puo bu sia zotuo,’ isi.

⁵Derei nie kehoupuorei puo puo morei puo zuo ki, ‘A mha pie nie khruohikeshüu pie Ukepenuopfü tsüwate,’ iwa ro sümia we u puonuo[21] rhu mo rei viüya.

⁶Sidi nie thuo nie zhoko la Ukepenuopfü die pie kemethuo chüwate.

⁷Nie ketherakezhako! Thiedzü Isaya nieko dze hakemhie pu toupiezhü:

⁸‘Themia hako u tie se a rhuyakezha zo, derei uko nou we vo ratsa tuo;

⁹Uko a rüsuo thedo chü, kekreilamonyü ukoe themia thuo rhükelie zhoko üse kepetha die üdi pethaya!’ ” sita.

¹⁰Süsie puo themia krodiu kiepie puo ki shülie di sie uko ki, “Rünyülie di puocapuola siliecie.

¹¹Themia me nu keleko themia va perhuwaya mo, derei themia me nunu parkezhako thuo themia va perhuwaya” sita.

¹²Sitse pethakelieko puo ki vor di puo ki, “No pukeshüu la Farisiko u nou kekrütakecü si ba mo?” sita.

¹³Derei puo la sie, “Teigei keba a Puoue leishü kemo kheko phewatuo.

¹⁴Uko bu si ba zolie; ukoe mhiciemia di mhicieko chatha tuoyakezha zo. Siro mhiciemia thuo mhiciemia chatha ro, kenienie te thekhe nu letatuo” sita.

¹⁵Derei Pitor sie puo ki, “Dievi hau ca pupie hie kieshücie,” sita.

¹⁶Sitse puo sie, “Nieko tsie rei mha hako lelieya mo me?

¹⁷Mha kehoupuorei u me nu keleu u va nu ke, di khapie chavüchü nu shüwayakecü nie si mo me?

¹⁸Derei u me nunu parkezhako unou nu parya, mu süko u va perhuwaya.

¹⁹Kekreilamonyü u nounu kerüzhü noudoko, mia kedukhri, pieü kechü, pierüü, kerügu, ketijü zhapu, mia ketha hako paryakecü la.

²⁰Mha hako thuo themia va perhuwaya; derei u dzie metei mo di mhacükezha la themia va perhuwaya mo” sita.

²¹Süsie Jisu thechü süu nunu tuo Tur mu Sidon rünatsa vota.

²²Süki sütsa lhouyakezha Kananmiapfü puo vor puo ki, “Niepu-u, David Nuou, no a ngumezhieshücie! A nuopfü terhuokesuo bu puo kebi ze tuote” idi cha shiekhouita.

²³Derei puo dieca puorei pie hapfü ki pu mota. Sitse puoe pethakelieko vor puo ki pu bei di, “Puo ketsewacie, kekreilamonyü puo u siemedzi shie tuo zotakecü la” sita.

²⁴Ru puo lasie, “A ketsepie Israel seyie jüketa tekuoko ki rübeikeshü zo” sita.

²⁵Derei hapfü phir puo mhodzünu khoutoupfü di sie, “Niepu-u, a khruohishü zocie,” ilata.

²⁶Puo lasie, “Nhicunuoko nouva kelhoupie tefünuoko tsükewa puotou mo” sishü.

²⁷Sitse hapfü sie, “Ulie, Niepu-u, sirei tefünuoko zorei u niepumia mizhü geinu uca rürie ketsuko rei pacüya zolie” sita.

²⁸Süla Jisu hapfü ki, “Thenupfü, n kepele zha za ha! N kemengu-u chüpie n ketsüu chüliecie,” sishü. Sitse sümesetouki puo nuopfü vilieta.

²⁹Süsie Jisu sünu nu tuo Galil dzükezha merhie vota, siro puo kijüthou gei kho di sügei balie.

³⁰Sitse themia krodikoe puo phiyhomia, kerünyiemia, mhiciemia, keliehuomia mu kekrei kekra rei ze puo ki vor. Ukoe süko khapie puo phi ki shü, sitse puo süko chü pevi phreshü,

³¹Süla themia kroko keliehuomia diepukelie, kerünyiemia vikelie, lalhimia chatuokelie mu mhiciemia mha nguketa ngushü di uko ngota. Sidi uko Israel Kepenuopfü tsheta.

³²Süsie Jisu pethakelieko kie kengupie puo ki shülie di sie, “A themiako ngumezhiete, kekreilamonyü uko zha se a ze tuote mu mhapuorei kecü jüketa la; mu a uko vachü mo di uko ketseshü nyü mo, kekreilamonyü uko cha nu phisiata rei si momu” sita.

³³Sitse pethakelieko sie, “Úko rayha nu tuokecü ha kirapuonu kecüca krodi hako kelhuo ngulietuo ga?” sita.

³⁴Sitse Jisu sie, “Nieko niekhrüda kitsuo tuoluo ga?” idi ketso. Sitse uko sie, “Thenie mu khuo kecü huo tuo” sishü.

³⁵Sitse puo themia kroko bu ke phiechü nu balienushü.

³⁶Sidi puo niekhrüda thenieko mu khuoko pielie di kethezie khapie Ukepenuopfü tsüshü di süko bietshielie di pie pethakelieko tsüshü, mu pethakelieko rei khapie themia kroko tsüshü.

³⁷Sidi uko süko cü di pevü phrelie, süsie pethakelieko uko cü kepesha puoseko merha ketshu thenie kengulie.

³⁸Siro uko keze mhakecüko thenuthenuo mu nhicuko sa kemo mia nyie dia mese.

³⁹Jisu themiako ketsekewa sie puo rou nu lelie di Magdan[22] kijütsa vota.